Atlantida

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Atlantida (en griego antigo, Ἀτλαντὶς νῆσος, Atlantís nēsos, "isla d'Atlas") ye una lechendaria isla esmentata primer en os Dialogos de Platón (O Timeu y O Critias).

Seguntes diz Platón, l'Atlantida fue un país situato cerca d'as Columnas d'Hercules que en estar una potencia naval conquerió muitas partis d'a Europa Occidental y d'Africa alto u baixo 9.000 anyadas antis d'os tiempos de Solón, u alto u baixo 9.600 anyadas antis de Cristo. Dimpués d'un fallito intento d'invadir Atenas, l'Atlantida s'afundió en l'oceano "en un solo día y una sola nueit d'esferra".

Os eruditos discuten sobre cuánto en a historia que explica Platón s'ha inspirato en tradicions anteriors. Beluns dicen que Platón fació servir memorias d'escaicimientos anteriors, como a erupción de Tera (escaicita en a isla de Santorini en a mar Echea) u a Guerra de Troya, per eixemplo; tanimientres que atros insisten en que a suya inspiración se basó en feitos contemporanios a Platón como a esferra d'Helice (373 aC) u a fallita invasión ateniense de Sicilia (415 aC-413 aC).

A posible existencia d'una chenuina Atlantida fue acceptata mientres tota l'Antigüedat clasica, pero fue cheneralment refusata y mesmo parodiata por autors posteriors.

Como o clasicista Alan Cameron estableix:

Ye nomás que en tiempos modernos que a historia de l'Atlantida s'ha preso seriosament por a chent, porque dengún no fació o mesmo en l'antigüedat

Anque poquet conoixita mientres a Edat Meya, a historia de l'Atlantida fue redescubierta por os humanistas en primerías d'a Edat Muderna. A descripción que Platón fa de l'Atlantida inspiró os treballos utopicos de cuantos escritors d'o Renaiximiento, encluyendo-ie a Nueva Atlantida de Francis Bacon, que en ye un buen eixemplo.

O mito de l'a Atlantida inspira a la literatura actual, dende a ciencia ficción a o comic u mesmo o cine. O suyo nombre s'ha convertito en un sinonimo de cualsiquiera civilización prehistorica suposadament abanzata.

A historia de Platón

En os dialogos O Timeu y O Critias de Platón, toz dos escritos en 360 aC, se troban as referencias mas antigas sobre l'Atlantida. Per ragons desconoixitas, Platón no remató mai O Critias. Antiparti, a introducción de l'Atlantida se fa en O Timeu (mención de l'imperio Atlant por parti d'o viello sacerdot echipcio Sonchis de Sais a Solón):

Admiramos muito os grans feitos d'a vuestra ciudat rechistratos astí, pero d'entre totas una destaca per a suya importancia y excelencia. Efectivament, os nuestros escritos recontan como a vuestra ciudat aturó, una vegata, a marcha insolent d'un gran imperio, que abanzaba de l'exterior, dende l'Oceano Atlantico, sobre tota Europa y Asia. En ixas envueltas, se podeba trescruzar ixe oceano en haber-ie una isla debant d'a desembocadura que vusatros, asinas li dicez, la clamaz Columnas d'Hercules. Ista isla yera mas gran que Libia y Asia la Chica chuntas, y allora se'n podeba pasar ta las atras islas y dende as islas a tota a tierra firma que se i trobaba debant y mugaba con l'Oceano atlantico, ya que lo que en quedaba adintro d'a desembocadura que esmentamos pareixeba una badía con una dentrada estreita. En realidat, yera mar y a rechión que l'arredolaba de raso podría estar dita con total corrección, tierra firma. En a dita isla, Atlantida, bi heba una confederación de reis gran y marabellosa que i gubernaba, amás de sobre muitas atras islas, asinas como partis d'a tierra firma. En iste continent dominaban tamién os pueblos de Libia, dica Echipto y Europa dica Tirrenia. Tota ista potencia chunta intentó, una vegada, esclavizar en una enrestida a tota a vuestra rechión, a nuestra y l'interior d'a desembocadura. Allora, Solón, o poder d'a vuestra ciudat se fació famoso entre toz os hombres per a suya excelencia y rasmia, pos superó a toz en valentor y en artes guerreras, enfiló bel inte d'a luita a os griegos, dimpués se veyió obligata a luitar sola, cuan os atros se'n deseparoron, corrió os periglos mas extrimeros y chusmetió a os que mos atochaban. Aconsiguió asinas una graniza victoria y privó que os que encara no heban estato esclavizatos, en estasen, y amás, a cuantos habitabanos dillá d'os confins heraclitas, mos liberó chenerosament. Posteriorment, dimpués d'un violento tierratremo y un diluvio extraordinario, en un día y una nueit terribles, a vuestra clase guerrera s'afundió tota d'un trucazo baixo a tierra, y a isla Atlantida despareixió d'a mesma traza, afundendo-se en a mar. Per ixo, encara agora l'oceano i ye no navegable y inexcrutable, porque lo impide l'archila que produció a isla asentata en ixe puesto y que se i troba a muita poca fundaria.

Platón, O Timeu

En os esmentatos dialogos de Platón, bi apareixen cuatre de personas: os politicos Critias y Hermocrates, asinas como os filosofos Socrates y Timeu de Locri, anque nomás que Critias charra de l'Atlantida. Ye muito probable que istas cuatre personas haigan estato personaches reals, anque istos dialogos redactatos como si fuesen actas, bien podioron estar invencions de Platón. En os suyos treballos, Platón fa servir a ormino os dialogos de Socrates ta descutir posicions enfrentatas dentro d'o contexto d'una suposición.

