Regacho

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Regacho ye una denominación tradicional que reciben u han recibiu los regallos u arroyos en un amplo territorio de la Peninsula Iberica que va dende Cinco Villas y norte de Navarra dica Galicia.

Regato do Sobradiño (Ourense). En gallego regato ye un sinonimo de regacho.

Etimolochía

Bi ha problemas en la interpretación de la etimolochía de regacho y regallo, asinas como de lo cognato catalán regall. L'orichen a partir de lo latín RIGARE u de lo suyo derivau romanz regar ye probable. La palabra regacho d'orichen mozarabe corresponde tamién a la fonetica de l'aragonés d'as comunidaz aragonesas.

Se documenta la palabra regacho en los vocabularios d'unas cuantas localidaz de l'este d'Aragón, como continación de lo suyo emplego en Navarra y La Rioja. En lo sud d'Aragón l'ALEANR amuestra lo cognato castellano regajo en cuenta de regacho en las localidaz con siglas Te 402, Te 307 y Cs 302.

Documentación medieval

Se documenta en bel texto medieval (con -ch- u con atras letras que representan lo mesmo fonema africau):

En la "Grant Cronica d'Espanya" se describe un paisache alpín con regachos:

...a esto fazer estuuieron .iiijo. dias en romper aquella penya. si que las yeguas / a poco que no murieron de fambre por quelas altezas de aquellas montanyas estauan todas nudas & si hauia alguna poca de pastura / las nieues la tenian toda cubierta. toda uegada hy hauie algunas ualles uerdeantes de yerba enlas cuales corrie algunos regaios de agua chicos. & hauie ende algunos arboles. & eran lugares mas dignos de humana cultiuaçion o lauor...

En un texto de 1307 escrito en Val de Linars que permitiba a lo ganau de Zaragoza paixentar en los termins de Mosqueruela se fa mención de bel regacho:

del mas que va el ombria a morron cubierto fasta somo del çerro, et cerro cerro como las aguas vierten contra los fontanares, et por somo del Castellar de Motorrita et corren las aguas vienen al val a yuso entro al Morro Ruvio, catant al regaio. El cual mojon entro al otro mojon adelante del regaio qui es fondon de la foya de Juhan Gomez es et sea entrada et exida de abevradero, del dito mojon que es en fondon de la foya de Juan Gomez en una reviella qu'esta en medio del vallejuelo que sigue el boalage,...

L'actual barranco de las Pozas de Calatayú yera calificau de "regacho" en textos escritos en latín y aragonés:

Et damos desde agora por exa ora et dexamos en poder del dean et del capitol de la dita ecclesia de Santa Maria de Calatayu, qui por tiempo es y sera a depues empero de fin de nos entramos todas las casas nuestras sitiadas en Calatayu, al varrio de Santa Christina, cerca casas de don Domingo Perez de Johan Sanç, et casas de Domingo de Xudes et el regacho, et la carrera, et la placa, con todos sus derechos, excepto el placio mayor de las ditas casas, el cual es contiguo al ortexuello o vergelet del Espital de Sant Espiritus sobredito. Item toda la vinea nostra, sita en Ribota, termino de Calatayu,

et specialiter super omnibus domibus meis, sitis ad rigachium in barrio Sancti Johanis de Valupiel Calataiubii, circa domos domni Luppi de Avinuerta, domos domni Acah del Rabirrigachium, cum suis iuribus universis.

...a esto fazer estuuieron .iiijo. dias en romper aquella penya. si que las yeguas / a poco que no murieron de fambre por quelas altezas de aquellas montanyas estauan todas nudas & si hauia alguna poca de pastura / las nieues la tenian toda cubierta. toda uegada hy hauie algunas ualles uerdeantes de yerba enlas cuales corrie algunos regaios de agua chicos. & hauie ende algunos arboles. & eran lugares mas dignos de humana cultiuaçion o lauor...

Que la grafía -j- u -i- n'estos casos correspondeban a l'actual fonema que se representa con lo digrafo ch lo veyemos en dos parrafos cercanos referius a los peaches de Teruel y Albarracín de las actas de las corz d'Alcanyiz de 1436:

Primerament qui caminara enta Daroca es el estanco e limites el canton del huerto de los frayres Menores, en do sale un regajo de agua de un huerto de Bertholomeo de Alfambra

Primerament qui caminara enta Daroca, es el estanco e limites al canton del huerto de los frayres Menores, en do sale un regacho de agua de un huerto de Bartholome de Alfambra

Igual como entre Andorra y Chiprana la palabra regallo ha plegau a nombrar un río, la variant regacho ha serviu de chenerico pa ríos menors d'atras cuencas.

