She Wore a Yellow Ribbon
She Wore a Yellow Ribbon (títol orichinal en anglés, en aragonés Ella portaba una cinta amariella; enguerada en Aragón con o títol en castellano de La legión invencible, A lechión invencible en aragonés) ye una cinta de western belico de cine estausunidense dirichida en 1949 por John Ford, como la segunda cinta d'a suya clamada trilochía d'a caballería chunto con Fort Apache (1948) y Rio Grande (1950). Con un guión cinematografico de Frank S. Nugent y Laurence Stallings adaptau de dos obras de James Warner Bellah publicadas en The Saturday Evening Post (The Big Hunt en 1947 y War Party 1948), una Banda Sonora Orichinal de Richard Hageman y una dirección de fotografía de Winton C. Hoch, produció la cinta Merian C. Cooper (no acreditau) ta la productora cinematografica Argosy Pictures. Entre l'elenco d'a cinta podemos trobar a destacaus actors, como John Wayne, Joanne Dru, John Agar, Ben Johnson, Harry Carey Jr., Victor McLaglen, Mildred Natwick u George O'Brien, entre d'atros.
Lo títol d'a cinta ye alusivo a la canción She Wore a Yellow Ribbon, muit popular en as Fuerzas Armadas d'Estaus Unius y que fa referencia a bella costumbre d'a sociedat estausunidense de portar una cinta de color amariella u de marcar a casa u bel elemento d'a mesma, como un árbol d'o chardín u la suya frontera, ta indicar que s'aspera que torne una persona aimada que ye partecipando en una guerra.
Argumento
editarO capitán Nathan Cutting Brittles ye en 1876 un viello militar con cuantos anyos de servicio en a Caballería de l'exercito estausunidense y se troba bien amán d'a suya chubilación, que no podrá gaudir con a suya esposa en haber muerto ista bel tiempo entazaga. Se troba destinau en Fort Starke, un chicot puest militar d'abanzada que tiene como misión de cosirar a las tribus de cheyennes y arapaho que se troban en a reserva india. Tanimientres, en ixas envueltas se produz una revuelta d'os lakotas (participando-ne tamién bellos indios arapaho) en o norte que redotan y matan en a batalla de Little Big Horn a lo cheneral George Armstrong Custer. En tener noticias d'ixe exito, bellos cheyennes y arapaho d'a reserva optan por fuyir ta luitar contra las tropas estausunidenses.
A lo capitán Brittles se li ordena de perseguir a los fuyius a l'empar que de protecher a la muller y a la filla d'o suyo superior, Abby Allshard y Olivia Dandridge, que han de marchar ta pillar una dilichencia y dixar d'estar en periglo con a revuelta. Lo viache se complica en existir un trianglo amoroso entre Olivia, la filla, y los oficials Flint Cohill y Ross Pennell, preocupaus amás en estar bien amanada la chubilación d'o suyo capitán. Brittles aparentment fracasa en os suyos dos obchectivos y torna en o fuerte con as mullers, con bella amargura en no haber podiu cumplir a suya zaguera misión, que continarán los suyos subordinaus.
Rodache
editarO rodache d'a cinta se fació en a suya mayor parte en escenarios naturals en Monument Valley d'Arizona, un puesto a lo cual lo director John Ford yera muit aficionau ta rodar-ie, por a espectacularidat d'as suyas imáchens. De feito, ya bi n'heba rodau la primer parte d'a suya dita trilochía d'a caballería (Fort Apache) l'anyo anterior. La espectacularidat d'as imáchens d'a cinta (yera la vez primera que se filmaba ta bella cinta lo Monument Valley en color)[2] se completa en inspirar-se Ford y lo director de fotografía d'a cinta, Winton C. Hoch, en os cuadros d'o pintor estausunidense Frederic Remington[2] sobre escenas d'a vida cotidiana en o Far West. Antiparte, la calidat d'o suyo treballo fació que li concedisen l'Oscar a la Millor Fotografía en Color, conseguindo amás la cinta una nominación a lo Premio a lo Millor Guión de Western d'os Premios Writers Guild of America (curiosament, la mesma nominación que ya li heban concediu l'anyo anterior a la suya predecesora en a trilochía), encara que la cinta ganadora d'o premio estió Yellow Sky (1948, William A. Wellman). Cal parar cuenta que la relación d'as cintas de toda la trilochía con la obra de Frederic Remington ya s'acoladia en a darrera escena d'a primer cinta d'a trilochía, Fort Apache, cuan un d'os periodistas li pregunta a lo capitán Kirby York (John Wayne) si ha podiu veyer o cuadro de Remington sobre la heroica carga de caballería d'o tenient coronel Owen Thursday (Henry Fonda).
