Reino visigodo de Tolosa

(Reendrezato dende Reino Visigodo de Tolosa)

Lo reino visigodo de Tolosa estió un estau dirichiu por los visigodos que existió dende l'anyo 475 (formalment dende l'anyo 476) dica la derrota en la batalla de Vouillé en l'anyo 507.

Reino visigodo de Tolosa
Labarum.svg 475 — 507 3by2white.svg
Situación de
Mapa de lo reino visigodo de Tolosa
Capital Tolosa
Idioma oficial Latín
Gubierno Monarquía
Rei
 • 475-484
 • 484507

Eurico
Alarico II
Periodo historico Edat Meya
 • Creyación 475
 • Batalla de Vouillé 507

Reinau d'EuricoEditar

En l'anyo 476 lo rei de los visigodos Eurico, que ya podeba considerar-se independient dende l'anyo 475, dominaba las provincias Narbonense Prima, Viennense, Narbonense Secunca (Provenza) y Aquitania Prima (Auvernia y Berry), y lo pueblo visigodo yera asentau dende l'anyo 418, nominalment como foederati en las provincias de Novempopulania y Aquitania Secunda. La suya capital yera Tolosa. Los visigodos heban iu estendillando o suyo poder. En l'anyo 457 dominaban probablement las provincias de Novempopulania y Aquitania Secunda. En 462 ya dominaban la totalidat de la provincia Narbonense Prima; en 466 dominaban la provincia d'Aquitania Prima; enta l'anyo 470 dominoron la Viennense y la Narbonense Secunda y en l'anyo 475 lis reconoixioron estas posesions y la suya independencia de feito.

Provincias como la Tarraconense, que disposaban d'una independencia de facto, con febles vinclos con lo Imperio, pasoron a autogobernar-se en 476.

En 478 Eurico y los visigodos combatioron contra los burgundios en l'Ardèche, y més tarde (481 a 484) ocuporon la resta de Provenza incluyendo Arles y Marsiella.

No se sabe de tot en que anyo Eurico fació la resta de las conquiestas, pero sabemos que enta l'anyo 480, antes de 481, lo conte godo Gauterico, ninviau por Eurico, trescruzó los Pireneus y ocupó Pamplona y Zaragoza. Por la mesma epoca Eurico ninvió una expedición a lo comandamiento de lo conte Eldefred enta la parte costera de la Tarraconense (se discute quala d'ellas estió primero, encara que por un regular se creya que estió la dirichida por Eldefred). La conquiesta de la Cartachinense, Lusitanica y Betica no son documentadas.

Esta expedición enta la Tarraconense contó con la colaboración de lo cheneral román Vicencio, que no se sabe si yera un cheneral que heba pasau a lo servicio d'Eurico u yera lo gobernador melitar provincial román de la Tarraconense u d'atra provincia d'Hispania (en las cronicas lo titulan Dux Hispaniae). Eurico habió de valer-se de la colaboración d'un cheneral román (como dirichent melitar u como aliau politico) pa asegurar-se la sumisión de los hispano-romans de la Tarraconense, a on que pareix que trobó resistencia, probablement dende los grans propietarios hispano-romans oposaus a ceder dos tercios de la tierra a los visigodos d'alcuerdo con la lei de la hospitalitas modificada por los visigodos (d'un tercio pasaba a dos tercios). Sí se sabe que Tarraco, la capital provincial, habió de ser asitiada y presa violentament, encomenzando dimpués la suya decadencia definitiva en beneficio de Barcino (Barcelona), decadencia completada anyos dimpués por los musulmans.

Manimenos pareixe que Gauterico no trobó resistencia, debant lo temor que un nuevo vuido de poder provocás un nuevo periodo d'achitación pareixiu a la bagaudia de pocas anyadas antes, u d'incursions de los salvaches montanyeses.

