Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Ononis spinosa
Bolomaga
Denominacions populars
Bolomaga, bolomaca, brumaga, grumaca
Estau de conservación

Seguro (IUCN)
Clasificación cientifica
Eukaryota
Plantae
Magnoliophyta
Magnoliopsida
Fabales
Fabaceae
Trifolieae
Ononis
Ononis spinosa
Descripción
Ononis spinosa
L., 1758

A bolomaga (nombre cientifico: Ononis spinosa (L., 1758)) ye una planta herbacia perén d'a familia Fabaceae, en a orden Fabales, conoixida y que s'emplega mas que mas por as suyas propiedaz medecinals diureticas en as personas y os ganaus.

Ye una planta borde que vive en praus y marguins, apareixida con l'alfalz pero mas dura y con os tallos lenyosos y bella vez tamién con punchas. Sobrevive millor con suelos pobres y en sequera. Habita por tot en Asia, Europa meridional y o norte d'Africa.

Descripción editar

A bolomaga ye una hierba de tallos duros que gosa arribar a fer uns 80 centimetros d'alto, anque a mayoría d'eixemplars se troban entre ixa altaria y uns 25 u 30 cm nomás. As fuellas son composadas, siempre con 3 foliolos con a ladera lobulada y superficie pilosa. En os eixemplars mas viellos u que han recibiu mas sol, os tallos a sobén fan punchas protectoras que guardan as fuellas contra os herbivoros.

A vena ye adventicia, estensa y profunda. As plantas maduras gosan estar bien enradigadas y costa de rancar-las, por o que bellas personas as consideran «malas hierbas». Como atras fabacias, tiene nodulos fixadors de nitrocheno de l'atmosfera con bacterias simbionts que pertenece a o chenero Rhizobium.

As flors son labiadas de color rosa blanquinyosa. Floreixe en primavera. Os fruitos son tabilletas, pilosas cuan son verdes, que en ixecar-se s'ubren con un esclafido y fan brincar a simient.

Fitonimia editar

En a mayoría d'Aragón se conoixe esta planta como «bolomaga». Mosen Pardo Asso replegó la esprisión «rancar la bolomaga» con o significau de «fer lo mas difícil d'una operación»[1] en relación puestar que con as venas tan fondas que tiene. En Sastago, o diccionario de Moneva traye ixa misma esprisión pero con o significau de «fer fuera a uno que estorba».[2] Unatra esprisión que recentó Pardo Asso y que contiene la bolomaga ye «bolomaga secreta», con o significau de «persona que fa mal y ye falsa».[1]

En a val de Vió, de Sobrarbe, en dicen tamién «bolomaca», con o soniu conservador de <k>, anque tamién se'n conoixe a forma con <g>, bolomaga.[3] Unatra forma de decir con conservación d'a <k> se puede trobar en a val d'Echo, que en Ciresa y a villa d'Echo se documenta «grumaca».[4]

A forma «brumaga» s'ha trobau citada en puestos de Cinco Villas como Val Palmas, Uncastiello, Exeya y Sos.[4] En Tarazona y Moncayo se documenta «bomaga».[5]

Imáchens editar

Se veiga tamién editar

Referencias editar

  1. 1,0 1,1 PARDO ASSO, José, Nuevo diccionario etimológico aragonés (voces, frases y modismos usados en el habla de Aragón) (Facsímil). P. 59; Institución «Fernando el Católico» + Gara d'Edizions. 2002. ISBN 84-8094-101-4
  2. MONEVA y PUYOL, Juan, Vocabulario de Aragón; Institución «Fernando el Católico» + Prensas Universitarias de Zaragoza + Xordica Editorial. 2004. ISBN 84-88920-97-0
  3. QUINTANA i FONT, Artur, El Aragonés nuclear de Nerín y Sercué (Valle de Vio); Institución «Fernando el Católico» + Gara d'Edizions. 2007. ISBN 978-84-8094-060-3
  4. 4,0 4,1 VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza, 2004. ISBN 978-84-8986-235-7
  5. LAHIGUERA ALBERICIO, Dabi, A Fabla de Moncayo. Estudio comparativo con a lengua aragonesa; Edicions Transiberiano. 2017. ISBN 978-84-16825-20-2

Enlaces externos editar