Mallo (cheomorfolochía)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Este articlo tracta sobre os mallos que son formas de modelato cheolochico. Pa atros usos de mallo se veiga Mallo (desambigación).

Os mallos son una forma de modelau cheolochico que se desembolica en almendróns y piedras d'arena cuan a erosión aproveita dos familias de diaclasas u fracturas verticals de diferent dirección. Con o tiempo a erosión que se produce n'estas diaclasas aisla pinaclos u torres de roca ditos mallos.

Anvista aeria d'os mallos de Riglos

Os mallos son releus abruptos entallaus en masas d'almendrón d'as marguins d'una cuenca, por eixemplo cuencas terciarias como a Depresión d'Ebro, que tienen una forma de “puro” con cumbre cupular y laderas verticals u en extraplomo. Amaneixen formando conchuntos, roldes bella cosa aislaus en tot en o frent pirenenco: Agüero, Riglos, Salto de Roldán, Alquezra, d'as Sierras exteriors y en bels puntos d'o semontano iberico "Los Fayos", "Tormos d'o Matarranya", ligaus siempre a puntos on as arterias fluvials penetran en a depresión d'Ebro.

O modelau d'os mallos se desembolica sobre almendrons sinorochenicos constuitos por ruellos heterometricos y poco redolaus, diachenizaus por un cemento calsinoso-archilenco de color royenca. En orichen estos almendron fuoron os depositos d'a radiz d'amplos y espesos ventallos aluvials d'edat oligocena-miocena, que a erosión posterior fació que destacasen por a denudación d'as series litolochicas mes tovas y erosionables de l'arco externo.

A inestabilidat tectonica sinsedimentaria se tradució en una serie de fracturas en rella, que se convertioron en linias de febleza litolochica y individualizan a masa d'almendrón en prismas que, reelaboraus por a erosión darán primero formas cupulars y dimpués por encaixamiento d'o rete fluvial y desbastatura d'as ariestas, serán punto d'orichen d'as tipicas formas cilindricas u puros.

Atras discontinuidaz menors como os plans de sedimentación, subhorizontals en os tramos superiors, troban reflexo morfolochico en as fendiduras y extraplomos que dan a forma final d'os mallos.

Os mallos son as enrunas d'os antigos conos de dechección, que tienen una morfolochía prou diferent a la orichinal. A tectonica y procesos erosivos, en interacción, han labrau un paisache prou especial.

Etimolochía y toponimia editar

 
Mallos d'Agüero

A palabra aragonesa mallo (malh en gascón, mall en catalán y mallo en basco), tot y que suene igual que a palabra pa dicir a lo martiello gran, ye d'atro orichen pus puet venir de l'indoeuropeu antigo *molh (en albanés montanya se diz mal y tuca majë). Os toponimos d'influencia ligur Mons Blustiemelus, Ventamiglia y Leucumellus, pueden mostrar que en celtoligur i habió una palabra tipo *melo relacionata con roca u penya. Os cheomorfologos espanyols emplegan a palabra mallo en a suya terminolochía.

En Aragón a palabra mallo apareixe en muitos toponimos (Mallos de Riglos, Mallos d'Aguero, San Esteban del Mall), mesmo en Teruel ("Castiello de Mallo" en Mosqueruela). Os mallos de Riglos son consideraus como uno d'os paisaches mas emblematicos d'Aragón. En o semontano de Moncayo bi ha presencia de mallos a man de Los Fayos. En o Matarranya destacan os mallos conoixius como Les Roques del Masmut (en Penyarroya de Tastavins) y atros mallos d'o termin de Beceit en o parache de La Pesquera.

En Catalunya destacan os mallos de Montserrat, de Sant Llorenç del Munt y las Les Roques d'En Benet. En La Rioja bi ha mallos en a compleganza d'o río Iregua a lo piet d'a Sierra de la Demanda.[1].

En Navarra destaca os Malloak de Aralar,[2] ditos popularment Malloak u las Malloas,[3] son a part d'a Sierra d'Aralar enfilada enta l'Val d'Araitz y Betelu en forma d'una imponent parete u cinglo, entre a muga de Navarra y Guipuzcua. A mes gran part d'os Malloak d'ixe puesto se troban territorio de Navarra y només que uns pocos son en Guipuzcua.[4] Dende o mirador d'o brendador de l'Autovía de Leitzaran entre Leitza y Lekunberri se puet esnavesar una buena anviesta d'os Malloak. Os Malloak d'Aralar son formaus por os siguients monts que son visibles dende a Val d'Araitz: Balerdi (1165 m), Egurbide (1317 m), Urkute (1328 m), Aldaon (1411 m), Intzako dorrea (1431 m), Ttutturre (1262 m), Kurutzeaga (1308 m) y Aitzear (1286 m).

 
As Malloak d'Aralar (Os Mallos d'Aralar), entre Navarra y Guipuzcua, os nombres d'os diferents picos y cerros y os lugars que bi ha a lo suyo piet.

Referencias editar

  1. Francisco Pellicer Corellano, Maria Teresa Echeverría Arnedo Formas de relieve del centro de la depresión del Ebro pp27. Institución Fernando el Católico, 1989
  2. Os Mallos d'Aralar (es)
  3. «Las Malloas de Aralar» cuentan su propia historia. Gara.net (es)
  4. Aralarko Malloak (eu) Malloak/Las Malloas: En basco no bi ha un chenero definito, cuan a chent d'a redolada parla castellano lo castellaniza como las Malloas con chenero femenín.

Bibliografía editar