Ángel Petisme

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Ángel Petisme

Información personal
Calendata de naixencia	17 de chinero de 1961
Puesto de naixencia	Calatayú, Comunidat de Calatayú, (Aragón)
Ocupación	Escritor, poeta, compositor y cantaire
Pachina web	www.angelpetisme.com

Ángel Muñoz Petisme, naixito de Calatayú o 17 de chinero de 1961, ye un poeta, escritor, compositor y cantaire aragonés.

Biografía

Naixito de Calatayú o 17 de chinero de 1961, teneba ueit anyos cuan a suya familia s'en fue ta Zaragoza. Astí, fació os estudios de Filolochía Hispanica en a Universidat de Zaragoza. Tamién empecipió a publicar os suyos primers poemas. Creyó a revista Narra (Recenta, en aragonés) y o grupo Jóvenes Poetas Aragoneses (Chóvens Poetas Aragoneses, en aragonés). En 1983 enguera musicalment en a plaza de toros de Zaragoza con chent d'a "movida" madrilenya. Tamién en iste anyo s'en va ta Madrit ta estudiar Filolochía Italiana, amás de solfeyo y canto en o Taller de Músicos de Madrit. Ye allora cuan empecipia a desembolicar-ie una gran actividat, como cantautor u como activista esfendendo cuantas causas (estió obchector de conciencia, y indultato dimpués por o rei), y mesmo con una poesía embrecada y que, con nuevos conceptos, esviella a lirica cheneral. Asinas, en 1984 publica o suyo primer libro de poemas, Cosmética y terror, con una sobrebuena acullida por parti d'a critica, dica en decir que iste libro sería muga en a lirica espanyola, fendo-ie un antis y un dimpués. En 1986, Luis Antonio de Villena incluye a Petisme en a Antolochía Postnovísimos. En 1987 creya "Los Sin Techo" (Os sin teito), un grupo electrico prou salvache, y en 1990 l'asociación "Madrid, Calle de la Cultura" (Madrit, Carrera d'a Cultura) t'a esfensa d'os artesans, d'a musica en vivo y contra a trancadura de bars d'o concellero Matanzo. Macroconcierto en o Palacio d'os Esportes y un single, Toque de queda en Madrid. Publica o suyo primer disco estando solenco, "La habitación salvaje" (A cambra salvache) y, decamín, un nuevo libro de poemas en Prensas Universitarias, "Habitación Salvaje". En 1992 graba "Turistas en el Paraíso" (Turistas en o Paradiso) con Antón Reixa (d'Os Resentidos) fendo rap y Enrique de Melchor en a guitarra flamenca. En 1993, chunto a Paco Ibáñez, Labordeta u Javier Krahe, entre atros, canta en o "Concierto en favor de los Inmigrantes Latinoamericanos" (Concierto en favor d'os Inmigrants Latinoamericans) en o Teatro Prencipal de Zaragoza. En 1995 fa una chira por teatros con Luis Eduardo Aute y apareixe en l'Antología de Poesía Aragonesa Contemporánea (Antolochía de Poesía Aragonesa Contemporania).

En zaguerías de 1997, Petisme publica Cierzo, fendo en 1998 a chira d'iste disco. Tamién iste anyo graba una canción, "El juego que me perdió" (O chuego que me perdió), t'o disco homenache a Jackson Browne "Cántame mis canciones" (Canta-me as mías cancions), estando-ne una versión en castellano de "Call it a loan" (Clama-lo un amprén), de Browne. Ista canción, producita por Gonzalo Lasheras, s'en graba entre Madrit y Los Angeles, y participa-ie a cantaire Jennifer Warnes, conoixita por cancions como "Up where we belong" (O puesto a on que perteneixemos), d'o film "An Officer and a Gentleman" (Oficial y Caballer), con Joe Cocker, u "(I've Had) The Time of My Life" ((He tenito) Tiempo ta Vivir), d'o film "Dirty Dancing" (Dance Bafuroso), con Bill Medley, y que tamién en treballó con Leonard Cohen u o mesmo Jackson Browne. Dimpués enfila Petisme a suya vista ta un viello prochecto muito deseyato: dedicar un disco a o director cinematografico Luis Buñuel. Asinas, publica en febrero de 2000 o disco-libro "Buñuel del desierto", ta continar con a "Gira de los Buñuelitos", siguindo os trangos de Buñuel cara t'as ciudaz an que i vivió. Empecipia ista chira en Calanda (Teruel) o 22 de febrero d'ixe mesmo anyo, cantando a suya canción "Los sueños se revelan" debant d'a viuda de John Lennon, Yoko Ono, o prencipe d'Asturias, Felipe de Borbón u a presidenta de l'"Academia del Cine de España" (Academia d'o Cine d'Espanya), Aitana Sánchez-Gijón, en os actos d'o centenario d'a naixencia de Luis Buñuel, an que tamién s'inauguró-ie o CBC u Centro Buñuel de Calanda. Seguntes Petisme, os actos bi estioron surrealistas por excelencia.