O Timeu prencipia con una introducción, que contina con un relato d'a creyación y un tarabidau d'as antigas civilizacions. En ixa introducción, Socrates medita sobre a sociedat perfecta, descrita en A Republica de Platón (380 aC) y se cuestiona si él u os suyos companyers podrían recullir bella historia que eixemplificase a dita sociedat. Allora Critias esmenta un suposato evento historico que fería un perfecto eixemplo y contina describindo l'Atlantida como queda recullito en a obra O Critias. En iste relato, l'antiga Atenas pareix representar una sociedat perfecta y l'Atlantida o suyo oponent, significando a mesma antitesi d'os buens afers descritos en a “Republica”.

Critias diz en o suyo relato que l'orichen d'ista historia se troba en una vesita a Echipto d'o lechendario lechislador griego Solón en o sieglo VI aC. En Echipto, Solón conoix a un sacerdot echipcio dito Sais, qui tradució a historia de l'antiga Atenas y l'Atlantida a lo griego, pos yera-ie recullita en papiro y escrita en antigos hieroglificos.

Ye menister significar que l'historiador griego Plutarco, siet sieglos dimpués, mos charra sobre Solón decindo, entre atras cosas, que conoixió en Echipto a os sacerdoz echipcios Psenofis d'Heliopolis y Sonchis de Sais, os mas eruditos de toz os sacerdoz echipcios.

Seguntes O Critias, os antigos dioses helenicos dividioron a tierra de tal traza que cada Dios tenese a suya micota; allora a Poseidón li se dio fendo-li goyo, a isla de l'Atlantida. Ista isla yera mas gran que l'antiga Libia y Asia la Chica chuntas, sindembargo, estió dimpués afundita per un tierratremo y se convertió en un barducal, fendo imposible a navegación per l'oceano en ixas latituz.

Mapa de l'imperio atlante. De Atlantis: The Antediluvian World, de Ignatius Donnelly, 1882.

Cuantas hipotesis sobre a suya localización

Bi ha muitas posibles localizacions esmentatas dende l'antigüedat como simplas hipotesis ta la localización de l'Atlantida. S'han feito tantas especulacions con ixe nombre que s'ha convertito en un concepto chenerico, independient d'o relato platonico. Isto tien o suyo reflexo en que s'han proposato como ubicación d'ixa isla-continent muitos lugars que no son pas adintro de l'Oceano Atlantico.

Pocas encara son as hipotesis emparatas per eruditos u arqueologos, y muitas s'han feito per fisicos u mesmo investigadors pseudoscientificos. Muitas d'istas comparten belunas d'as caracteristicas d'o relato platonico, como garonas, remates d'esferra u mesmos periodos en o tiempo que lo recontato per Platón, pero denguna dica agora, s'ha contrimostrato que sía a verdadera Atlantida.

Teoría mediterrania

Anvista d'o volcán de Santorini.

A mayor parte d'as localizacions proposatas se troban en u cerca d'a mar Mediterrania: islas como Cerdenya, Sicilia, Creta y Santorini, Chipre u Malta; ciudaz-estato situatas en tierra firma como Troya u Tartessos, o Mont de Sinai u Canaán, son nomás bels eixemplos d'as muitas posibilidaz estudiatas en ista parti d'o mundo.

D'entre totas ixas posibilidaz, conta con un amplo numero de seguidors a hipotesi de Creta y Santorini. Dita teoría tien o suyo orichen en a erupción de Tera, escaicita en o sieglo XVII aC u XVI aC. Ista erupción provocó un gran tsunami que destruyó a civilización minoica establita en l'amanata isla de Creta, seguntes os expertos.

A.G.Galanapoulos afirmó que as datas que estableix Platón de 9.000 anyadas antis d'os tiempos de Solón, han de estar entenditas como 900 anyadas, per una error de translación, de seguras, en pasar o texto dende papiros hieroglificos a o griego. Iste error se estendilla tamién a la grandaria d'a isla que no sería allora una isla-continent sino que se trataría d'una isla mediterrania de grandaria meya: Creta, concretament.

Anvista de Fira, isla de Santorini, en l'alto d'a caldera esfaldata.

Teoría atlantica

A formación d'a tortuga ye una d'as muitas formacións extranyas trobatas en o fundo oceanico cerca d'a isla de Yonaguni en l'Oceano Pacifico.

A suya localización en l'oceano Atlantico permite estar fidel a lo relato platonico y, antimás, a lo nombre cheografico d'ixe oceano.

Bi ha cuantas hipotesis en relación con ista posibilidat: o norte d'Europa, como Suecia y a mar d'o Norte, Andalucía, Irlanda, as islas Canarias y Madeira, u mesmo as islas Azores, estando totas, alto u baixo, cerca d'as esmentatas Columnas d'as que Platón en charra.

Sindembargo, os estudios cheograficos detallatos d'o fundo oceanico d'istas islas no bi han trobato nunca evidencias historicas d'esferras escaicitas y tampoco de que istos fundos oceanicos haigan estato en bel momento recient tierra firme.

Belatros autors han proposato tamién, fendo parte d'as teorías atlanticas, as islas d'a mar Caribe, Cuba, as Bahamas u o Trianglo d'as Bermudas como posibles localizacions.

Atras teorías

Atras teorías proposatas per os autors son muito diversas: Beluns esfienden a teoría antarctica (destacando-ne Graham Hancock) entre que atros miran l'Atlantida en l'Pacifico (ronal de Yonaguni en Chapón) u en l'Oceano Indico (en as tierras submerchitas en Indonesia, Chava y Sumatra.

Vinclos externos

Se veigan as imáchens de Commons sobre l'Atlantida.

Datos: Q25373
Multimedia: Atlantis / Q25373