Efectos especials

Os efectos especials son ilusions u trucos visuals que se fan servir en as industrias d'o teatro, o cine, a televisión y os videochuegos pa simular os eventos imachinaus en una historia u un mundo virtual.

A cinta Le Voyage dans la Lune de Georges Méliès fa emplego de gran cantidat d'efectos especials pa transmitir a historia que quiere contar.

Os efectos especials se trestallan tradicionalment en as categorías d'efectos mecanicos y efectos opticos. Con o surtimiento d'a realización de cintas dichitals, ha aumentau a distinción entre efectos especials y efectos visuals, y istos zaguers se refieren a la postproducción dichital y os efectos opticos, mientres que os efectos especials se refieren a los efectos mecanicos.

Os efectos mecanicos (tamién clamaus efectos practicos u fisicos) por un regular s'aconsiguen mientres o rodache d'acción en vivo. Isto incluye l'emplego d'accesorios mecanizaus, scenografía, maquetas, animatronica, pirotecnia y efectos atmosfericos: creyar plevida, boira, nieu, fer que un auto pareixca conducir solenco u mesmo esclatar un edificio. Os efectos mecanicos tamién s'incorporan a ormino en o disenyo y o maquillache d'o scenario. Per eixemplo, o maquillache protesico se puede fer servir pa fer que un actor pareixca una creyatura no humana.

Os efectos opticos (tamién clamaus efectos fotograficos) son tecnicas en as qualas imachens u fotogramas de cinta se creyan fotograficament, ya sía en a camera fendo servir exposición multiple, mattes u o proceso Schüfftan, u en postproducción fendo servir una imprentadora optica. Se puede emplegar un efecto optico pa colocar actors u scenarios contra un fondo diferent.[1]

Dende lo decenio de 1990, as imachens cheneradas per ordinador (u CGI) han pasau a l'abantguardia d'as tecnolochías d'efectos especials. Brinda a los cineastas un mayor control y permite que muitos efectos s'aconsigan de traza mas segura y convincent y, a medida que a tecnolochía amillore, a costos mas baixos. Como resultau, muitas tecnicas d'efectos opticos y mecanicos han estau reemplazadas per CGI.

ReferenciasEditar

  1. (es) Diccionario de Arte I. Barcelona: Biblioteca de Consulta Larousse. Spes Editorial SL (RBA), 2003, p.188. ISBN 84-8332-390-7