Casablanca (cinta)
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo ye sobre una cinta estausunidense de 1942; ta atros usos, se veiga Casablanca (desambigación).
| Casablanca | |
|---|---|
| |
| Ficha tecnica | |
| Dirección | Michael Curtiz |
| Dirección artistica | Carl Jules Weyl |
| Producción | Hal B. Wallis |
| Guión | Julius J. Epstein Philip G. Epstein Howard Koch Casey Robinson |
| Musica | Max Steiner |
| Soniu | Francis J. Scheid |
| Fotografía | Arthur Edeson |
| Montache | Owen Marks |
| Vestuario | Orry-Kelly |
| Efectos especials | Lawrence W. Butler |
| Actors | Humphrey Bogart Ingrid Bergman Paul Henreid Claude Rains Conrad Veidt Sydney Greenstreet Peter Lorre |
| Color | Blanco y negro |
| Datos y cifras | |
| País(es) | Estaus Unius |
| Anyo | 1942 |
| Debantadera | 26 de noviembre de 1942  Nueva York (Nueva York, Estaus Unius)[1]
|
| Chenero(s) | Cine de drama Cine de romance |
| Durada | 102 min. |
| Idioma(s) | Anglés |
| Companyías | |
| Productora(s) | Warner Bros. First National Pictures |
| Distribución | Warner Bros. |
| Presupuesto | 1.039.000 dólars |
| Informacions en bases de datos especializadas: | |
          
| |
Casablanca (títol orichinal en anglés en Estaus Unius y enguerada con ixe mesmo títol en Aragón) ye una cinta estausunidense de l'anyo 1942, dirichita por Michael Curtiz, que en o suyo reparto incluye a destacatos actors como Humphrey Bogart, Ingrid Bergman, Paul Henreid, Claude Rains, Conrad Veidt, Sydney Greenstreet u Peter Lorre.
Ye un drama romantico de 102 minutos de durada, producito por Hal B. Wallis ta Warner Bros. y First National Pictures, con un presupuesto de 1.039.000 dólars, considerata una d'as cintas miticas d'a Historia d'o Cine.
A cinta ye ambientata en a ciudat marroquina de Casablanca mientres a Segunda Guerra Mundial en aviento de 1941, cuan ixa ciudat, una colonia francesa, yera administrata por a Francia de Vichèi, que colaboraba con o Tercer Reich contra os Aliaus. O protagonista d'a cinta, Rick (Humphrey Bogart), un antigo miembro d'as Brigadas Internacionals mientres a Guerra Civil Espanyola, tien dandalos sobre si aduyar a la suya antiga amant, Ilsa Lund, interpretata por Ingrid Bergman, y a lo suyo esposo Victor Laszlo (Paul Henreid), un líder d'a Resistencia francesa, a fuyir ta Portugal y ta os territorios controlatos por os Aliaus, u bien d'entregar-los a la policía de Vichèi, representata por o capitán Louis Renault (Claude Rains).
Mientres o rodache d'as escenas d'a cinta, Bogart portaba d'alzas en os suyos zapatos ta que no se notase la diferencia d'altaria entre él y Ingrid Bergman.[2]
Sinopsi editar
En Casablanca, Humphrey Bogart interpreta a Rick Blaine, un ciudadán estausunidense que heba partecipato en a Guerra Civil Espanyola en as filas d'as Brigadas Internacionals y que, desencantato dezaga, s'ha convertito en un personache amargato vivindo en una chicota ciudat colonial francesa, a ciudat de Casablanca en l'actual Marruecos. Parte d'o suyo desencanto tien o suyo orichen en un amor que hea tenito con Ilsa Lund (Ingrid Bergman) en París en 1940, chusto antis de dentrar-ie as tropas d'a Wehrmacht d'o Tercer Reich en chunio de 1940 dimpués de redotar a l'Exercito francés y a l'Exercito britanico en a dita Batalla de Francia. Rick marchó de París enta Marsiella y enta Marruecos, ta instalar-se en Casablanca, a on se convertió en un cinico propietario d'un café, o Rick's Café Américain. En convertir-se a ciudat en uno d'os zaguers puntos per on yera posible albandonar os territorios controlatos por a Francia de Vichèi aliata d'o Tercer Reich enta Portugal, un país neutral, o Rick's Café Américain se convertió en un puesto a on se podeba trobar a tota traza de chents: colaboracionistas, oficials alemans, policías franceses corruptos, refuchiatos que prebaban de fuyir...
En o suyo treballo en o bar, Rick conta con l'aduya de Paul (Paul Panzer), qui colabora con a Resistencia francesa, y tamién con un antigo amigo de París, Sam (Dooley Wilson), pianista en o café. Un cinico capitán de policía, o capitán Louis Renault (Claude Rains) ye o representant oficial d'o Gubierno de Vichèi en a ciudat, y para cuenta de servir a los alemans encara que sin enemistar-se muito con a Resistencia, fendo un equilibrio. Y no xublida recibir os sobornos de Rick ta mantener o suyo livel de vida y d'emplegar en o suyo beneficio o poder d'o suyo cargo oficial, mesmo ta fer conquiestas entre as mullers que han de fuyir de Casablanca.
Cambeos de guión en Espanya editar
En Espanya, a cinta fue censurata por o Gubierno franquista, ta fer de Rick Blaine no pas un antigo miembro d'as Brigadas Internacionals, sino un vulgar contrabandista d'armas en favor d'Etiopía mientres a invasión italiana en 1935 y mientres as luitas de guerrillas contra os italianos. Cal parar cuenta que os militars sublevatos en Espanya contra os cuals luitoron as Brigadas Internacionals yeran os gubernants d'o país en 1942 dimpués de ganar a guerra.
Premios editar
A cinta recibió o Premio Oscar a la Millor Cinta en 1943. O suyo actor prencipal, Humphrey Bogart, fue nominato a l'Oscar a o Millor Actor por a suya interpretación d'o personache de Rick Blaine, encara que en zaguerías qui recibió o premio estió l'actor Paul Lukas. Antiparte, l'actor Claude Rains tamién fue nominato a l'Oscar a o Millor Actor Segundario por o suyo papel d'o capitán Louis Renault, estando a la fin o ganador d'o Premio Charles Coburn.
Se veiga tamién editar
Referencias editar
- ↑ (en) Enguero de Casablanca en Internet Movie Database.
- ↑ (es) En a revista Fotogramas, numero 2.029, noviembre de 2012, pachina 50.
Vinclos externos editar
Se veigan as imáchens de Commons sobre Casablanca.- (en) Casablanca en Internet Movie Database.
