Motorland Aragón

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Información cheneral
Localización	Alcanyiz, Aragón
Disenyador	Hermann Tilke y Pedro de la Rosa
Eventos prencipals	Moto GP Superbikes World Series by Renault
Grand Prix FIA
Longaria	5.344,53 metros
Curvas	18
Tiempo record	1:44.833 (James Walker, P1 Motorsport, 2009)
Grand Prix FIM
Longaria	5.077,65 metros
Curvas	16
Tiempo record	1:49.521 (Dani Pedrosa, Repsol Honda, 2010)
Circuito RFEdA
Longaria	2.646 metros
Curvas	18
Circuito RFME
Longaria	2.379,12 metros
Curvas	11

Motorland Aragón u tamién dita Ciudat d'o Motor d'Aragón ye un complexo adedicato a o motor situato amán d'a ciudat aragonesa d'Alcanyiz en o Baixo Aragón teruelano. Se troba situato en una plana amán d'a Estanca d'Alcanyiz, a bels 5 km d'a ciudat, estando a suya aria d'influencia de 25 millons d'habitants en un radio de 300 km

Anvista de Motorland, con a Estanca d'Alcanyiz dezaga de tot y a la dreita.

Con una amplaria de 350 hectarias (1.320.000 m²), mas gran que a ciudat d'Alcanyiz, ye dividita en tres circuitos: un circuito de karting, atro de tierra y o mas important, o circuito de velocidat, con una recta prencipal de 1.726 metros que fa que sía un referent mundial en a realización de prebatinas aerodinamicas.

Tamién incluye un parque tecnolochico de 21 hectarias ta rechiras y prebatinas de materials d'os fabricants de vehíclos y un centro comercial.

Motorland Aragón ye herencio d'una ampla tradición automobilistica en Alcanyiz que prencipia en l'anyo 1965 con a celebración d'a primera cursa en l'antigo circuito urbán Guadalope.

En l'anyo 2010 estió premiato por a Professional MotorSport World (PMW) como o millor complexo d'o esporte de motor.

Historia

Antecedents

Logo d'o Circuito Guadalope

Alcanyiz tien una larga tradición y trachectoria automovilistica, o primer Premio Ciudat d'Alcanyiz fue celebrato en l'anyada 1965 en o circuito urbán Guadalope. A ciudat tamién aculle o Rally de Tierra d'Alcanyiz, o cual fa parte d'o Campionato d'Espanya de rallies.

O circuito urbán d'Alcanyiz (1965 – 2003)

Ta mas información se veiga l'articlo sobre o Circuito Guadalope

O circuito urbán d'Alcanyiz, creyato en l'anyo 1965, ha acullito competicions automovilisticas dende a calendata d'a suya inauguración dica 2003 cuan se celebro o "XXXVII Premio Ciudat d'Alcanyiz" habendo-se deixato de fer nomás en 1980 y 1981 por razons de seguridat y en 1998 por problemas burocraticos con a Federación Espanyola d'Automovilismo.

Ya dende l'anyo 1992 prencipioron a planteyar-se problemas de seguridat que facioron que hese de limitar-se a velocidat d'os autos en o circuito, dificultando a organización de cursas de primer ran. En zaguerías d'a decada de 1990 amaneixió a ideya de construir un complexo d'o motor a man d'a ciudat que permitise poder celebrar competicions de ran internacional. Asinas ye como prencipia o prochecto de l'actual Motorland.

Prochecto d'a Ciudat d'o Motor

Antigo logo d'a Ciudat d'o Motor

Pedro de la Rosa y Antonio Lobato en a presentación d'o prochecto en Zaragoza

En os zaguers anyos d'a decada de 1990 a Federación Espanyola prencipió a meter trabas a la celebración d'o Gran Premio ciudat d'Alcanyiz decindo que o circuito Guadalop no reuniba as condicions de seguridat que yeran menester, encara que o circuito teneba toz os meyos de seguridat que desichiban os reglamentos nacionals y internacionals.

