Abrir menú principal
Vlacos de Transilvania
Map-balkans-vlachs.png
Mapa d'os Balcans con as poblacions vlacas y rumanas; os arromans bi apareixen en rosa.
Rechions con comunidatz importants
Transilvania (Rumanía)
Idiomas
rumán
Relichión
Cristiana ortodoxa, Cristiana Greco-Catolica
Pueblos relacionatos
Pueblos vlacos

Os vlacos transilvans son os habitants de Transilvania (Rumanía) que tienen como luenga tradicional o rumán y son de relichión ortodoxa u greco-catolica. Encara que son a mayoría d'a población de Transilvania, en o pasato estioron sozmesos politica y socialment a la minoría hongara.

Contenius

Modo de vida tradicionalEditar

Bi ha agricultura sedentaria con cautivos como a panicera en a cuenca transilvana y ganadería transuant en o cabalto d'os Carpatos.

RelichiónEditar

A terminolochía cristiana dacorrumana més antiga ye d'orichen latín y occidental y no d'orichen griego u eslavo, o que indica que a cristianización d'os dacos y dacorromans se fació dende l'ueste.

Os vlacos transilvans encomenzoron a tener una influencia relichiosa bizantina por o menos dende o sieglo X, (enantes en podeban tener pero no ye demostrable), y baixo esta influencia esdevenioron cristians ortodoxos (u como dicen en os países vlacos pravoslavnici).

Os cristians vlacos enantes d'estar pravoslavians u greco ortodoxos por influencia d'os eslavos u Costantinoble debeban mantener un cristianismo tradicional d'os antigos romans (a l'egual que os udis d'o Caucaso manteneban un cristianismo tradicional sin clero). Este cristianismo debeba estar trasmeso tradicionalment més per leyendas que por a conoixencia d'a biblia. Os feitos d'os martirs (Sângeorz, Sânmedru), chunto con escayeiximientos y personaches tanto d'o nuevo testamento (Sântãmãria, Sâmpietru), como d'o viello (os santos) fuoron combinatos en una especie de mitolochía popular, con os santos esdevenindo como dioses con a mesma traza que en a mitolochía griega.

Os protestants preboron d'atrayer a los vlacos enta a suya reforma relichiosa, y os primers textos extensos en luenga rumana son textos protestants. Manimenos os vlacos continoron estando greco-ortodoxos.

En tiempos d'o dominio austriaco amaneixió a Ilesia d'Alba Iulia, greco-catolica, que seguindo o eixemplo d'a Ilesia Uniata Rutena, mantién o rito griego pero accepta l'autoridat d'o Papa de Roma. Paradochicament os sacerdotz se pueden casar en a ilesia uniata pero no en a ilesia catolica de rito occidental.

LuengaEditar

En o sur de Transilbania as parlas dacorrumanas se clasifican en o dacorrumán meridional en continación territorial con o dacorrumán d'Oltenia e Muntenia. En o centro y norte de Transilvania as parlas se clasifican en o dacorrumán septentrional chunto con as parlas moldavas.

En muitos puestos de Transilvania a c inizial de ce-, ci- no se leye ch como en rumán standard e italián e se leye x.

O dacorumán de Transilvania tien més influencia lexica ongara que atras parlas rumanas e menos influencia turca.

HistoriaEditar

Dimpués d'o fracaso d'o setio de Viena en 1683 os otomans encomienzan a reblar y os austriacos conquerirán Hongría y Transilvania. En o tractato de Karlowitz de 1699 os otomans renuncian a Transilvania ya de pa cutio. En o tractato de Passarowitz os otomans renuncian a lo Banato y a Oltenia, (Oltenia se reintegrará a Vlaquia en o tractato de Belgrado de 1739).

A Transilvania adhibita los dominios d'os Habsburgo conserva a suya dieta con seu en Cluj y dominata por a nobleza hongara. En 1698 se creya a Ilesia Uniata d'Alba Iulia y o metropolitán d'Alba Iulia reconoix l'autoridat d'o Papa. En 1794 os vlacos se sublevan a los hongaros.

O 14 de mayo de 1848 bi ha una asambleya de notables en un prato de Blac, “o campo d'a libertat”, con os bispes ortodoxo y uniata y aprueban una propuesta pa solicitar a organización d'una nación rumana, una autonomía relichiosa pa os ortodoxos (que dependeban d'o metropolitán serbio de Karlowitz), un estatuto especial pa Transilvania y diferents libertatz. Adrezan esta demanda a la dieta de Cluj y a lo Emperador pero no lis contestan y o 29 de mayo a dieta decide a incorporación de Transilvania a Hongría.

