Apelliu Bergua

apelliu
(Reendrezau dende Apellito Bergua)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre l'apelliu Bergua. Ta atros usos d'a parola Bergua, se veiga Bergua (desambigación).
Bergua
Apelliu aragonés
Lingüistica
Luenga orichinal: Aragonés
Campo semantico: Toponimica
Dimana de: <Bergua.
Significa: "Natural de Bergua"
Portadors
Totals en Espanya: 1845 en 2014 (INE)
  • 1er apellito:
886 en 2014 (INE)
  • 2o apellito:
959 en 2014 (INE)
Totals en Aragón: 1045 en 2014 (INE)
  • 1er apellito:
509 en 2014 (INE)
  • 2o apellito:
536 en 2014 (INE)

L'apelliu Bergua ye un apelliu toponimico aragonés con oríchens en a localidat de Bergua,[1] en a comarca tradicional de Sobrepuerto en as sierras interiors pirenencas.

D'alcuerdo con datos d'o Instituto Nacional d'Estatistica de l'anyo 2014, un total de 1.845 personas lievan l'apelliu en Espanya, d'entre as cuals 1.045 son naixitas d'Aragón.[2]

Oríchens editar

Anque ye cuasi seguro que as oríchens de l'apelliu son en o lugar de Bergua (en l'actual comarca de Sobrarbe, Uesca), se troba personaches que se dicen «de Bergua» dende as zaguerías d'o sieglo XI en belatras localidaz, en as valles colindants y mas leixos.

S'ha de remarcar que en ixas envueltas, l'uso d'a toponimia como complemento d'os nombres d'as personas no constituiba encara un apelliu, en o sentiu de que no se transmitiba de pais a fillos como es entendemos hoi, y nomás serviban ta indicar a procedencia cheografica de l'individuo (chentilicio), sin que os suyos descendients tenesen que heredar-lo (en una forma que imitaba a l'antroponimia romana clasica, que consistiba en nombre + patronimico + chentilicio u gens de procedencia). Isto quiere dicir que, entre os diferents casos de personas que se dicen «de Bergua» que trobamos en os zaguers sieglos altomedievals, probablement a mayoría d'ellas yeran naixitas de Bergua efectivament, pero si no i tuvon además a descendencia, no pudon dar lugar a descendients que se decisen tamién «Bergua».

Asinas, se troba personaches con l'apelativo «Bergua» environando a os primers reis d'Aragón Pero I y Remiro II: Pero de Bergua fue un militar y hombre de confianza de Pero I y iste le encomendó desfensar a ciudat de Uesca en 1096,[1] y cal suposar que siguió amanau d'a familia reyal, pus a tradición fa dir que se fizo matar por Remiro II en 1134, cuan a campana de Uesca.[1] Tamién en o sieglo XII, sabemos que un Martín de Bergua fue canonche de Chaca y un Eizo Arnal de Bergua en fue tamién d'a catedral de Sant Per lo Viello de Uesca.[1]

Un tal Frontín de Bergua fue fiador de Remiro II en cualques donacions que o rei fizo a o monesterio de Leyre en 1134 y, mientres o suyo reinau, fue succesivament tinent d'os castiellos de Sos, Uncastiello, o Elsón, Arcusa, Sasa y Boltanya.[1] Frontín moriría en 1163 y deixaría seis fillos; cinco varons y una dama que, ista vegada sí, continarían con o linache y por primer vegada que se saba estarían conoixius como «Bergua» por apelliu, por herencio de su pai. Su fillo Vallés de Bergua, militar, fue tinent en o Elsón, en Sasa, en Taust y en Alquezar, y morió en 1174.[1] Sus fillos Chuan y García Frontín se succedión como bispes de Tarazona de 1172 dica 1194 y dende 1195 dica 1212 respectivament.[1] Su fillo Fortún de Bergua fue tinent d'o castiello de Taust en 1141, entre 1151 y 1154 tinent en fue de o d'Exeya, y en 1187 en yera en Uncastiello.[1] Su filla Urraca fue a segunda muller d'o influyent caballero Pero Maza.

En 1397, Pero Garcés de Carinyena escribe a suya obra Nobiliario d'Aragón en a que recenta la chenealochía d'os principals linaches nobiliarios d'Aragón y parla d'os Bergua, que considera os decenos entre as familias mas notables por antigüedad, poder y duración.[1] A par d'alavez, ya existiban numerosos casals de Berguas por diferents villas y ciudatz aragonesas, o que podría querer dicir que no yeran necesariament ligatos de sangre con o linache de Frontín, sino que l'apelliu se podría ser tornato popular.

Frecuencias editar

En l'actualidat, l'apelliu Bergua amaneix con mas frecuencia entre os naixitos d'a provincia de Uesca, a on que 818 personas que i son naixidas el tienen (401 como primer apelliu, 417 como segundo y 12 que son Bergua Bergua).[2] A siguen as provincias de Barcelona (289 personas naixitos con l'apelliu),[2] y Zaragoza (227 naixitos)[2], primers destinos entre a emigración altoaragonesa.

En cambeo, si se mira las frecuencias de l'apelliu por puesto de residencia, se fa mas vistable a importancia que ha tenito la emigración: os Bergua que residen en Uesca baixan a 638 personas[3] contra os 818 que i yeran naixitos, mientres que os residents en Barcelona y Zaragoza augmentan dica 363 y 280 respectivament.[3]

Referencias editar

  1. 1,0 1,1 1,2 1,3 1,4 1,5 1,6 1,7 1,8 (es) Los Bergua, ricoshombres de Aragón. Articlo amaneixito lo 21 d'agosto de 2005 en o Diario del AltoAragón. Consultato lo 2 d'abril de 2016.
  2. 2,0 2,1 2,2 2,3 (es) «Bergua» en l'aplicativo Apellidos por provincia de nacimiento d'o Instituto Nacional d'Estatistica. Consultato lo 2 d'abril de 2016.
  3. 3,0 3,1 (es) «Bergua» en l'aplicativo Apellidos por provincia de residencia d'o Instituto Nacional d'Estatistica. Consultato lo 2 d'abril de 2016.