Fort Apache (cinta)
- Iste articlo ye sobre una cinta estausunidense de 1948; ta atros usos, se veiga Fort Apache.
Fort Apache (títol orichinal en anglés, enguerada en Aragón con o suyo títol orichinal) ye una cinta de cine de western de cine estausunidense de l'anyo 1948 dirichida por John Ford y que ye la primera d'as tres suyas cintas que conforman a clamada trilochía d'a caballería chunto con She Wore a Yellow Ribbon (1949) y Rio Grande (1950). O guión d'a cinta ye de Frank S. Nugent, adaptau de Massacre, un relato publicau en a revista The Saturday Evening Post por James Warner Bellah en 1947. Producida por Merian C. Cooper y por o mesmo director John Ford ta la productora Argosy Pictures, la dirección de fotografía d'a cinta ye d'Archie Stout y William H. Clothier (iste zaguero no acreditau) y la Banda Sonora Orichinal ye obra de Richard Hageman. En l'elenco d'actors d'a cinta amanixen, entre d'atros, John Wayne, Henry Fonda, Shirley Temple, John Agar, Ward Bond, Irene Rich, Anna Lee, George O'Brien, Mae Marsh, Victor McLaglen, Dick Foran y Pedro Armendáriz.
Ista estió una d'as primeras cintas d'o cine estausunidense que presentaban una visión no negativa y prou respectuosa respective d'os amerindios, que dica l'inte lo cine estausunidense amostraba con estereotipos muit negativos.[2]
Argumento editar
En rematar a Guerra Civil Estausunidense, toz asperan que lo veterán capitán Kirby York, a qui toz respectan, se converta en o nuevo comandant de Fort Apache, situau en a Reserva India de Fort Apache, en un puesto remoto d'Arizona a on nomás bi ha que una chicota unidat de Caballería de l'exercito estausunidense. York heba estau mientres a guerra coronel d'un rechimiento y yera bien cualificau ta mandar en o fuerte. Tanimientres, a rapafui l'exercito ha decidiu atorgar lo mando a lo tenient coronel Owen Thursday, graduau de l'Academia Militar de West Point y que mientres a zaguer guerra civil heba estau cheneral. Thursday marcha enta lo suyo destín a remo, en considerar que mereixe un millor tracto, y amuestra ascape un caracter papitieso y soberbio; antiparte, mai no ha tractau con os amerindios ni en conoixe garra d'as suyas costumbres, tradicions y formas de luitar.
A Thursday, que ye viduo, l'acompanya su filla Philadelphia, con un carácter radicalment diferent, y que destaca por a suya simpatía. Bien luego pai y filla troban a lo choven tenient Michael Shannon O'Rourke, qui marcha dende l'Academia de West Point enta lo suyo primer destín como segundo tenient chustament en Fort Apache, en estar lo fillo d'o sarchento mayor Michael O'Rourke, qui en ye destinau tamién. Bien luego entre los dos chóvens naixe una atracción amorosa, encara que ixo no li cuaca pas guaire a lo pai d'a mesacha. Thursday no considera que un segundo tenient fillo d'un sarchento pueda tener un livel suficient para casar-se con a suya filla, encara que o sarchento O'Rourke mientres a guerra heba mandau la Brigada Irlandesa y heba recibiu la Medalla d'Honor d'o Congreso, que li atorgaba lo dreito de ninviar a lo suyo fillo en l'Academia de West Point.
Bien luego de plegar o nuevo comandant en o fuerte, esclatan problemas con os indios apaches d'a reserva mandaus por Cochise, en estar los indios malcontentos por as actividaz d'o corrupto Silas Meacham, achent d'o Gubierno d'Estaus Unius en a reserva. Owen Thursday aplica rigorosament punto por punto as ordenanzas militars y considera que li pertoca protecher a Meacham, encara que se li rechiren os budiellos en fer-lo, y lo fa en contra d'os consellos d'o capitán Kirby York, qui li diz que lo millor ye tractar a las tribus con respecto y remediar os mals causaus por l'achent corrupto.
En zagueras, Cochise considera que lo suyo pueblo no puet continar asperando y decide albandonar a reserva y principiar una luita contra l'exercito. Una vegada mas Thursday no quiere ascuitar os consellos de Kirby y decide marchar con a mayor parte d'as tropas d'o fuerte contra Cochise ta ganar-ie gloria y honors.
Rodache editar
O rodache d'as escenas exteriors se fació en a suya mayor parte en Monument Valley d'Arizona, encara que las escenas d'o propio Fort Apache se rodoron en o rancho Corriganville Movie Ranch, en California, a on se i debantó dende zero lo Fort Apache que amanixe en a cinta.
