Serveto

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Serveto (clasicament Serveto y Servet S. XVI) ye un lugar d'el municipio de Plan, fincato n'el Sobrarbe. Ye el lugar de mes ta'l fundo de l'antigo municipio de la Comuna, en la val homonima, que ye lateral de la val de Chistau per defrente de Saraviello.

Serveto
Entidat local menor d'Aragón
Serveto n'el suyo puesto, a'l cabo d'alto de la Comuna.
Entidat  • País  • Provincia  • Comarca  • Municipio	Entidat local menor  Aragón  Uesca Sobrarbe Plan
Partiu chudicial	Boltanya
Población  • Total	36 hab. (2005)
Altaria  • Meyana	1.306 m.
Distancia  • 160 km  • 40 km  • 15 km	enta Uesca enta l'Aínsa enta Plan
Codigo postal	22367
Chentilicio	Servetans
Parroquial  • Diocesi  • Arcipestrau  • Parroquia	Balbastro-Monzón Sobrarbe-Ribagorza Sant Félix
Coordenadas	42°34’53’’N 0°17’40’’E
Serveto Serveto en Aragón

Esta fuella ye escrita n'el parlar de la Comuna.

Serveto se troba a 2,5 km de Sin, nuclio prencipal de la Comuna, per la pista que remata n'el lugar, debaixo d'as faixas de La Cruján y a'l canto d'el barranco de La Salina que baixa d'el Fener plan. El Fener plan ye es campos que i hai per alto de Plan, per an que pasaba la unica pista que comunicaba enantes la Comuna con a resta de Chistau, en a man chistabina de l'Orbar, per el poniente de la serreta que fan la Igüerra (1962 m) y la Penya d'el Cuezo (1926 m) de Chistén.

El campanar tan robusto de Serveto.

Per el sud tiene las penyas de Sant Martín (1793 m) y Artiés (1643 m) que el deseparan de Chistau y la cuenca d'el Cinqueta deixando-ie paso nomás que per l'alto d'El Collet de Sant Martín.

El nuclio de Serveto el componen diferents carreras que fan converchencia mas que mas de manera aproximada ta la plaza d'el lugar, an que se troba la ilesia. El templo, d'el siglo XVI tiene el campanar como prous se'n heban fetos d'antes en Chistau y La Comuna, con planta cuadrangular, y el tellau que ye una piramide pronunciada con loseta, an que es panos de baixo son menos inclinaus que las caras de mas t'alto. Ye una torre bien robusta, con es muros de piedra clara, y la ilesia de formas austeras no fa tanto como la de Plan, y tien el modelo claro de l'amparada ilesia de Sin.

Las casas d'el lugar ilustran es dos estilos constructivos de la Comuna, las casas mas d'el tipo de Chistau, y las que tienen mas a influencia de baixo de Sobrarbe, con estructuras mas macizas, per contra d'es tellaus menos pesaus d'as casas d'alto, que a sobén tienen basta es cantos d'el tellau achanflanaus, y las falsas con frontera de fustiada per cuentas de paret como la resta d'el edificio, que fan reveladeras las enfluencias d'es dos cantos t'a on que s'aboca la valle.

Una carrera de Serveto, an que se pueden viyer casas d'estilo mas chistabín y mas sobrarbenco bien chuntas.

Se veiga tamién

• Chuan Ralla.

Vinclos externos

• Se veigan as imáchens de Commons sobre Serveto.
• (an) Estatisticas de Serveto en a pachina d'AragonEsAsi.com
• (es) Información de Serveto n'el portal LosPirineos.info

• Datos: Q3571743
• Multimedia: Serveto / Q3571743