María Victoria Broto Cosculluela

María Victoria Broto Cosculluela
María Victoria Broto Cosculluela


6 de chulio de 2015 – 11 d'agosto de 2023
President Javier Lambán Montañés
Precediu por Ricardo Oliván Bellosta
(Sanidat, Bienestar Social y Familia)
Succediu por Carmen María Susín Gabarre
(Bienestar Social y Familia)

16 d'abril de 2008 – 15 de chulio de 2011
President Marcelino Iglesias
Precediu por Eva Almunia
Succediu por Dolores Serrat
(Educación, Universidat, Cultura y Esporte)

18 de chulio de 2007 – 15 d'abril de 2008
President Marcelino Iglesias
Precediu por Ángela Abós
(Universidat, Ciencia y Tecnolochía)
Succediu por Mª Pilar Ventura

21 de chunio de 2011 – 17 de chunio de 2015
Naiximiento 10 de chinero de 1956
Guaso (Sobrarbe)
Partiu Partido Socialista Obrero Español
Profesión Politica, mayestra y psicologa
Alma Máter Universidat de Zaragoza
Universidat de Barcelona

María Victoria Broto Cosculluela (casa Salinas, Guaso, Sobrarbe, 10 de chinero de 1956[1]) ye una mayestra y politica aragonesa, militant d'o PSOE.[2][3]

En habendo estau previament a Directora Cheneral d'Administracions Educativas d'a DChA,[1] estió a'l frent de diferents Departamentos de l'Executivo aragonés mientres a VII lechislatura, a zaguera en a que a presidencia estió en mans d'os socialistas, con Marcelino Iglesias. Asinas, la nombrón Consellera de Ciencia, Tecnolochía y Universidat d'o Gubierno d'Aragón en a formación d'executivo posterior a las eleccions de 2007, y dica lo cambeo de gubierno de dimpués d'as eleccions de mayo de 2011 fue a Consellera d'Educación, Cultura y Esporte.

En o suyo periodo como Consellera d'Educación, Cultura y Esporte s'aprebó, d'entre bellas atras, a Lei de Luengas d'Aragón (aviento de 2009), que preveyeba o reconoiximiento como luengas propias d'Aragón a l'aragonés y a o catalán,[4] y a suya normalización.[4]

Biografía editar

María Victoria Broto naixió de casa Salinas, en o barrio d'o Tozal que pertenece a o lugar de Guaso. Guaso actualment fa parte d'o municipio de l'Aínsa-Sobrarbe, y se troba alto en un tozal que fa de divisoria d'entre a valle de l'Ena y a valle de l'Ara (que ye como dicir a divisoria d'entre o Viello Sobrarbe y a valle de Boltanya), a 4 kilometros en sudueste d'a villa de l'Aínsa. O barrio d'o Grau, a on ye la casa natal de María Victoria Broto, se troba en a baixant oriental d'o tozal, deseparau bels cientos de metros d'a resta de barrios diseminaus que forman Guaso.

Cursó os estudios primarios en a escuela de Guaso[1] y fizo as primeras anyadas de Bachillerato Elemental en a escuela de l'Aínsa,[1] anque en tresladar-se ta la ciudat de Uesca habió de continar os estudios astí.[1] Ye licenciada en machisterio por a Universidat de Zaragoza, y en psicolochía por a Universidat de Barcelona.[1]

Carrera profesional editar

A suya carrera profesional, d'antes d'incorporar-se a la politica, heba estau centrada en l'amostranza. Fizo de mayestra 23 anyos.[1][2]

Gosó estar a directora d'o colechio Puente Sardas en Samianigo d'entre 1987 y 1989[2] y cabeza d'estudios d'o mesmo centro d'entre 1999 y 2003,[2] por o que fixó a suya residencia en a capital de l'Alto Galligo buena cosa d'anyos.

Carrera politica editar

 
María Victoria Broto en l'acto d'entrega d'os Premios d'as Bibliotecas Escolars 2010, chunto a Eva Almunia.

A carrera politica de Mariví Broto dende as orichens ha diu muit asociada con a suya profesión y puesto de residencia: Dende l'anyo 2000 perteneixió a'l Consello d'o Centro de Profesors y Recursos locals de Samianigo,[2] y dica l'anyo 2003 estió tamién miembro d'o Consello Escolar d'Aragón,[2] parcialment solapando-se con o suyo paper como secretaria d'Educación, Cultura, Universidat y Investigación que fizo dende o 2000,[3] tot fendo parte d'o Departamento que a par d'alavez presidiba Ángela Abós.

