Ontina u antina ye una denominación chenerica que s'emplega en Aragón ta referir á un conchunto d'especies diferents de hierbas silvestres de baixa altaria, propias de terrenos aridos y de gran insolación, que tienen como caracteristica común de formar matetas de port baixo, que no gosan superar os 50 cm d'altaria, muit ramificadas dende a base. A denominación popular «ontina» careix de garra significau taxonomico, y s'emplega, en no basando-se si que en a morfolochía externa aparent, ta designar especies que perteneixen á cheneros y dica familias taxonomicas muit diferents y que no guardan garra parentesco d'entre ellas.

Una mata d'ontina d'a especie Artemisia campestris.

Plantas que reciben ista denominación son dominaderas en bells paisaches d'a cheografía aragonesa, especialment en a depresión de l'Ebro, en a extremadura aragonesa y en os Monegros, en do as extensions desarboladas forman un paisache caracteristico de paramera y semidesierto en do que lo maximo estrato vechetacional ye el d'os arbustos de clima mediterranio como chinestras, tamarizas y aliagas, que siempre i apareixen de forma esparza u en corroldos chicotz, en contrastando-ie con as extensions mayors que son ocupadas por un tornallo de suelo espullau con hierbas ramificadas y bien adaptadas con o clima seco, con a salinidat d'o substracto, y con a solana.

As especies que predominan d'entre as «ontinas» en Aragón son qualques miembros d'o chenero Artemisia (A. campestris,[1] A. herba-alba,[1] etc.), hierbas d'os cheneros Bupleurum (B. rigidum[1]) y Santolina (S. chamaecyparissus[1]) y bellas altras. Puntualment, dada l'amplitut de significaus que gosa cobrar o termino, puede sentir-se decir como ontinas á plantas de morfolochía pareixida que usualment omne clamaría por bell nombre más achustau, como lo sisallo.[1]

Importancia tradicionalEditar

A mayoría d'«ontinas» son especies de plantas bien adaptadas á lo clima mediterranio seco, perens u semi-perens que s'ixecan d'as parts aerias en o verano pero guardan as parts soterranias (belunas, con tuberclos u radices-reservorio) y reverdeixen en brostando en as epocas benignas. Ista capacidat ta «reviscolar» en as epocas de precipitacions más abundants ha feito siempre que as ontinas contasen con gran importancia en os tiempos d'a transuancia en Aragón, quan as ramadas transuants feban a hibernada en os ontinars d'a Tierra Plana, en os que as uellas i trobaban sustento d'hibierno que os ganaders achustaban en arriendo, ta dimpués tornar-se-ne con a transuancia primeral cara t'a Montanya quan a nieu i deschelaba. Á demés, as ontinas, as chinestras y as aliagas yeran, per mal de faltar-ie lenya, lo material que emplegaban os pastors montanyeses ta escalfar-se en hibierno en Tierra Plana, pus en rancando-las ye con el que forniban as fogueras.

Con a modernización d'os sistemas agricolas, que han permeso de meter quantiosas hectarias d'antigos ontinars en regano en os municipios d'a val de l'Ebro, o tipo de practicas de pastura extensiva que se feba enantes en l'actualidat se tornarían inviables per no poder-se mantener as grans ramadas que antes i heba con as reservas de mont d'ontinar que queda enguán.

ImáchensEditar

Se veiga tamiénEditar

ReferenciasEditar

  1. 1,0 1,1 1,2 1,3 1,4 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7