Penyas chesosas d'Ebro

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Las penyas chesosas d'Ebro son penyas de muita pendient que se troban en la marguin ezquierda de la ribera d'Ebro dende Remolinos dica Osera d'Ebro.

La ribera d'Ebro presenta uns cabos muito asimetricos especialment entre Fuents d'Ebro y Osera,^[1] entrando en contacto con afloramientos de cheso masivo de gran pendient en la suya marguin ezquierda. Estos afloramientos de chesos plegan a la verticalidat en puestos como Alfacharín sobre importants vías de comunicación (AP-2 y A-2).

La loma d'Utevo con 396 m d'altaria ye en lo cabalto de las penyas chesosas d'Ebro en lo termin municipan d'Utevo. Los castiellos de Miranda y Alfacharín y beluna de las construccions de Lo Castellar tamién son en lo cabalto de las penyas chesosas d'Ebro.

En las penyas chesosas d'Ebro la Formación Zaragoza de cheso y halititas descansa sobre la Formación Sarinyena d'archilitas royencas. L'altaria ye de bels 100 m (80 – 140 m) y la largaria de bels 65 km, con una morfolochía rectilinia y una orientación NW-SE que sigue la fracturación tectonica rechional.^[2] Existe la hipotesi que entre La Pobla d'Alfindén y Osera d'Ebro bi ha una falla relacionada con lo despenyadero.^[1]

En los zaguers milenios las penyas d'Ebro han estau erosionadas dende lo cabaixo por la migración de lo cauz d'Ebro enta lo nord-este. L'augua de los meandros d'Ebro esgarrapa la base de las penyas, a on que ni las archilitas royas ni los chesos presentan guaire resistencia. Cuan los socavons basal son prou gran se producen diferents movimientos de ladera como eslices rotacionals y esbalzadas que tienen como efecto lo retacule de las penyas.^[2]

Toponimia

Penyas d'alabastro sobre lo galacho de Chuslivol, cerca de lo castiello de Miranda.

En lo parache de lo galacho de Chuslivol bi ha uns estratos d'alabastro sobre Ebro que son calificaus de penyas cerca de lo castiello de Miranda:

el qual apellidant dize que paxiendo su ganado crabío entre las penyas et la cequia de Juslibol como enta la part de Miranda...^[3]

Lo derivau penyuela con sufixo -uela se documenta en textos medievals como por eixemplo l'arbitrache sobre l'abrevador de La Matiella de Fuents d'Ebro (1341):

...; assi empero que el ganado cada que será a la ribera del río de Ebro puedan correr el agua a suso abrevando daqui a las Penyuelas que son sobre el dito abrevadero por nos asignado dius la Matiella de Fuentes et del dito abrevadero a yuso cabo el dito río daqui a spacio de cient et novanta astas de lanza de largo; pero si en algún tiempo el dito abrevadero se confondía por el río de Ebro o en otra manera, assi que en aquel los ditos ganados puedan buenament abrevar non se pudiessen, que en aquel caso de las ditas Penyuelas en yuso hayan et haber puedan otro abrevadero tan amplo et tan suficient como yes el de suso por nos asignado.^[4]

En Osera d'Ebro las zagueras penyas chesosas, a l'ueste de la varella de la Molinera, a lo norte de l'autovía A-2 y chunto a la vía de l'AVE reciben la denominación de Las Canteras, y a piet d'ellas se troba la urbanización homonima.

Referencias

↑ ^1,0 ^1,1 (es) HIGUERAS ARNAL, Antonio (coordinador): Geografía de Aragón Tomo I. Editorial Guara. pp 59-60.
↑ ^2,0 ^2,1 (es) LIZAGA VILLUENDAS, Iván, GUERRERO ITURBE, Jesís, NAVAS IZQUIERDO, Ana María: Los escarpes yesíferos del río Ebro en el entorno de Zaragoza. Riesgos geológicos, génesis y evolución. Publicau en: Naturaleza aragonesa, nº 33 (2016), pp. 21-26.
↑ (es)(an) FERNÁNDEZ OTAL, José Antonio: Documentación medieval de la Corte del Justicia de Ganaderos de Zaragoza. Editor: Institución Fernando el Católico, 1995. p. 57.
↑ (es)(an) CANELLAS LÓPEZ, Ángel: Diplomatario medieval de la Casa de Ganaderos de Zaragoza. Real Sociedad Económica Aragonesa de Amigos del País, 1988. p 168.

Bibliografía

(es) PELLICER CORCELLANO, Francisco, ECHEVARRÍA ARNEDO, María Teresa: Formas de relieve del centro de la depresión del Ebro. Institución Fernando el Católico. 1989.

Canteras, frontons, cinglos y ripas d'a depresión d'Ebro
Alcoleya \| Caidero \| Cantera \| Cierzo \| Cornialto \| Ebro \| Eguaras \| Estroza \| Frontón \| Miranda \| Montnegre \| Tejar \| Vallobar

Datos: Q110100322

[CHEOGRAFIADARAGON-1] 1,0 ^1,1 (es) HIGUERAS ARNAL, Antonio (coordinador): Geografía de Aragón Tomo I. Editorial Guara. pp 59-60.

[PENYASCHESOSAS-2] 2,0 ^2,1 (es) LIZAGA VILLUENDAS, Iván, GUERRERO ITURBE, Jesís, NAVAS IZQUIERDO, Ana María: Los escarpes yesíferos del río Ebro en el entorno de Zaragoza. Riesgos geológicos, génesis y evolución. Publicau en: Naturaleza aragonesa, nº 33 (2016), pp. 21-26.

[CASAGANADERS-3] (es)(an) FERNÁNDEZ OTAL, José Antonio: Documentación medieval de la Corte del Justicia de Ganaderos de Zaragoza. Editor: Institución Fernando el Católico, 1995. p. 57.

[DIPLOMATARIOGANADEROS-4] (es)(an) CANELLAS LÓPEZ, Ángel: Diplomatario medieval de la Casa de Ganaderos de Zaragoza. Real Sociedad Económica Aragonesa de Amigos del País, 1988. p 168.

[1]

[2]

[3]

[4]