Bagaudas

Los bagaudas (bagaudae en latín) estioron bandas armadas d'esclavos, soldaus deshertors, bandolers y labradors sin tierra qui saqueyaban lo norueste de la Galia en los sieglos III y IV. La presión de la fiscalidat romana chunto con un empobrecimiento causau por lo enfriamiento de lo clima y los pillaches de las primeras invasions barbaras pareixen estar, pa la mes gran part ixos hombres, lo motivo de querer vivir de la rapinya. Lo nombre bagauda deriva d'una palabra gala cognata de lo bretón bagad (tropa, tropel, colla, rabera). Ciertos bagaudas se dotoron d'una organización politico-militar. Plegoron a ocupar dos cinquenas partz de Galia en lur mes gran extensión, sobre tot en lo norueste. Lo fenomeno s'estendilló tamién a lo sud de los Pireneus arribando en la Hispania Tarraconense, especialment por lo territorio habitau por los vascons.

Pillards gaulois por Évariste-Vital Luminais. Museu de la sociedat historica y arqueolochica de Langres.

Ye un fenomeno social paralelo a las usurpacions contemporanias que pareixen igualment la conseqüencia de problemas socials y de l'achitación politica de la epoca, mesmo si no afectan a las mesmas clases socials. Por eixemplo, en l'anyo 281 los habitants de Lugdunum refirmoron la usurpación de Proculo, rico terratenient qui armó los suyos 2.0000 esclavos pero que fuyió quan las lechions imperials s'amanoron.

Bagaudas en Hispania

Lo bispe galaico Hidacio consignó quatre intes d'actividat de bagaudas en la Hispania Tarraconense. Lo gobierno román ninvió a la Tarraconense dos exercitos contra los bagaudas, primero en l'anyo 441 baixo lo mando d'Asterio, y dimpués en l'anyo 443 baixo lo mando de Merobaudes. Encara que Hidacio comente que las campanyas estioron exitosas pa los romans seis anyadas dimpués tornaba a haber-ie actividat de bagaudas en la val d'Ebro.

En l'anyo 449 los bagaudas teneban un lider dito Basilio y atacoron Tarazona, facioron una mortalera con la guarnición visigoda de Tarazona, y matoron tamién a lo bispe local León. Poco dimpués los bagaudas unioron fuerzas con los suebos y atacoron Caesaraugusta y prenioron Leida.

Una revuelta bagauda fue esclafada en la Hispania Tarraconense en l'anyo 454 por los visigodos por orden de las autoridatz romanas ex auctoritate romana. La tropa yera baixo lo mando de Frederico, chirmán de Teodorico II, sin que bi haiga contancia d'intervención de garra oficial román. Ye en esta campanya quan los visigodos encomienzan a tener una presencia decisiva en la val d'Ebro como una fuerza militar capable de sustituir a los romans en lo control de lo territorio.

Zaguers bagaudas en Galia

En l'anyo 448 atros bagaudas son dirichius por un medico dito Eudoxo en lo centro de Galia. Derrotau, trobó refuchio entre los hunnos d'Atila.

Un texto de 638 relativo a Saint-Maur-des-Fossés, en la rechión parisina, menciona un reducto de bagaudas en la localidat.

Un boulevard des Bagaudes existe entre las comunas de Saint-Maur-des-Fossés y de Joinville-le-Pont (Val-de-Marne); la placa leva la meción de "pueblo galo".