Equus hemionus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Esta pachina trata sobre l'onagre que ye un équido salvache d'Asia. Ta veyer l'arma de setios medieval, se veiga Onagre (catapulta).

Onagre
Equus hemionus
Estato de conservación
Vulnerable.
Clasificación scientifica
Dominio: Eukaryota Reino: Animalia Filo: Chordata Clase: Mammalia Orden: Perissodactyla Familia: Equidae Chenero: Equus Especie: E. hemionus
Nomenclatura binominal
Equus hemionus
Pallas, 1775

O somer salvache asiatico u tamién onagre u hemión (Equus hemionus (Pallas, 1775)) ye un equido salvache d'as estepas y montanyas d'Asia, pareixito d'un pollín domestico, pero con a cabeza y las midas corporals mes grans que no éste. Dica lo sieglo XVIII tenió una distribución practicament uniforme que s'extendeba de Rusia y Anatolia dica Manchuria, pero actualment se troba restrinchito en cualques zonas isoladas de tota ixa rechión que enantes teneba. "Hemión" y "Onagre" son parolas que demanan d'o griego, y significan "meyo-somer" y "somer salvache" respectibament.

Os onagres se destinguen tamién d'os somers salvachers africanos perque les faltan as rayetas d'as patas, y perque tienen o pelo rizato, como lanas. La color y lo filar d'o pelo baila d'o blanco amarillenco ta lo negro cuasi, mes que lo leonato se veye mes a sobén. Son animals muit rapedos, que pueden correr a velocidaz dica t'alto d'os 70 Km/h cuan les cal de pretar-ne, anque mes usual ye de veyer-los correr mes poco a poco. Como podría pensar-se, os onagres campan per usual a man d'as basas que se troban en o suyo medio natural, d'a on que no en marchan si no que dengún no les fa d'escapar. As cuadriellas d'estes animals tienen de líder un masclo mes dominant que no los altros, que ye la un con o dreito d'aparellar-se as fembras, y qui ha de concarar y fer fuera toz os masclos rivals.

Subespecies

Per a grandaria d'a suya distribución, l'onagre formó poblacions per toz os puestos per a on que pasaba en extender-se, poblacions que con as cheneracions han dato mes que mes nuevas subespecies, diferenciatas d'as orichinals, que encara tenioron mes razons ta especiar-se cuan se fueron quedando isoladas per mans d'a desaparición d'os suyos concheners de muitas d'as rechions intermedias. As subespecies actuals tienen prou diferencias exteriors que en prou casos se n'ha propuesto que cal adscribir-las en especies nuevas. Huei no s'ha feito encara ixo y lo consenso ye de considerar-las només que subespecies adintro d'a mesma especie Equus hemionus, con un total de seis:

• L'onagre persa (Equus hemionus onager) qui dica lo sieglo XIX yera la mes extensa, pero que huei no para si que en bel puesto d'Uzbekistán y Irán. Tien as lanas marrons e la crinera fusca.
• O somer salvache indio (Equus hemionus khur) que en dicen tamién «Khur» u «Ghorkar», de pelo grisenco, que se troba en buen periglo d'extinción en Pakistán y nordueste d'a India.
• O somer salvache sirián (Equus hemionus hemippus) que teneba una distribución prou gran en Orient proximo y Arabia dica lo sieglo XVIII, pero que declinó a escape en a siguient centuria. O zaguer eixemplar lo cazoron en 1927.
• O somer salvache d'Anatolia (Equus hemionus anatoliensis) que estió destribuito per Asia Menor y las rechions colindants. Estió la primera subespecie d'estinchir-se, arredol d'o 1700.
• O «kiang» (Equus hemionus kiang) que ye la subespecie que mes a sobén se separa d'as altras e que se pretende d'adscribir en una especie nueva. Ye un somer de pelo fusco que habita a grans altueras en o Tibet, a sobén en puestos a on que no i puet habitar garra altro ungulato. Ye la subespecie millor destribuita, pos vive dende lo norte de Pakistán y India dica las montanyas de Nepal y l'ueste de China.
• O «kulan» (Equus hemionus kulan) que tiene un piet en a puerta d'a estinción perque només sobrevive en parques zoolochicos y reservas de Turkmenistán. Ye de seguro a subespecie encara viva mes graument menazata d'estinción.
• O kulan d'o desierto de Gobi (Equus hemionus luteus) qui chunto con o somer salvache de Mongolia u «Chigetai» habita las rechions mes deserticas de Mongolia.
• O somer salvache de Mongolia u «Chigetai» (Equus hemionus hemionus) que se troba en Mongolia en chunto con o «kiang» ye la subespecie mes abundant.

Imáchens

• 
  Equus hemionus kulan
• 
  Equus hemionus hemippus †
• 
  Equus hemionus khur
• 
  Sello que representa Equus hemionus onager
• 
  Detalle d'a cabeza d'Equus hemionus kulan
• 
  Equus hemionus hemionus
• 
  Equus hemionus khur
• 
  Ilustración d'Equus hemionus luteus

Vinclos externos

• Wikispecies tiene un articlo sobre Equus hemionus.
• Se veigan as imáchens de Commons sobre l'onagre.

• Datos: Q180960
• Multimedia: Equus hemionus / Q180960
• Especies: Equus hemionus