Abrir menú principal

Un ligallo ye una agrupación local de pastors. En Aragón no i heba una organización cheneral controlata por la Corona como la Mesta en Castiella.

DenominacionsEditar

Lo termin ligallo s'emplegaba en Calatayú, Teruel, Gúdar, Íxar y muitos atros lugars, y en parte encara s'emplega; en Zaragoza, Taust u Exeya d'os Caballers se deciba Casa de Ganaderos de Zaragoza; en Letux, Cofradía de Pastores; En Albarrazín feban servir os termins Ligallo y Mesta chuntos Ligallo o Mesta dica o sieglo XVI, dimpués facioron servir només Mesta. Tamién en o sieglo XVI s'escribiba Ligallo en Íxar como amuestra que en 1564 Juan Francisco Cristóbal y Fernández de Heredia, o tercer duque d'Íxar, atorgó un mandamiento en o que se puet leyer "ligallo o mesta" y ligallalmente:[1]

pa el remedio de lo qual los lugares bien regidos y gobernados tienen sus hordinaciones mediante las quales que se suelen llamar del ligallo o mesta se gobierna por tanto Elats attendidas las cossas sobredichas y otras que para esto legittimanente nos mueben debaixo del mesmo nombre de ligallo faremos y hordenamos para la ntra. Villa de Íxar parroquia e lugar de Urrea y sus términos y que tendrá en dichos pueblos y términos y en el sitio y territorio de aqllos. ganados algunos de lana o de cabrío masclos o fembras que los criarán tendrán, comprarán, o benderán o en otra cualquiere manera las hordinaciones ligallalmente y estatutos

A reunión anyal tanto de ganaders como de lurs pastors pa tratar afers ganaders se deciba día de ligallo. Las Ordinacions de la Confrairía de Ganaders de la ciudat de Zaragoza establiban que lo día d'esta reunión fuese tercer dimpués de la Pascua de Resurrección. Un consello permanent presidiba estas reunions y cada anyo se leyeban las ordinacions, sorteyaban oficios, pagaban a los pastors, que yeran obligatos a ir-ie y heban de dar cuenta de las reses que cusiraban, baixo multa en caso de no fer-lo asinas.

La palabra ha deixato senyal toponimico, por eixemplo los puestos por on pasaba lo bestiar se diciban pasos de ligallo.

En Camarles (Baixo Ebro) bi ha dos vicos con nombre de Lligallo, Lligallo del Gànguil y Lligallo del Roig. En lo subdialecto tortosín de los Puertos de Bezeit, Puertos de Moriella y comarca de lo Matarranya s'emplega la palabra lligallo por tener contactos historicos con pastors teruelanos y baixoaragoneses, que en o sieglo XX encara emplegaban ligallo (en Íxar ligallo coexistiba con ligajo). Tamién podeba influir que i hese rotas transuants dende o Sistema Iberico ta lo Delta de l'Ebro y costas de Castellón. En Bezeit i heba un lligallo de pastors y atro de colmeners.

En Moriella la institución de lo Ligallo existe por lo menos dende 1271 con este nombre, y la estituyó Chaime I:

per nos et nostros concedimus vobis, consilio Morelle et universis hominibus aldearum et locorum omnium terminorum eiusdem, tam nostris scilicet quam ordinumque militum quorumlibet imperpetuum, quod possitis facere ligallum in termino Morelle.
Statuentes etiam quod illud ganatum "mostrench" sive amissum, quod in dito ligallo invenietur, reddatur domino cuius fuerit libere et sine impedimento.

ReferenciasEditar

  1. Mariano Laborda Recuerdos de Híjar. Editato por o Centro de Iniciativas Turísticas del Cuadro Artístito de Híjar, 1980