Río Usía

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Usía
Administración
País	Aragón
Municipios por a on pasa	A Foradada d'o Toscar y a Fueva
Cheografía
Longaria	21 km
Altaria d'o naixedero	±1050 m
Naixedero	Sierra d'o Campanué, as Corz
Desembocadura	Entibo de Mediano a man de o Lumo de Muro
Mapa
Usía en Aragón

O río Usía u barranco d'a Usía ye un río chicot u barranco d'o sud-este d'a comarca de Sobrarbe, en a Fueva, que ye afluent d'o río Cinca por a man ezquierda. Naixe en os arredols de o puerto de Foradada, en a baixant fovana d'a sierra d'o Campanué (anque a dintro d'o termin municipal de a Foradada d'o Toscar), no guaire luent d'as aldeyas de as Corz y Ranyín, y desemboca en a Cinca en l'entibo de Mediano, a man d'o Lumo de Muro y d'Arasanz.

Traviesa a cabecera d'a Fueva, que ye Tierrantona, y esnaviesa por a fondonada que ye a dita subcomarca, por terrenos de cantimplano en os que no i hai guaire inclinación, anque sin serpenteyar. Tiene gleras en cualques puntos, anque no ye un río guaire propenso a sufrir mayencos, y en a mayor parte d'o suyo recorrido no i hai si que tansas espuendas prou altas como ta contener-lo, presentando-se os campos a poqueta altaria por d'encima d'a glera.

Dende o Lumo de Muro, o río se torna a encaixonar en un congosto por os calcils d'a sierra de Muro de Roda en a man dreita, y d'a sierra de l'Entremont en a ezquierda, dica que se torna a obrir boca enta la val d'a Cinca a bel kilometro y meyo en sud d'Arasanz. A desembocadura se situaba a man de Mediano Viello, pero con a construcción de l'entibo en as zaguerías d'a decada de 1960, ixe endreto se cacegó mismo que Mediano, y en l'actualidat desemboca bels centenars de metros mas enta l'alto (cuan l'entibo ye altero, encara a dintro d'o congosto gosa desembocar).

Se veiga tamién

• Río Formigals.
• Río d'a Nata.
• Barranco d'o Salinar.
• A Fueva.

• Datos: Q9072197