En octubre de 1848 os campesins vlacos s'organizan en lechions con l'aduya d'o exercito imperial pa combatir a los nobles hongaros. Bi ha combates entre chinero y chulio de 1849 y a la fin os hongaros entran en Sibiu.

En 1863 os vlacos de Transilvania ya pueden esleyir representants en a dieta de Cluj. O compromís austrongaro de 1867 posa fin a l'autonomía de Transilvania y, dende 1875, o gobierno de Budapest imposa una politica de maguiarización. En 1884 se funda en Sibiu o partito nacional rumán, pero ye prohibito en ixe mesmo anyo. En 1905 torna a tener actividat. En 1868 a Ilesia Ortodoxa rumana pasa a estar autocefala con un metropolitán con seu en Sibiu.

O 27 d'agosto de 1916 Rumanía (que alavez no yera que a suma de Vlaquia y Moldavia) declara a guerra a lo Imperio Austro-Hongaro, con a intención d'adhibir a lo territorio rumán Transilvania con una muga occidental en a linia Debrecen-Szeged promesa por as potencias aliatas. As tropas rumanas invaden Transilvania y prenen Braşov. A población hongara fuye, pero dimpués en septiembre as tropas rumanas son as que s'ha de retirar acompanyatos de 80.000 vlacos de Transilvania, y ha d'acceptar a perduga en a guerra por l'armisticio d'o 9 d'aviento de 1917 de Focşani y o tractato de Bucarest d'o 7 de mayo de 1918.

Manimenos l'armisticio de Villa Giusti d'o 3 de noviembre de 1918 fa que o Imperio Austro-Hongaro s'esboldregue, y esto lo aproveita o gobierno rumán pa atacar o 10 de noviembre a Hongría. O día 15 de noviembre as tropas rumanas entran en Transilvania. O 1 d'aviento representants d'os vlacos de Transilvania y d'Hongría s'aplegan en Alba Iulia, se constituyen en asambleya y esleyen un gran consello nacional que o día 14 demanda a unión con Rumanía. Os saxons se i apegan o 8 de chinero de 1919. O día 24 o Parlamento de Bucarest ratifica totas as decisions d'a unión. Amaneix o problema d'a muga con Hongría y o Reino d'os Serbios, Crovates y Eslovens.

A formación en Budapest d'o gobierno comunista de Bela Kun en marzo de 1919 se fació servir d'enchaquia pa que Rumanía intervenise en Hongría en abril. Bela Kun abandonó o poder o 1 d'agosto y os rumans ocuporon Budapest o día 3, y no se'n fue dica o día 15 de noviembre. Por o tractato de Trianón d'o 4 de chunio de 1920 Hongría ha de ceder a Rumanía tota Transilvania y a més a metat d'o Banato y una ampla faixa de territorio d'Hongría mugant con Transilvania de mayoría rumana dito por os rumans Crişana y on son as ciudatz de Arad, Oradea y Satu Mare.

O 15 de chunio Hitler planteya a qüestión de Transilvania. En o segundo arbitrache chermano-italián de Viena (30 d'agosto de 1940) Rumanía ha de ceder a Hongría o norte de Transilvania. Os hongaros fan campanyas de limpieza etnica en os territorios que controlan, fendo mortaleras con a población rumana. Manimenos soldatos rumans de Transilvania d'o norte combaten en o exercito hongaro en o frent oriental.

O 23 d'agosto de 1944 un golpe d'estato en Rumanía fa que o rei Miguel prenga o poder, y declara a guerra a Alemanya y Hongría. O exercito rumán combate chunto con o exercito royo sovietico en Transilvania, que ye reconquiesta en octubre y dimpués en Hongría y Eslovaquia. O tractato de París de 1947 confirma a recuperación de Transilvania d'o norte.

En o rechimen comunista que siguió a la segunda guerra mundial s'ha feito menor a presencia d'a población y a cultura hongara con a supresión de l'autonomía d'a rechión hongara en 1968, con a venita de rumans d'atras partz de Rumanía y una prebatina de concentración parcelaria a fins d'a decada de 1980. En a Transilvania postcomunista bi ha habito tensions politicas entre os rumans u vlacos y a minoría hongara, y en chulio de 1993 se produció un alcuerde entre as autoridatz y os representants d'os hongaros de Rumanía.