Lo río de Mora se documenta como regacho de Mora en un texto baixo-medieval que fa referencia a los boalaches d'esta localidat:

Primerament comiençan los mojones segun se sigue en el rio de la Torre el Trillo assi como va el camino de Sarrion e asoma del cerro e el cerro arriba assin como las aguas vierten al regajo de Mora en tro al cerro de la Felipia e responde a la punta de la era de Domingo Barberan efiere en los cabeços de tramos los regajos e a la pieça de Domingo Capater e torna a los cabecos de entramos los regajos...

Tamién se considera regacho un curso d'augua menor que baixa de Fuents de Rubielos en un pleito de 1339 sobre las primicias entre esta localidat y Rubiuelos:

...et el cerro a suso mirant el regajo y pinares del termino de Fuentes, et acude a la carrera do soman los de Fuentes a Cañada Juncosa, asin como aguas vierten et sallen por la carrera adelant por el pinar et el pinar a suso por media la loma, et suso a la Cruz de Piedra en a ojo de Fuentes et de la Cruz salle dreyta via enta la talaya de Monçon fasta el cerro que es en a ojo del Mas de Don Lloca, et el cerro suso fiere a la fuent del barranco de la Tosca et el barranco a suso fiere al rio d'Erche,

Regachos en Aragón

Son hidronimos medievals u actuals formaus con lo chenerico regacho:

• Barranco d'el Regacho: en Malanquiella.
• Barranco d'el Regacho: en Ferrera de los Navarros.
• Barranco d'el Regacho: en Maicas.
• Barranco de los Regachos: en L'Aldeyuela de Tiestos.
• Regacho: en Cubel.
• Regacho de Castralbo.
• Regacho de Concut.
• Regacho de la Cruz: en Ebreya.
• Regacho de la Fuent d'el Buei: entre Fridas d'Albarracín, Moscardón y Val Longuiello.
• Regacho de Mora.
• Regacho de Santo Domingo u de Santa María.
• Regacho de val Delgado.
• Regacho Serna: en Aguilón.
• El Regacho: en La Vega d'Albarracín y en relación con Toyuela.
• El Regacho: en Anadón y ligau a lo microtoponimo barranco d'el Regacho.
• El Regacho: en Villafelich y ligau con los microtoponimos Hoyada del Regacho y Fuente El Regacho y Camino del Regacho.

La palabra regacho s'ha conservau millor en toponimia que la forma regallo, mas representativa de la fonetica de l'aragonés.

Regachos fuera d'Aragón

En La Rioja la palabra regacho s'emplega con lo mesmo sentiu que "arroyo" en castellano estándard. En lo País Basco y Navarra apareixe a sobén como component chenerico:

• Regacho del Lavadero.
• Regacho de Trilla.
• Regacho del Bocal.
• Regacho de Sanbil.
• Regacho de Santa Agueda.
• Regacho Obantzea.
• Regacho de Arantzadia.
• Regacho Riorrama.
• Regacho de Opakua.
• Regacho de Monjiliberri.
• Regacho de Txubindoa.

Un barrio de Barakaldo ye El Regato en castellano y Errekatxo en basco.

Regajo

Lo regajo de Tramacastiel en Mas de la Cabrera (Teruel).

En lo sud de la provincia de Teruel y en las comarcas churras bi ha cursos d'augua que levan lo chenerico Regajo u que simplament son conoixius como El Regajo. En estos casos son claras castellanizacions d'anteriors toponimos tipo regacho u regallo u encara lo catalán regall.

• Barranco del Regajo: tamién conoixiu como barranco de la Riera
• Regajo de Camarena.
• Regajo de Tramacastiel.
• Regajo de la Tejada u barranco de la Tejada (en Fuset).
• Río Regajo: río que traviesa Gaiviel, relacionau con lo Pantano del Regajo en lo río Palancia.
• Río del Regajo: río que traviesa la sierra d'Exarc y caye en lo río de la Val (Val d'Exarc).

Bibliografía

• (es) Manuel Alvar: Atlas lingüístico y etnográfico de Aragón, Navarra y Rioja. Tomo X, Mapa 1374, Lámina 1597. "Arroyo". Institución Fernando el Católico. Departamento de Geografía Lingüística, Institución Fernando el Católico de la Excma. Diputación Provincial de Zaragoza, 1983.
• (es) Concepción de la Fuente Cobos: Libro de apeos del monasterio de piedra (1344). libro de cuentas de la bolseria del monasterio de piedra (Fuentes históricas aragonesas. Fuentes históricas aragonesas, 31. Institución Fernando el Católico, 2001.
• (es) Jose María Iribarren: Vocabulario navarro. Diario de Navarra. 1997.