Ostsiedlung
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Ostsiedlung ye como se diz en alemán a colonización d'Europa Centro-Oriental en a Edat Meya con población alemana.
A colonización alemana en Europa Central y Oriental estió un movimiento migratorio con colonización agricola de territorios a l'este d'o río Elba que enantes yeran ocupatos por eslaus. Tenió como consecuencias una penetración cultural alemana enta l'este y que os eslaus s'adhibisen en a nueva sociedat y economía alemana. A demografía y producción d'alimentos s'incrementoron, plegando a quintuplicar-se en bels casos. O comercio, que dica o sieglo XII se trobaba en mans d'eslaus y escandinavos, pasa en grant parte a estar una exclusiva d'os alemans, (en 1158 ye fundato Lübeck) que tienen mayor naus y mes rapidas (ye tipica a carabela hanseatica d'os sieglo XIII-XV). Tamién s'introducen as formas churidicas, economicas y políticas chermanicas en os territorios eslaus.
Antecedents
editarUna ondata colonizadora encomenzó en o sieglo XI gracias a lo proceso de recuperación de l'agricultura encomenzato en o norte de Francia basato en un nuevo sistema de cautivo por amelgas trienals (rotación de cullita d'hibierno, cullita de verano y uebra). En l'aria francesa se repobloron territorios devastatos por as guerras y en l'Imperio se procede a tallar as selvas, a xartigar y a desecar rechions paulencas.
Este sistema fa que aumente a producción cerealista y un cautivo mes remunerador que o d'as amelgas bienals. Se produce tamién un milloramiento d'as tecnicas agrarias:
- L'aladro se perfecciona y pasa a estar un aladro de fierro.
- A dalla prene a suya forma actual.
- S'estendilla o uso d'o trillo.
- O gran se muele en molins d'augua, y dende o sieglo XII en molins de viento.
- O caballo substituye a lo buei como bestia de tiro.
A intensificación de l'agricultura va acompanyata d'una mayor oferta de productos alimenticios. Aumenta considerablement o numero de naixencias. Cuan a ondata colonizadera plegó a lo Sacro Imperio a población creixe tanto que en o sieglo XII plega a un nivel pareixito a lo de Francia. As aldeyas se converten en villas mes grans y compactas, tamién as ciudaz creixen en demografía y extensión, intensificando-se-ie a vida economica, ixo trai a elevación d'o precio d'os productos agricolas.
Desembolique historico d'a primera fase en o sieglo XII
editarEn 1125-1137 l'emperador Lotario de Suplinburgo empenta o movimiento expansionista enta l'este, por enchaquias misioneras de cheopoliticas. Estableix en os territorios de l'este a sinyors feudals encargatos de levar a cabo os suyos obchectivos.
- Os Schauenburg: con Adolfo de Schauenburg en o condau de Holnstein ya en 1110.
- Os Wettin: con Conrado de Wettin en 1123 ya en a Marca de Meissen y en 1136 tamién en a Marca de Lusacia.
- Os Ascanios: dende 1134 con Alberto l'Onso, (conte de Bauenstedt y markgraf de Brandenburgo dende 1150), en a Marca d'o Norte (Marca Antiga).
Henric lo Lión sozmete a lo prencipe Privislau en 1167 y consigue l'homenache d'o duque de Pomerania, encara que en 1178-1180 pierde os territorios de l'este en os procesos debant d'o tribunal palacín y d'o tribunal d'os prencipes.
Quedan d'esta traza margraviatos fundatos por saxons (Misnia, Brandenburgo) y entidaz políticas dirichitas por eslaus cristianizatos (Meklemburgo, baixo a dinastía obrodita de Privislau y Pomerania baixo os Boguslavidas).
Os sinyors feudals saxons de Misnia y Brandemburgo y os principes eslaus de Pomerania, Silesia, Bohemia, Moravia, asinas como a nobleza y lo clero locals favoreixen o establimiento de campesins y ciudadans alemans en as suyas arias de churisdicción. As mugas tradicionals de l'imperio (Elba-Saale-Selva Herzinica) quedan desbordatos y a ondata migratoria s'extendilla produndament en dirección norte y nord-este.
Tamién resulta important o papel d'as órdens relichiosas (agostins, de Cistels, de Prémontré) y militars (caballers teutonicos, hespitalers) en a obra colonizadora: hespitals, beneficiencia, administración.
O establimiento de colons alemans se fa de diferents trazas:
- En lugars fundatos por sinyors alemans seguindo un plan cheneral, situatos a lo largo d'as vías de comunicación, chunto a pratos, selvas u terrenos cautivables, a repartición de tierras se fa en parcelas d'igual extensión pa toz os colons, distribuitas en bloques u franchas, se fan servir bomo unidaz de mesura a yeuguata franca (24 ha) a yeuguata flamenca (16,8 ha). A dirección yera asumita por un empresario que recibiba a cambeo d'o suyo treballo o cargo d'alcalde hereditario. Cada nuclio urbán teneba una ilesia propia con un beneficio (widmut) de 1-4 yeuguatas. Como compensación por deixar a suya tierra y por a labor acomandata os colons milloran a suya posición social: pueden adquirir biens en propiedat y lis ne reconoixen o dreito de trasmisión, a soben contra l'abono d'un impuesto en diners u especie. Ixe dreito de trasmisión ye indivisible.
- En ciudaz fundatas y construitas por sinyors feudals eslaus que tienen una churisdicción y administración autonomas y dreito de fortificación. Estas ciudaz son prochectatas con una estructura en tablero d'aixedrez, con a plaza d'o mercato en o centro, y se creyaban en comarcas (gaue) eslavas. Son gobernatas por una bailía. Os habitants se richen d'alcuerdo con o dreito chermanico: dreito de Magdeburgo y derivatos: de Lübeck, sudchermán, etc, que ye concedido como privilechio.
- En comunidaz rurals y urbanas que ya existiban, en as cuals os colons alemans tienen un dreito particular, que dimpués dica s'extendillaba a los habitants eslaus.
- En colonias eslavas de tot en as que s'adopta o dreito chermanico, a vegatas con alteracions claras, como ye o caso d'as rechions orientals de Polonia, Lituania, Ucraina y Belarrusia.
Desembolique historico d'a segunda fase en o sieglo XIII
editarEn o sieglo XIII encomienza una nueva ondata colonizadora partindo d'as antigas colonias ascanias.
En 1201-1238 o duque Henric I y os suyos succesors, os bispes de Breslau y os duques d'Oppeln colonizan Silesia creyando asentamientos en a marguin dreita de l'Oder.
En 1200-1250 o prencipe Henric Burvy y os suyos fillos estableixen colons en Meclemburgo (Rostock 1218, Wisrnar 1229, Stralsund 1234).
En 1253-1278 o rei Ottokar II de Bohemia funda en o suyo reino mes de 60 ciudaz alemanas.
En o sieglo XIV remata o movimiento d'expansión enta l'este: mancan hombres pa la colonización, a población rural emigra t'as ciudaz.
Bibliografía
editar- José-Ramón Julià et al: Atlas de historia univerdal. Tomo I De los orígenes a las crisis del siglo XVII. Editorial Planeta.
- Hermann Kinder y Werner Hilgemann: Atlas histórico mundial. Ediciones Itsmo.
|
|||||||||