No se sabe si tota a provincia Tarraconense se sozmetió con rapideza (con la mencionada resistencia en Tarraco y talment en bell atras zonas), pero lo feito cierto ye que en l'anyo 506 escara se luitaba pa ocupar Tortosa. No se sabe si fue presa inicialment Tortosa y dimpués se rebeló con enchaquia de lo repartimiento de tierras, u por contra la resistencia de los hispano-romans fue desplazando-se enta o sud, buscando como defensa l'Ebro. Dirichiba la resistencia un hispano-román dito Pero, a qui li atorgan o títol de tiranus (tirán, ye dicir, qui se titula rei sin títol legal pa estar-ne), y esta titulación suchiere que Pero s'habría proclamau sobirán con enchaquia de la extinción de lo Imperio y antes de la entrada de los visigodos (y en tot caso habría succediu a un emperador u linia d'emperadors proclamaus en la Tarraconense dende ixa calendata), encara que no sabemos si se proclamó solo que en la redolada de Tortosa u las suyas pretensions abrazaban tota la provincia, estando la mencionada ciudat lo suyo zaguer bastión. Pero fue venciu y muerto en l'anyo 506 y la ciudat de Tortosa ocupada, con lo que los visigodos dominaban ya tota la Tarraconense.

Gauterico conquirió la Tarraconense oriental y probablement arribó en la Lusitania, que se suposa que yera disputata tamién por los suebos, y que amenazaban la retaguardia visigoda por las calzadas romanas que iban dende Braga a Cesaraugusta (continando enta Tarraco) pasando por Asturica, Virovesca, Tritium, Vareia y Calagurris, y por la que iba dende Ocelum Durii dica Cesaraugusta pasando por Abucella, Clunia, Uxama, Turiasso y Belsione u Belsinum u Balsio, seguindo en termins chenerals la linia de lo Duero. Probablement entre lo 480 u 481 y lo 490 la zona central d'Hispania yera disputada por los visigodos y los suebos, conseguindo los primers un dominio inestable. Pareixe que los visigodos atacoron sin trobar guaire resistencia y podioron dominar tota la Cartachinense antes de lo 483, y tamién tota u part de Lusitania. Lo 483 lo visigodo Salla y lo bispe de Merida Zenón reconstruyoron un puent román sobre lo Guadiana en la ciudat de Merida (Emerita Augusta), capital provincial de Lusitania (que con Requiario heba estau la capital de lo reino de los suebos), de seguro dimpués d'un periodo de luitas entre visigodos y suebos, de bandidache y de gubierno poco eficaz de los propietarios locals; esta inauguración demostraría que lo dominio visigodo quedaba bien asentau, y que talment no yera mal acolliu por la población. Lo dominio visigodo en la Betica por ixa mesma epoca no ye seguro y no ye documentau.

Simultaniament (periodo 476-510, encara la mas gran part de la emigración arribó entre l'anyo 490 y l'anyo 510), un numero relativament important de visigodos colonizó las tierras entre lo Tacho y lo Duero, y en la muga de Galicia, (en poder de los suebos), y la val d'Ebro. En esta rechión s'han excavau numerosas necropolis godas y probablement lo porcentache de población goda estió més alto que en las atras tierras de la peninsula iberica.

Reinau d'Alarico IIEditar

Eurico murió lo setiembre de 484 y lo sucedió lo suyo fillo Alarico II.

En l'anyo 486 los francos de Clodoveu I ocuporon los dominios de Siagrio en la parte norte de la Galia. Siagrio se refuchió en Tolosa, pero Alarico II lo entregó a los francos y lo executoron. Los visigodos y francos esdevinioron vicins. Lo dominio visigodo d'Hispania en las provincias Cartachinesa y Lusitanica se consolidó en tiempos d'Alarico, no ye seguro o grau de dominio en la Betica. Talment por prebar de consolidar lo dominio en Hispania Alarico consideraría imprudent esfender a Siagrio y luitar contra los francos.

Pa esfender las zonas conquiestas en l'occident de la Tarraconense y la Cartachinesa a man de los suebos, se trasladoron colonos visigodos dende Galia, y se creyoron muitos asentamientos en la rechión que han dixau senyal arqueolochico en forma de necropolis. Lo Cronicón Cesaraugustán sitúa una gran emigración de godos en la zaguera decada de lo sieglo, y lo feito ye confirmau por las excavacions realizadas en tota una gran aria entre Pamplona, o naixedero de lo Tacho, Carpio de Tajo y la Tierra de Campos.

Precisament la comarca de la tierra de Campos, a l'ueste de lo río Pisuerga, recibe lo suyo nombre de lo nombre que levó antigament: Campi Gothorum ("Campo de los godos"). La practica totalidat de la emigración s'establió a l'atra marguin d'Ebro. Estos asentamientos habría amaneixiu doncas entre lo 490 y l'anyo 500, asegurando tota la zona buegant con lo reino de los suebos, mientras las fuerzas visigodas adrezaban la suya actividat enta la Lusitania y la Betica.