Asinas a la fin a Federación Espanyola d'Automobilismo quitó a licencia ta a realización de prebas a ran estatal, quedando nomás as competicions organizatas por a Federación Aragonesa. Os ingresos baixoron muito y en 2004 ya no se podió celebrar o Gran Premio Ciudat d'Alcanyiz.

En l'anyo 2001 se constituye a empresa publica "Ciudat d'o Motor d'Aragón" con l'obchectivo d'a creyación d'una futura zona d'ocio arredol d'o motor en a ciudat d'Alcanyiz. Fan parti d'o Consello d'Administración d'iste prochecto o Gubierno d'Aragón, a Deputación Provincial de Teruel y o Concello d'Alcanyiz. Dende o prencipio istas tres institucions han treballato chuntas ta desembolicar o prochecto, incluyindo-ie tanto os tramites administrativos y adchudicación d'as obras como a financiación d'as mesmas.

Actualment o vicepresident d'Aragón, José Ángel Biel, ye president d'o Consello d'Administración de Motorland y o director cherent d'o Instituto Aragonés de Fomento, Antonio Gasión, ye consellero delegato.

O circuito de velocidat

Vista cheneral d'o circuito de velocidat

O circuito de velocidat ye o mas important de Motorland. Disenyato por l'arquitecto alemán Hermann Tilke, un d'os millors disenyadors de circuitos d'o mundo (disenyador d'entre atros os circuitos de Sepang (1998), Bahrein (2004), Xangai (2004), Istambul (2005) u Fuji (2005)) ha tenito amás a colaboración tecnica d'o piloto de Formula 1 Pedro de la Rosa, qui amás de fer parti de l'equipo de disenyo, ha adoptato o circuito como propio, fendo o papel d'embaixador d'o circuito en diferents puestos.

O resultato d'ista colaboración ye un circuito unico en o mundo por as suyas caracteristicas, ideyals ta a realización tanto de prebas como de competicions d'o mas alto ran. As prencipals caracteristicas d'o circuito de velocidat son:

Renaul Clio Cup, curva 9 u d'o "sacacorchos"

• Largaria total: 5.345 m.
• Recta mas larga: 1.726 m.
• Amplaria d'o circuito: 12 m. (15 m. en recta)
• Recta de salita: 630 m.
• Numero de curvas: 18 (circuito 1) u 14 (circuito 2)
• Maxima puyata: 5,4%
• Maxima baixata: 7,2%
• Desnivel maximo: 50 m.
• Superficie paddock: 33.700 m²

O sentito de chiro ye contrario a las agullas d'o reloch. Amás ye enamplable a 10 km ta pruebas de resistencia y ye adaptato a la orografía d'o Baixo Aragón, ista ye una caracteristica de todo circuito disenyato por Tilke qui intenta adaptar-ne a o terreno d'a redolada.

O circuito ye hemologato en a categoría 1T d'a Federación Internacional d'Automovilismo (Permite entrenamientos de Formula 1) y en as categorías 2, 3 y 4 y Grau A Grand Prix d'a Federación Internacional de Motociclismo.

Trazato FIA

Circuito FIA
Largaria	5.344,53 metros
Curvas	18
Circuito FIM
Largaria	5.077,65 metros
Curvas	16
Circuito RFEdA
Largaria	2.646 metros
Curvas	13
Circuito RFME
Largaria	2.379,12 metros
Curvas	11

O circuito tien a hemologación en a categoría 1T d'a FIA, lo que significa que se i pueden fer prebatinas oficials de Formula 1, asinas como muitas atras competicions d'automobilismo.

A longaria total d'o vercuito ye de 5.344,53 metros con 18 curvas, 10 a cuchas y 8 a dreitas. O sentito de chiro ye contrario a las agullas d'o reloch.

O trazato d'o circuito ye a-saber-lo completo. Prencipia en a recta de salita, que tien 630 metros de longaria, en a que se sitúan o paddock y o pit lane prencipal d'o circuito. A recta remata en una curva de 90º a cuchas. Destacan tamién a curva 9, dita o "sacacorchos" (tirabuzón) por o suyo pareixito con a famosa curva d'o circuito de Laguna Seca, y a recta gran d'o circuito que tien una longaria de 1.726 m.

