Impacto ambiental

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Impacto ambiental ye qualsiquier modificación en a composición u en as condicions d'o medio ambient introdueita por l'acción humana, por a qual se transforma o suyo estato natural y, por un regular resulta malmesa a suya calidat inicial.

O Mar d'Aral secando-se, impacto ambiental como conseqüencia d'uns reganos de cotón no sostenibles.

As causas d'os impactos pueden estar:

• Cambeos en l'uso d'o suelo.
• Contaminación.
• Cambeos en a biodiversidat.
• Sobreexplotación.
• Abandono d'actividatz humanas tradicionals.

Clasificación

Os impactos ambientals se pueden clasificar seguntes o sistema a lo que impactan u a la extensión territorial a la que afectan. Os sistemas impactatos pueden estar l'atmosfera, l'augua, o releu, o suelo, o paisache, a flora y a fauna. A escala d'os impactos seguntes a extensión territorial puede estar local, rechional u global.

Impactos seguntes o sistema

En l'atmosfera os impactos tipicos son a contaminación quimica, incremento de l'efecto hibernadero, alteracions en o clima, plevia acida, forato en a capa d'ozono y contaminación sonora.

En l'augua os impactos tipicos son a contaminación d'as auguas superficials, d'as auguas sotorranyas, d'as auguas marinas (mareas negras), sobreexplotación d'os aqüifers y salinización d'os aqüifers.

En o relieve os impactos tipicos son a suya modificación por obras publicas u menería.

En o suelo os impactos serán por un regular a erosión, a perduga de fertilidat y a contaminación.

En o paisache o impacto podrá estar una calidat visual malmesa.

En a flora y fauna, y en as biocenosis en cheneral os impactos serán a desforestación, a perduga de caza y pesca, a perduga d'habitats naturals, a perduga d'a biodiversidat y a extinción d'especies.

Impactos seguntes a suya escala

Seguntes a extensión territorial os impactos ambientals pueden clasificar-sen en:

• Locals: afectan a un aria muito concreta. Un eixemplo puet estar a contaminación d'o río Martín.
• Rechionals: afectan a arias cheograficas extensas, cubrindo países y rechions. Un eixemplo puet estar a contaminación d'o río Danubio, a plevia acida u as mareas negras.
• Globals: afectan a tot o planeta y eixemplos en son a disminución de l'ozono en a estratosfera, l'aumento de l'efecto hibernadero, a perduga de biodiversidat y a escaseza d'augua como recurso pa una población creixient.

Bibliografía

• Diodora Calvo Aldea, Maria Teresa Molina Álvarez, Joaquín Salvachúa Rodríguez "Ciencias de la tierra y medioambientales". 2º Bachilleraro. 2010 McGrawHill.