En 489 Zenón cedió lo Imperio Román d'Occident a los ostrogodos, que amenazaban lo Imperio Román d'Orient, y mesmo li cedió lo títol churidico d'emperador.

Teodorico adrezó las suyas fuerzas contra Dalmacia, que fue ocupada en l'anyo 489 y entró en Italia en l'anyo 490 vencendo a Odoacro y los herulos en la ripa de lo Soncio, a man de Verona, y por segunda vegada en la ripa de lo río Adda. Teodorico entró en Pavia, a on que fue atacau por los herulos d'Odoacro en l'anyo 490, qui asitió la ciudat. De seguro que los asitiadors habrían exterminau a los ostrogodos si lo visigodo Alarico II no bi hese interveniu. La intervención d'Alarico II obligó a Odoacro a retirar-se enta Ravenna (agosto de l'anyo 493) a on que quedó asitiau por Teodorico mientres tres anyadas (490-493). A principios de l'anyo 493, Odoacro y Teodorico plegoron a un alcuerde, pactando un reparto de lo poder. Teodorico entró en Ravenna lo 27 de febrero y encomenzó una epoca de gobierno conchunto que remató en pocos días con l'asasinau d'Odoacro a principios de marzo a mans d'o mesmo Teodorico, qui tamién fació matar a la familia de lo rei herulo, y ordenó por sorpresa fer una mortalera de las tropas herulas. Teodorico ya no asumió lo títol d'emperador y probablement en pago de l'aduya de los visigodos, la filla de Teodorico, Tiudigota, se casó con Alarico II (entre l'anyo 490 y l'anyo 495 aproximadament, naxendo-ne un fillo dito Amalarico.

La tensión entre visigodos y francos yera creixient y evident en l'anyo 504. Teodorico lo gran, rei de los ostrogodos fació de mediador entre lo franco Clodoveu y lo visigodo Alarico II pa evitar una guerra, conseguindo que los dos reis s'entrevistasen en una isla de la Loira cerca d'Amboise. La Loira yera la muga entre los dos reinos. S'evitó la guerra pero la tensión no disminuyó.

Clodoveu fació liga con lo rei burgundio Gundebald, que yera arrián como Alarico II. A la fin la guerra esclató y remató con la batalla de Vouillé, cerca de Piteus en l'anyo 507, batalla en la que Alarico II fue redotau y muerto. Los francos y burgundios abanzoron enta los dominios de los visigodos, pero l'ostrogodo Teodorico ninvió fuerzas baixo o cheneral Ibbas que ocuporon Provenza, impedindo que la ocupasen los burgundios, que ya bi heban entrau. Los burgundios fuoron redotaus en lo río Durance. Dende la Provenza lo cheneral Ibbas entró en la Narbonense u Septimania, en la que los francos y visigodos yeran luitando furament, especialment en la redolada de Narbona (508).

En l'anyo 508 los ostrogodos descubrioron vivindo entre los visigodos a un noble dito Eutarico, que se creye que yera descendient dreito (nieto u bisnieto) de lo rei ostrogodo Viderico, de la linia lechitima de la dinastía reyal ostrogoda de los Amalos. Eutarico recibió la man de la princesa Amalasunta, filla de Teodorico.

Dimpués de la perda de Tolosa, la capital visigoda pasó a Barcelona y dimpués Toledo, encomenzando atra etapa en la historia de los visigodos, la de lo reino visigodo de Toledo.

Mencions en fuents aragonesasEditar

Se fa mención breument en la Cronica de Sant Chuan de la Penya de lo periodo en lo que los visigodos teneban lo suyo centro politico en Tolosa, como federaus de los romans u como pueblo con un reino independient:

Et depues de aquesti Valient; et en tiempo de aquesti los godos tenyan lur senorya mayor en Tolosa. Et aquesti rey prendió las tierras de Bética et de Galicia, las quales tenían los vándalos et los alanos; et depues de aquesti Goodorenus; et depues su filio Turison; et depues su hermano Trodoricho. Et depues de aquesti regnó su hermano Euricho. Et aquesti prese en España la prouincia de Tarragona, et depues de aquesti regnó su fillo Alarico.