Entre as competicions automovilisticas mas importants que se i fan destacan as World Series by Renault, segunda competición mas important a ran mundial dimpués d'a Formula 1, que se celebrarán en Motorland en 2009 y 2010.

Trazato FIM

MotoGP en a curva 5 d'o circuito de velocidat

Iste trazato conta con a maxima hemologación internacional d'a FIM, lo que significa que se i pueden celebrar tot tipo de competicions internacionals de motociclismo, incluyindo cursas de MotoGP, a categoría mas important d'o motociclismo a ran mundial.

Amás gracias a un alcuerdo con a FIM y Dorna Sports, a empresa que organiza o mundial de MotoGP, Motorland ye dende a temporada 2010 o circuito reserva oficial d'ista competición, y debito a la baixa d'o Gran Premio d'Hongría en a temporada 2010 se celebró por primera vegata o Gran Premio d'Aragón de Motociclismo entre os días 17 y 19 de setiembre de 2010 en o circuito de Motorland Aragón. Amás o circuito ye un sobrebuen escenario de prebatinas ta os equipos de MotoGP. Dende marzo de 2011 Motorland ye circuito oficial d'o mundial de MotoGP dica a o menos 2016 seguntes un alcuerdo sinyato con Dorna.

D'atra man o 19 de mayo de 2010, s'anunció que o circuito aculliría o Campionato Mundial de Superbikes dende l'anyo 2011, con un alcuerdo por tres temporadas.

A longaria total d'o circuito ye de 5.077,65 metros con 16 curvas, 8 a cuchas y 8 a dreitas. O sentito de chiro ye contrario a las agullas d'o reloch.

O trazato d'o circuito ye parellán a o trazato d'a FIA, pero sacando as dos curvas zagueras. Asinas prencipia tamién a recta prencipal a on que se troban o paddock y o pit lane prencipal, con una largaria de 630 metros. Igual que en o trazato FIA i destacan a primera curva de 90º a cuchas y a curba 9, dita o "sacacorchos". A recta gran d'o circuito ye un poquet mas chicota que en o circuito FIA, ya que en iste caso remata en una curva parabolica a cuchas.

Trazato RFEdA

Recta principal

Ye o trazato curto ta cursas d'automovilismo hemologato por a RFEdA. Como no tien hemologación internacional nomás se i fan cursas oficials organizatas por a Reyal Federación Espanyola d'Automovilismo.

Ye un circuito que aproveita a metat mas oriental d'o trazato FIA. Ista distribución d'o circuito deixa libre l'atra metat ta poder fer atras cursas u entrenamientos. Tien una longaria total de 2.646 metros, con 13 curvas, d'as cuals son 8 a cuchas y 5 a dreitas.

Prencipia igual que o internacional en a recta prencipal a on que tamién se troban paddock y pit lane. A primera curva ye a mesma que en os trazatos internacionals, una curva de 90º a cuchas. Dimpués d'una curva mas a dreitas o circuito albandona o trazato internacional con unatra curva a cuchas. En iste trampo s'anyaden dos curvas mas antis de tornar enta o trazato internacional, a on que s'aproveita parti d'a recta luenga, ta fer atra serie de 4 curvas difuera d'o circuito y tornar-ie, rematando a vuelta por o mesmo trazato internacional.

Trazato RFME

Ye o trazato curto ta cursas de motociclismo hemologato por a RFME. Como no tien hemologación internacional nomás se i fan cursas oficials organizatas por a Reyal Federación Motociclista Espanyola.

Ye un circuito que aproveita a metat mas oriental d'o trazato FIM. Ista distribución d'o circuito deixa libre l'atra metat ta poder fer atras cursas u entrenamientos. Tien una longaria total de 2.379,12 metros, con 11 curvas, d'as cuals son 6 a cuchas y 5 a dreitas.

