Abrir menú principal
Bandera de Transilvania d'o Imperio Austro-hongaro
Mapa de Rumania con Transilvania resaltata en color amariella.

Transilvania (rumán: Ardeal u Transilvania, hongaro: Erdély) ye una rechión historica localizata en o centro de Rumanía, rodeyata por os Carpatos. A capital d'a rechión, Cluj-Napoca, ye situata en a meseta, mientres que Braşov y Sibiu, unas d'as principals ciudatz, son en o semontano d'os Cárpatos.

En a famosa novela de Bram Stoker, Transilvania yera d'on proveniba o Conte Dracula.

CheografíaEditar

A rechión ye una antiga cuenca sedimentaria terciaria plena (plataforma) y rodeyata de tot por os Carpatos meridionals, os Carpatos orientals y os Monts Apuseni ("Monts de Ponient" en rumán), cordeleras d'os Carpatos. As montanyas rodeyan a rechión como una parete y en qualques puestos avanzan ta o interior. Os principals ríos son Mureş y Târnava, afluents d'o Tisza y o río Olt, afluent d'o Danubio.

ToponimiaEditar

Encara que en rumán tamién se diga Transilvania este toponimo ye una composición latina culta que significa dezaga d'as selvas (a lo estilo d'o toponimo moncayín Trasmoz y de Trassierra, que no tienen -n- en o prefixo trans- porque son patrimonials en aragonés) y os rumans tamién la emplegan pero més en contextos de charrar con forans u escribir pa estar leitos por forans. Ardeal ye como gosan dicir-ne por un regular y fa referencia a un terreno ondulato con una sucesión de cabezos u pueyos (deal en rumán) que bi ha por tota a plataforma transilvana, que tien un modelato cheolochico pareixito a lo semontano pirenenco u d'o Baixo Aragón por estar tamién en una plataforma con sedimentos terciarios, n'este caso a plataforma de l'Ebro. Ardeal, Ar deal significa en rumán "aria de pueyos", "aria de cabezos". O toponimo hongaro Erdély se conecta con o rumán Ardeal, encara que os autors hongaros tiengan una interpretación como Erdõ-elve, "més allá d'a selva".

En alemán ye Siebenbürgen, fendo referencia a las siet ciudatz fortificatas u burgos medievals saxons més importants: Klausenburg (Cluj), Kronstadt (Braşov), Hermannstadt (Sibiu), Schässburg (Sighişoara), Mediasch (Mediaş), Mühlbach (Sebeş), e Bistritz (Bistriţa).

En serbio ye Transilvanija, en turco ye Erdel, en eslovaco ye Sedmohradsko u Transylvania y en polaco, Siedmiogród, talment reflectando que os saxons transilvans teneban relacions con os polacos.

Composición etnicaEditar

A población mayoritaria son os vlacos, que dende a formación d'o nacionalismo rumán y dimpués o estato de Rumanía s'autodenominan rumans. Bi ha una important minoría hongara, una minoría secul asimilata dende fa muito a os hongaros y una minoría huei muito redueita de saxons transilvans. Tamién bi ha chitans, que yeran nomadas y no teneban arias de poblamiento compacta, pero encomienzan a tener-ne. Tamién bi ha atras minorías pero no son numericament ni territorialment importants.