Ye afiliada a o Partido Socialista Obrero Español dende l'anyo 1982,[2][3] militancia en virtut d'a cual exerció diferents concellalías d'a comarca de l'Alto Galligo, a on que arribó a ostentar a presidencia comarcal,[3] en paralelo a la suya actividat profesional y a la suya posterior embrecación en l'administración autonomica.

En 2007 fue nombrada Consellera d'o Gubierno d'Aragón a primer vegada, en ocupando o cargo de Consellera de Ciencia, Tecnolochía y Universidaz,[3] que aglutinaba a Viceconsellería de Ciencia y Tecnolochía con a Secretaría Cheneral Tecnica, tres direccions chenerals; a Dirección Cheneral d'Amostranza Superior, a Dirección Cheneral d'Investigación, Innovación y Desarrollo, a Dirección Cheneral de Tecnolochías ta las Sociedat d'a Información y as direccions d'as organizacions Aragonesa de Servicios Telematicos (AST), l'Instituto Tecnolochico d'Aragón (ITA), o Centro d'Investigación y Tecnolochía Agroalimentaria d'Aragón (CITA) y l'Achencia de Calidat y Prospectiva Universitaria d'Aragón (ACPUA).[3]

En chulio de 2008, o president autonomico Marcelino Iglesias la designó Consellera d'Educación, Cultura y Esporte,[2] que dica alavez heba estau o puesto d'a ex-consellera Eva Almunia, nombrada Secretario d'Estato d'Educación y Formación por o president espanyol José Luis Rodríguez Zapatero. A succedió en a Consellería de Ciencia, Tecnolochía y Universidaz María Pilar Ventura Contreras.[2]

Ocupó a Consellería d'Educación, Cultura y Esporte dica la surtida d'o gubierno autonomico d'o Partido de los Socialistas de Aragón en chulio de 2011, con a investidura d'a nueva presidenta electa Luisa Fernanda Rudi, d'o Partido Popular, qui heba ganau as eleccions autonomicas d'o 22 de mayo de 2011.

Vinclos externos editar

Referencias editar

  1. 1,0 1,1 1,2 1,3 1,4 1,5 1,6 (es) PALLARUELO CAMPO, Severino; Entrevistas (cap. V en Comarca de Sobrarbe (Num. 23 en a Colección Territorio)). Gobierno de Aragón; Zaragoza, 2007. ISBN 84-7753-630-9. O capítol puede leyer-se en linia aquí.
  2. 2,0 2,1 2,2 2,3 2,4 2,5 2,6 2,7 2,8 (es) Noticia «Mª Victoria Broto asume la consejería de Educación y Pilar Ventura la de Ciencia y Tecnología en el gobierno aragonés», de 15 d'abril de 2008; consultada o 17 de chulio de 2011.
  3. 3,0 3,1 3,2 3,3 3,4 3,5 (es) Noticia «El departamento de Ciencia, Tecnología y Universidad será dirigido por María Victoria Broto» d'11 de chulio de 2007; consultada o 17 de chulio de 2011.
  4. 4,0 4,1 (es) «LEY 10/2009, de 22 de diciembre, de uso, protección y promoción de las lenguas propias de Aragón.», a Lei de Luengas d'Aragón, en o BOA nº 252; consultau o 17 de chulio de 2011

Predecesor:
Ricardo Oliván Bellosta
(Sanidat, Bienestar Social y Familia)
Consellera de Ciudadanía y Dreitos Socials d'o Gubierno d'Aragón
6 de chulio de 2015 - 11 d'agosto de 2023
Succesor:
Carmen María Susín Gabarre
(Bienestar Social y Familia)
Predecesor:
Eva Almunia
Consellera d'Educación, Cultura y Esporte d'o Gubierno d'Aragón
2008 - 2011
Succesor:
Dolores Serrat
(Educación, Universidat, Cultura y Esporte)
Predecesor:
Ángela Abós
(Universidat, Ciencia y Tecnolochía)
Consellera de Ciencia, Tecnolochía y Universidat d'o Gubierno d'Aragón
2007 - 2008
Succesor:
Mª Pilar Ventura