Prencipia igual que o internacional en a recta prencipal a on que tamién se troban paddock y pit lane y ye prou parellán a o trazato RFEdA. A primera curva ye a mesma que en os trazatos internacionals, una curva de 90º a cuchas. Dimpués d'una curva mas a dreitas o circuito albandona o trazato internacional con unatra curva a cuchas. En iste trampo s'anyaden dos curvas mas antis de tornar enta o trazato internacional, a on que s'aproveita parti d'a recta luenga, ta fer atra serie de 4 curvas difuera d'o circuito y tornar-ie, rematando a vuelta por o mesmo trazato internacional FIM, con a curva parabolica.

Circuito de karting

Competición de karting en Motorland

Circuito de karting

Largaria	2.049 metros
Curvas	19

Anvista d'o circuito de karting

Disenyato por Jaime Nogué, tien a maxima hemologación ran A por a CIK-FIA ta competicions internacionals de karting. As prencipals caracteristicas d'o circuito de karting son:

• Largaria total: 2.049 m.
• Largaria circuito hemologato: 1.671,633 m.
• Amplaria d'o circuito: 10 m. - 15,75 m.
• Recta de salita: 993,74 m.
• Numero de curvas: 9 a cuchas y 10 a dreitas
• Maxima puyata: 3,25%
• Maxima baxata: 4,5%
• Superficie paddock: 200 plazas de 8 x 6

Iste circuito puede apologar-se u alcorzar-se seguntes a competicion que se celebre. Asinas existen 4 variants:

• Variant norte: 1.030 m
• Variant sud: 948 m
• Trazato hemologato internacional: 1.671,63 m
• Variant luenga: 2.028 m

En o circuito se celebran importants cursas como o "Campionato aragonés de Karting y Rotax Series", o "Campionato d'Espanya de Karting" u as "6 horas de Resistencia de Vespas".

Circuitos de tierra

Ocupan una superficie de 34 hectarias. En istos circuitos se celebran competicions d'autocrós, motocrós, rallycrós, dirt-track y 4x4. Bi ha tres circuitos: uno ta motocrós, un atro ta supermotard y un atro ta competicions d'autocrós. Existe tamién un trampo d'enduro de 4 km y un atro de extrema enduro.

Circuito de motocrós

World Series by Renault 2010

Ye un circuito d'arena con un sistema permanent de riego. Ocupa una superficie de 70.000 m² y tien una largaria de 1.646 m. L'amplaria d'o circuito oscila entre os 10 y 13 m.

Se celebran importants competicions nacionals y internacionals de motocrós como as "3 Horas de Resistencia d'Enduro", o "Campionato d'Aragón de Motocrós" u o "Memorial Gaibar-Mir de Motocrós".

Circuito de supermotard

Ye un circuito mixto de gudrón y tiera con dubies y meseta engudronata. A suya superficie ye de 55.000 m² y tien una largaria de 1.210 m con una amplaria que varía entre 10 y 13 m.

En o circuito de tierra se fan competicions de supermotard como o "Campionato d'o Mundo de Supermotard", o "Campionato d'Aragón de Supermotard" u as "3 Horas de Resistencia nocturna de Supermotard".

Circuito d'autocrós

O certuito tien dos variants con una largaria maxima de 1.069 m y una superficie de 70.000 m².

En a categoría d'autocros se celebran entre atros o "Campionato d'Aragón d'Autocrós" y o "Campionato d'Espanya de Autocrós".

Competicions

Automobilismo

Renault Mégane Trophy 2009

Entre as competicions automobilisticas que se celebran en Motorland a mas important son as World Series by Renault, ya que constituyen una d'as mas importans competicions en iste esporte a ran mundial, nomás por dezaga d'a Formula 1. As World Series se celebran en Motorland Aragón dende l'anyo 2009 y se dividen en cuantas categorías incluyindo a Formula Renault 3.5 Series, a Eurocup Formula Renault 2.0, a Eurocup Mégane Trophy y a

Atras competicions importants en o mundo de l'automobilismo son o "Campionato francés de Resistencia V de V" u a "Copa d'Espanya de Resistencia" (CER). Tamién se fan atros eventos relacionatos con o mundo de l'auto como o "Rally Hospederías d'Aragón ta clasicos esportivos".

