Abrir menú principal
Veremundo Méndez Coarasa
Información personal
Calendata de naixencia 14 de mayo de 1897
Puesto de naixencia Flag of Aragon.svg Echo (Chacetania, Aragón)
Calendata de muerte 30 d'aviento de 1968
Puesto de muerte Flag of Aragon.svg Echo (Chacetania, Aragón)
Ocupación Poeta y Escritor

Veremundo Méndez Coarasa (Echo, 14 de mayo de 1897 - It., 30 d'aviento de 1968) estió un escritor y poeta en aragonés cheso. Estudió en a escuela local y dimpués en a Escuela Normal de Uesca, en do remató Machisterio en 1915, que no en exerció solo que cabo quan. Tamién fació topografía y mientres quantos anyos treballó en os prochectos d'aproveitamiento hidraulico de l'Aragón Subordán. Dende 1920 dica a suya chubilación en 1958, estió primer oficial d'o Concello d'Echo, fendo-ie como secretario en bellas ocasions provisionalment.

Empecipió a suya actividat como escritor con trenta y seis anyos, empentato por bells reconoixitos lingüistas, como Alwin Kuhn. Nombrato consellero correspondient d'a "Institución Fernando el Católico" (Institución Ferrando o Catolico, en aragonés) en 1945 y academico correspondient d'a "Real Academia de Nobles y Bellas Artes de San Luis" (Reyal Academia de Nobles y Polidas Artes de Sant Luis) en 1963. 190 composicions abracan a suya obra (as primeras: "A Echo" y "Oza", de mayo y chunio de 1934), que en suman arredol de 18000 versos -nomás se conoixe en prosa bell escrito curto como Las fiestas d'antis más- escritos en aragonés cheso depurato y rico, pos s'alticamó d'adhibir no solo que o lexico y chiros que conoixeba, sino tamién os que aprendeba d'os viellos d'a val.

En istos versos, os temas mas freqüents son a vida y costumbres chesas (La Sanchuanada, Lo matacochín, Las flamas de lo fogaril, etc.) que, de traza realista y descriptiva, recentan-ie os quefers pastorils y agricolas d'a chent d'a val. Asinas, s'adhibe l'intrés etnografico t'a valura literaria: Las hierbas, Los huertos, La siega, La trilla, La santmigalada, La siembra, La nieu, Lo pescataire… O ciclo vital d'a naturaleza se reflecta en bells poemas, (Las fuellas de los arbols, La trilla; en La trilla se conchugan o ciclo d'o día, os quefers agricolas y o tarabidato d'o poema), asinas como a personificación d'as cosas y elementos naturals u a fantasía (Lo sol de los lobos, Soniando'n los Pirineos...), rasgos freqüents d'a poesía de Veremundo.

Totz os anyos escribió o pregón d'as fiestas locals (Lo vociau pa fiestas (1949), Las fiestas de lo lugar (1953), Ya ve iplegando setiembre (1962), ¡Otra golteta, royeta! (1968), etc.). Tamién escribió cada anyo un poema dedicato a Domingo Miral dende l'anyo d'a suya muerte (1942) (Miral s'en ye íu estió o primer). U en homenache a atras presonas (Lo mío recuerdo, en memoria de Rafael Gastón). Villancicos, poemas sobre sucesos locals (La agonía de las campanas (1942), sobre o fuego d'a ilesia) u bells poemas autobiograficos replenan a suya obra.

Diez anyos dimpués d'a suya muerte recullioron dotze poemas en o libro Añada'n la Val d'Echo. Tomás Buesa editó tamién Los míos recuerdos, a on se i recullen 130 d'as 190 composicions d'o poeta cheso, belunas publicatas tamién en diversas revistas especializatas alemanas y belatras traducitas t'o esperanto.

Veremundo Méndez, con a suya obra, puet estar considerato un clasico d'a literatura en aragonés.

Vinclos externosEditar