Mercurio (mitolochía)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Mercurio (en latín Mercurius) yera, en a mitolochía romana, un important dios d'o comercio, fillo de Chupiter y de Maia Maiestas. O suyo nombre ye relacionau con a parola latina merx ("mercadería"). En as suyas formas mas primitivas pareixe haber estau relacionau con a deidat etrusca Turms, pero a mayoría d'as suyas caracteristicas y mitolochía fue amprada d'o dios griego analogo Hermes. O día d'a semana dedicau a Mercurio u Dies Mercurii ye o tercero, y se convertió en mierques en aragonés benasqués, una d'as pocas variants de l'aragonés que conserva as denominacions d'os días d'a semana.

Mercurio, por o escultor flamenco d'o sieglo XVII Artus Quellinus, facilment identificable por o petaso, a bolsa con cordels, o caduceu, as sandalias con alas, o gallo y a craba (Seu d'o concello d'Amsterdam, actualment en o Palacio Reyal).

En a interpretatio romana o dios Lug d'o panteón celta fue asimilau a Mercurio, y d'esta traza o Mercurio galo ye en a mes gran part d'os casos simplament Lug. O dios Wōdanaz (Odín u Wodan) d'as mitolochías chermanicas fue asimilau a Mercurio tamién por estar polifacetico, d'astí que o miércols se diga en luengas chermanicas día de Wōdanaz.

Mercurio ha inspirau o nombre de cuantas cosetas en cierto numero de campos cientificos, como a planeta Mercurio, l'elemento mercurio y la planta mercurial. a parola «mercurial» s'usa comunament ta aludir a bella cosa u belún erratico, volatil u inestable, y deriva d'os rapidos vuelos de Mercurio d'un puesto a unatro.

Mercurio en fuents aragonesas

Mercurio ha deixau senyal toponimico en l'Alto Aragón como Marcuello, tamién present como apelliu.

Pocos son os textos medievals aragoneses on se mencione a lo dios Mercurio. Figura en a traducción aragonesa de "Vidas Semblants":

los p(ro)moujan en honor / & nodria(n) el desiderio d(e)los Jouen(e)s enlas luchas / et por esto ap(ro)p(r)iaro(n) aq(ue)lla Ciudat ala dea q(ue) es nacida d(e) m(er)curio / & de uenus

A mención en a traducción aragonesa d'o "Breviarium ab Urbe condita" ye intresant porque ilustra a interpretatio romana aplicada a dioses chermanicos:

Recuenta antigüidat vna fabla la cual no es Res quelos vandalos acostantes se agodan aq(ue)sti es qui es enues los Romanos mercurio et es adorat de dios por todas las gens de germania / et demandaron victoria...