Abrir menú principal

Movimientos de ladera

Simulación por ordinador d'un movimiento de ladera en San Mateo County, California en chinero de 1997

Os movimientos de ladera son desplazamientos de materials que se producen en as versants u laderas indueitos por o suyo peso, (a favor d'a gravedat)[1]. Os movimientos de ladera representan una periglosidat quan bi ha poblacions y propiedatz humanas exposadas definindo una situación de risgo cheolochico externo. En as laderas bi ha a més de material cheolochico solido, material d'orichen organico y augua, ye l'augua la que actua como lubrificant, fendo menor a resistencia d'os materials a ser deformatos.

Bi ha diferents factors que influyen en os movimientos de ladera. Beluns permiten que se faigan movimientos de ladera por creyar condicions favorables (factors condicionants), belatros son los que fan encomenzar o proceso (factors desencadenants).

Bi ha muitas clasificacions d'os movimientos de ladera y a vegatas un movimiento de laderas puet tener component de diferents clases de movimiento. A clasificación de Carlon y Kirby (1972) modificata por Gardiner y Dackombe en 1983 prescinde d'as torrocatas y considera os movimientos de ladera como entre meyo de tres cabos, que se representan en os tres vertices d'un diagrama triangular dividito en campos: os fluxos, os eslices y a reptación u creep. Considera os ríos como un caso de fluxo puro (fegura en o diagrama pero no ye un movimiento de ladera).

En o segmento que bi ha entre o fluxo puro y os eslices bi ha un gradient de mayor a menor humidat. Os eslices representarían a menor humidat, y puyando a humidat trobaríanos dimpués os lurtes, y ya a man d'o fluxo puro, as coladas de bardo.

En o segmento que bi ha entre os eslices y a reptación de suelos trobamos a reptación de talutz.

En o segmento que bi ha entre os fluxos puros y a reptación de suelos trobamos a solifluxión.

Bi ha diferents denominacions a movimientos de ladera. As denominacions tradicionals gosan estar chenerals pa dicir diferents tipos de movimientos de ladera y no son tan especificas como as denominacions que fan servir os scientificos. En l'ALEANR bi ha un mapa de denominación de movimientos de ladera a on salen diferents parolas como esliz/liz, lurte en l'Alto Aragón y sulsida/sunsida en o Sistema Iberico oriental. En panticuto se reculle chorripatizo[2] pa un tipo de movimiento de ladera, pero sobre tot o sinyal que queda dimpués d'este movimiento. Antiparte se relaciona con o verbo chorripar que significa "mover-se a tierra quan baixa l'augua"

En as traduccions heredianas bi ha bella mención a movimientos de ladera, por eixemplo en a Grant Cronica d'Espanya en relación a quan los cartachineses travesoron os Alpes:

por q(ue) aq(ue)l lugar q(ue) ya de su nat(ur)a hauia natura hauia crebantadas & fuertes barrancos / & grandes despenyaderos no res menos hauie estado de nueuo mas fuertme(n)t empachado por nueuo mouimie(n)to de tierra que era cayda d(e)la alta montanya que hauie assi ençerrado el passo q(ue)la fondeza estaua assin corrible q(ue)los cauall(er)os despues qua(n)do ellos uinieron en aq(ue)l lugar cuydaron estar / affin de seyer affogados.

ReferenciasEditar

  1. (es) Diodora Calvo Aldea, Maria Teresa Molina Álvarez, Joaquín Salvachúa Rodríguez: Ciencias de la tierra y medioambientales. 2º Bachilleraro. 2010 McGraw-Hill, pp 165-169.
  2. (es) Francho Nagore Laín: El aragonés de Panticosa. Colección de Estudios Altoaragoneses, nº 9. Instituto de Estudios Altoaragoneses, 1986. p 202.

BibliografíaEditar