Almendrón

Iste articlo ye sobre un tipo de roca sedimentaria. Ta atros emplegos se veiga Almendrón (desambigación)

Un almendrón ye una roca sedimentaria detritica formata por ruellos de glera u cantals unitos por un cemento de precipitación quimica y a vegatas una matriz.

Almendrón en Death Valley

Se considera almendrón quan os fragmentos de roca son mayors de 2 mm, mayors que los de l'arena.

Un ambient tipico de sedimentación d'almendrons son os ríos, quedando a man de l'antigo cauz por fer falta més enerchía pa mover os ruellos que l'arena, o limo u l'archila.

Os almendrons con cantals angulosos han sedimentato en ambients continentals de semontano por l'acción de torrents.

En a Depresión de l'Ebro ha estato tipica a sedimentación en as marguins de cuenca de ruellos de glera y cantals traitos por ríos dende os Pireneus, Sistema Iberico y as Catalanides. Os almendrons que n'han resultato s'han cementato con carbonato calcico, y han desembolicato un modelato en mallos por a disolución d'este carbonato a favor de diaclasas verticals. Esto se vei en os Mallos de Riglos, Mallos d'Agüero, sierra de Santo Domingo, Los Fayos, La Pesquera (Bezeit) y Roques del Masmut (Penyarroya).

En a compleganza d'o río Martín se reculle a denominación de piedra de haba,[1] que puet estar un leyonesismo introdueito por os meners asturians y leyoneses que conoixerían a denominación de piedra de faba en astur-leyonés.

ReferenciasEditar

  1. (es) Luis Miguel Bajén García, Fernando Gabarrús Alquézar: Memoria de los hombres-libro. Guía de la Cultura Popular del Río Martín. Biella Nuei Sociedad Cooperativa, 2002. pp 61-62