L'encuadre d'as imáchens d'a cinta s'inspira en os treballos pictoricos d'o pintor estausunidense Frederic Remington sobre escenas d'a vida cotidiana en o Far West, encara que en estar una cinta en blanco y negro no puet amostrar-se con plenitut ixa caracteristica, que sí se consigue plenament en a segunda cinta d'a trilochía d'a Caballería, She Wore a Yellow Ribbon, ya rodada en color, a on lo suyo director de fotografía, Winton C. Hoch, consiguió que li concedisen l'Oscar a la Millor Fotografía.
Elenco[3] editar
| Actor | Papel | Notas |
|---|---|---|
| John Wayne | Capitán Kirby York | |
| Henry Fonda | Tenient coronel Owen Thursday | |
| Shirley Temple | Philadelphia Thursday | |
| Pedro Armendáriz | Sarchento Beaufort | |
| Ward Bond | Sarchento mayor Michael O'Rourke | |
| George O'Brien | Capitán Sam Collingwood | |
| Victor McLaglen | Sarchento Festus Mulcahy | |
| Anna Lee | Mrs. Emily Collingwood | |
| Irene Rich | Mrs. Mary O'Rourke | |
| Dick Foran | Sarchento Quincannon | |
| Guy Kibbee | Capitán medico Wilkens | |
| Grant Withers | Silas Meacham | |
| Jack Pennick | Sarchento Daniel Schattuck | |
| Ray Hyke | Recruta | |
| Movita | Guadalupe | |
| Miguel Inclán | Cochise | |
| Mary Gordon | Ma, cambrera | |
| Philip Kieffer | Soldau d'a Caballería | |
| Mae Marsh | Esposa d'un oficial | |
| Hank Worden | Recruta sudista | |
| John Agar | Segundo tenient Michael Shannon O'Rourke | |
| Abdullah Abbas | Oficial en o baile | No acreditau |
| Danny Borzage | Recruta con mostaixa / Acordonista en a serenata | No acreditau |
| Cliff Clark | Conductor | No acreditau |
| Jane Crowley | Esposa d'un oficial | No acreditada |
| Frank Ferguson | Periodista | No acreditau |
| Francis Ford | Fen, sentinela | No acreditau |
| William Forrest | Periodista | No acreditau |
| Fred Graham | Soldau d'a Caballería | No acreditau |
| Bobbie Hale | Oficial en o baile | No acreditau |
| Frank McGrath | Cabo Derice | No acreditau |
| Clyde McLeod | Oficial en o baile | No acreditau |
| Russell Meeker | Oficial en o baile | No acreditau |
| Al Murphy | Director d'orquesta | No acreditau |
| John Rice | Oficial en o baile | No acreditau |
| Phil Schumacher | Soldau | No acreditau |
| Allen D. Sewall | Oficial en o baile | No acreditau |
| Mickey Simpson | Suboficial en o baile | No acreditau |
| Leslie Sketchley | Oficial en o baile | No acreditau |
| Brick Sullivan | Oficial en o baile | No acreditau |
| Harry Tenbrook | Tom O'Feeney | No acreditau |
| Archie Twitchell | Periodista | No acreditau |
| Eleanore Vogel | Esposa d'un oficial | No acreditada |
Premios editar
| Premio | Calendata | Edición | Categoría | Premiau | Notas |
|---|---|---|---|---|---|
| Premios d'o Festival Internacional de Cine de Locarno[4] | 1948 | 3a edición | Premio a lo Millor Director | John Ford | |
| 1948 | 3a edición | Premio a la Millor Fotografía en Blanco y Negro | Fort Apache | ||
| Premios Writers Guild of America[5] | 1949 | 1a edición | Nominau a lo Premio a lo Millor Guión de Western | Frank S. Nugent |
Se veiga tamién editar
Referencias editar
- ↑ 1,0 1,1 (en) Enguero de Fort Apache en Internet Movie Database.
- ↑ (en) Dave Kehr: How the West Was Filled With Loss en The New York Times.
- ↑ * (en) Fort Apache en Internet Movie Database.
- ↑ (en) Ganadors d'os Premios d' Festival Internacional de Cine de Locarno 1948 en a pachina web d'o Festival Internacional de Cine de Locarno.
- ↑ (en) Ganadors y nominaus d'os Premios WGA 1949 en a pachina web d'Internet Movie Database.
Vinclos externos editar
Se veigan as imáchens de Commons sobre Fort Apache.- (en) Fort Apache en Internet Movie Database.
- (en) Fort Apache en TCM Movie Database.
- (en) Fort Apache en Letterboxd.
- (en) Fort Apache en AllMovie.
- (en) Fort Apache en l' American Film Institute Catalog de l'American Film Institute.
- (en) Fort Apache en FilmAffinity.
- (fr) Fort Apache en Allociné.
- (en) Fort Apache en Rotten Tomatoes.