| Actor | Papel | Notas |
|---|---|---|
| John Wayne | Capitán Nathan Cuthing Brittles | |
| Joanne Dru | Olivia Dandridge | |
| John Agar | Tenient Flint Cohill | |
| Ben Johnson | Sarchento Tyree | |
| Harry Carey Jr. | Segundo tenient Ross Pennell | |
| Victor McLaglen | Sarchento Quincannon | |
| Mildred Natwick | Abby Allshard | |
| George O'Brien | Comandant Mac Allshard | |
| Arthur Shields | Dr. O'Laughlin | |
| Michael Dugan | Sarchento Hochbauer | |
| Chefe John Big Tree | Chefe Pony That Walks | |
| Fred Graham | Sarchento Hench | |
| George Sky Eagle | Chefe Sky Eagle | |
| Tom Tyler | Cabo Mike Quayne | |
| Noble Johnson | Chefe Red Shirt | |
| Rudy Bowman | Soldau John Smith, aka Rome Clay | No acreditau |
| Lee Bradley | Interprete | No acreditau |
| Paul Fix | Traficant d'armas | No acreditau |
| Francis Ford | Connelly, cambero d'o bar de Fort Stark | No acreditau |
| Ray Hyke | Soldau McCarthy | No acreditau |
| Billy Jones | Correu | No acreditau |
| Fred Kennedy | Persona molesta | No acreditau |
| Fred Libby | Cabo Krumrein | No acreditau |
| Cliff Lyons | Soldau Cliff | No acreditau |
| Frank McGrath | Indio | No acreditau |
| Evelyn Moriarty | Invitau a la fiesta | No acreditau |
| Peter Ortiz | Traficant d'armas | No acreditau |
| Post Park | Oficial | No acreditau |
| Jack Pennick | Sarchento mayor | No acreditau |
| Irving Pichel | Voz d'o narrador | No acreditau |
| Mickey Simpson | Cabo Wagner | No acreditau |
| William Steele | Oficial | No acreditau |
| Don Summers | Jenkins | No acreditau |
| Jack Tornek | Oficial | No acreditau |
| Dan White | Soldau | No acreditau |
| Harry Woods | Karl Rynders | No acreditau |
Premios
editar| Premio | Calendata | Edición | Categoría | Premiau | Notas |
|---|---|---|---|---|---|
| Premios Oscar[4] | 1950 | 22ena edición | Oscar a la Millor Fotografía en Color | Winton C. Hoch | |
| Premios Writers Guild of America[5] | 1950 | 2a edición | Nominau a lo Premio a lo Millor Guión de Western | Frank S. Nugent y Laurence Stallings |
Se veiga tamién
editarReferencias
editar- ↑ 1,0 1,1 (en) Enguero de She Wore a Yellow Ribbon en Internet Movie Database.
- ↑ 2,0 2,1 (es) Quim Casas: Películas clave del western, Ediciones Robinbook, S.L., Barcelona, 2007, ISBN 978-84-96222-88-5, p.71.
- ↑ * (en) She Wore a Yellow Ribbon en Internet Movie Database.
- ↑ (en) Ganadors y nominaus d'os Premios Oscar 1950 en a pachina web de l'Academia d'as Artes y as Ciencias Cinematograficas de Hollywood.
- ↑ (en) Ganadors y nominaus d'os Premios WGA 1950 en a pachina web d'Internet Movie Database.
Vinclos externos
editar
Se veigan as imáchens de Commons sobre She Wore a Yellow Ribbon.- (en) She Wore a Yellow Ribbon en Internet Movie Database.
- (en) She Wore a Yellow Ribbon en l' American Film Institute Catalog de l'American Film Institute.
- (en) She Wore a Yellow Ribbon en TCM Movie Database.
- (en) She Wore a Yellow Ribbon en AllMovie.
- (en) She Wore a Yellow Ribbon en Box Office Mojo.
- (en) She Wore a Yellow Ribbon en FilmAffinity.
Datos: Q849344- Multimedia: She Wore a Yellow Ribbon / Q849344
