Cine

Iste articlo ye sobre o cine como industria; ta l'edificio ta prochectar-ie las cintas, se veiga Cine (edificio).

O cine u cinema, alcorzamiento de cinematografía, ye a tecnica que consiste en prochectar fotogramas de forma rapeda y succesiva (24 fotogramas por segundo) ta creyar a impresión de movimiento. A parola provién d'o griego κíνημα, -ατος (kínema, kinemátos) "movimiento" y γράφος (-gráfos), sufixo d'a radiz grafein "escribir, plasmar". Os empecipiallos d'o cine se remuntan a finals d'o sieglo XIX en Francia, cuan os chirmans Lumière filmoron a salida de treballadors d'una fabrica.

Como forma de rechistrar celebracions u de recontar historias, o cine ye un arte a lo que se gosa clamar seteno arte. A industria cinematografica s'ha convertiu en un negocio important en países como los Estaus Unius u la India.

Historia

O cine tal como ye conoixiu en l'actualidat tien os suyos inicios a finals d'o sieglo XIX con o cinetoscopio y o cinematografo d'Edison y d'os Lumière prencipalment, anque parixe que atros investigadors tamién facioron importants abances.

En os suyos inicios las cintas de cine yeran mudas, tenioron un gran exito cuasi a l'inte y rapidamente se popularizó per tot o mundo. A primera cinta se considera que fue exhibida o 28 d'aviento de 1895 cuan os chirmans Lumière prochectoron publicament a saldta de treballadors d'una fabrica francesa. A primera cinta sonora fue The Jazz Singer (O cantaire de jazz) en l'anyo 1927 y un anyo dimpués s'engueró la primera cinta fablada Lights of New York (Luces de Nueva York). Os primers intentos de filmar cine en color principiaron con o sistema Kinemacolor, dimpués en 1935 se filma a primera cinta en Technicolor, encara que la plenitut d'o cine en color no s'aconsiguió dica 1939 con a cinta, Gone with the Wind (cinta) (Ixo que o viento se levó).