Salto de Roldán

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O Salto de Roldán^[1] ye una formación rocosa situada a o norte d'a ciudat de Uesca, formada por dos grans penyas u mallos, ditas "penya de Sant Miguel" (1.126 m), a l'ueste, y "penya Amán" (1.121 m), a l'este, que reciben popularment os nombres de "Sen" y "Men", respectivament. Entre os dos mallos, fluye o río Flumen en dirección sud, fendo de muga entre os municipios de Nueno y Loporzano en iste punto. Chunto a la penya de Sant Miguel, bi ha un pico segundario, de 1.036 m, dito "pico d'o Fraile". O Salto de Roldán fa parti d'as ditas "sierras exteriors", que forman a muga norte d'a Plana de Uesca, y se troba en o extremo occidental d'o Parque Natural d'a Sierra y as Foces de Guara. Se i pueden veyer restas d'as fortificacions medievals con que fuoron protechidas y fortificadas, primero por os musulmans y dimpués por os cristianos que dominoron Uesca.

Leyenda

Escudo de Uesca. En a parti superior ezquierda, a supuesta representación d'o Salto de Roldán

En l'anyo 778, o caballero Roldán, protagonista d'a Canción de Roldán, sobrín de Carlos Magno, fuyiba a caballo, de tornada enta Francia, dimpués d'una expedición fallida contra a ciudat musulmana de Saraqusta (actual Zaragoza). Perseguiu por os suyos enemigos, en arribar a la penya Amán, reyaliza un prodichioso brinco enta a penya de Sant Miguel, deixando a os enemigos dezaga; o suyo caballo, manimenos, murió a causa d'o gran esfuerzo. Se diz que as pateyadas deixadas por os cascos de l'animal son encara visibles en l'actualidat.

Iste escenario y a suya leyenda adquirioron gran notoriedat y, seguntes bellas fuents,^[2]^[3] a penyas son representadas mesmo en o escudo d'a ciudat de Uesca.