Cal destacar tamién entre as competicions automobilisticas a presencia en o circuito d'a "BAJA Espanya-Aragón", competición de rally puntuable ta a Copa d'o Mundo de Rallies Cross Country.

Motociclismo

Jorge Lorenzo en o Gran Premio de Aragón 2010

En Motorland Aragón se celebran as competicions de motociclismo mas importants a ran mundial, destacando o Campionato d'o mundo de MotoGP y o Campionato Mundial de Superbikes os dos eventos de mayor categoría en iste esporte.

En o Campionato d'o mundo de MotoGP se i fa dende a temporada 2010 o Gran Premio d'Aragón de Motociclismo, celebrando-se-ie cursas d'as tres categorías que componen o mundial: MotoGP, Moto2 y 125cc., en l'anyo 2020 amás d'o GP d'Aragón y por as restriccións d'a Pandemia de COVID-19 ta viachar, se fizo o Gran Premio de Teruel de Motociclismo.

O Campionato Mundial de Superbikes celebra dende a temporada 2011 en Motorland o Gran Premio de Superbikes d'Aragón.

Amás en o circuito se celebran atros campionatos motociclisticos de gran importancia entre os que destacan o Campeonato de Espanya de Velocidat (CEV), o "Campionato castellanomanchego de velocidat", o "Campionato aragonés de velocidat" y atros eventos como o "European Suzuki Days" u l'"Open Zona Norte" (a on que fan parti pilotos de Castiella y Leyón, Aragón, País Basco, Navarra, Asturias, La Rioja y Cantabria en diferents categorías), asinas como entrenamientos de MotoGP y Superbikes.

Aria tecnolochica

Technopark

Chunto a os circuitos y adintro d'o recinto de Motorland Aragón se troba o Parque Tecnolochico d'o Motor d'Aragón u "Technopark". O parque tien una amplaria total de 212.344 m² d'os cuals 114.736 m² corresponden a superdicie industrial innovadora y en él se pueden trobar instalacions d'investigación, formación y hemologación. O tipo de suelo se divide en tres categorías: productivo tecnolochico de tipo 1, productivo tecnolochico de tipo 2 y suelo dotacional educativo y polivalent. D'atra man bi ha una superficie d'aparcamientos de 16.793 m² y 49.223 m² de zonas verdas.

L'obchectivo d'iste parque tecnolochico ye estar un referent en a investigación cientifica relacionata con o mundo d'o motor. Asinas as empresas que decidan instalar-se-ie y desembolicar os suyos productos podrán, entre atras cosas, fer servir as instalacions de Motorland Aragón ta fer prebatinas con os suyos prototipos, podendo tamién hemologar os suyos productos.

Presentación d'o Gran Premio de MotoGP 2013

Entre atros ya existe una seu d'o Instituto d'Investigación en Incheniería d'Aragón d'a Universidat de Zaragoza ta realizar prochectos d'I+D+i y seguridat vial y ye previsto que a Federación Internacional de Motociclismo instale en o parque atro instituto d'investigación

Aria d'ocio y cultura

Ye en prochecto a construcción d'una zona d'ocio creyata por o estudio d'arquitectura Foster + Partners que tendrá una superficie total de 330.000 m² y en a que se trobará un complexo multifuncional, un hotel y una zona residencial y un centro de tecnificación esportiva. O complexo d'ocio incluyirá un centro comercial y un circuito de karting indoor.

D'atra man tamién bi habrá edificios destinatos a negocios, seus federativas y propia seu corporativa de Motorland Aragón. A parti cultural se completará con espacios de exposición y museus relacionatos con o mundo d'o motor.

Vinclos externos

• Se veigan as imáchens de Commons sobre Motorland Aragón.
• (en)(es) Pachina web oficial

• Datos: Q1321650
• Multimedia: Motorland Aragón / Q1321650