Dimpués de Calanda, Petisme contina a "Gira de los Buñuelitos" por Zaragoza, Madrit, París, y ciudaz de Francia, Alemanya u os Países Baixos, amás de belunas d'o estato espanyol, encara que a chira no pasa ni por Nueva York, ni por Los Angeles ni por Mexico D.F., an que i son as cenisas de Buñuel. En chunio de 2000 edita o libro de poemas "Buenos días, colesterol" (Buen día, colesterol), libro que será premiato dimpués.

En 2001 participa en conciertos contra o Plan Hidrolochico Nacional y o Trescole de l'Ebro. Tamién iste anyo reculle de l'AIPEP (Asociación Independiente de Periodistas, Escritores y Profesionales de Internet) (Asociación Independient de Periodistas, Escritors y Profesionals d'Internet) ex-aequo con Ángel Guinda, o "Premio al Mejor Escritor del 2000" (Premio a o Millor Escritor d'o 2000) por o libro "Buenos días, colesterol". Dimpués grabará o disco "Metaphora" y escribirá "El Profeta" (O profeta) t'o montache teatral "Pablo Gargallo, un grito en el desierto" (Pablo Gargallo, un chilo en o disierto).

En chinero de 2003 da o suyo refirme t'a "Plataforma de Mujeres Artistas" (Plataforma de Mullers Artistas) contra a violencia de chenero y s'esplaza t'os campamentos d'a chent sahraui acullita en Tinduf. En febrero, un mes antis d'a invasión, ye en Irak decindo no t'a guerra, dando-ie o suyo refirme t'a población civil y fendo un concierto por a paz en Bagdad. Fruito de tota ista experiencia será o suyo libro "El cielo de Bagdad" (O cielo de Bagdad), editato en 2004 por Xordica. Os beneficios d'iste libro son t'os hespitals y a población de Faluya, salvachement enrestita por l'exercito d'os Estaus Unius. En setiembre enguera o prochecto musical "Sacco y Vanzetti".

En febrero y marzo d'o 2004 viacha t'a Palestina ta condenar a construcción d'o "Muro d'a Vergüenya" por parti d'Israel. I participa en bels conciertos. En zaguerías d'o 2008 reculle o "VII Premio Internacional Claudio Rodríguez" de poesía por o suyo libro "Cinta transportadora" (Cinta portiadora). En 2009 graba "Río Ebrio", esleito por a revista Efeeme un d'os 20 millors treballos de l'anyo. En noviembre de 2010 publica o disco "Under wood songs (canciones inéditas 1987-1989)/El océano de las Escrituras" (Cancions baixo as tablas -escenario- (cancions ineditas 1987-1989)/L'ocián d'as Escrituras).

En mayo de 2011 edita "Poemails (nuestra venganza de ser felices)" (Poemails (a nuestra venganza d'estar goyosos)).

Premios

Premio Sial de poesía por Buenos días, colesterol (2000).
Premio de la AIPEP al Mejor Escritor del 2000 (ex-aequo, con Ángel Guinda, por Buenos días, colesterol) (2001).
VII Premio Internacional de Poesía Claudio Rodríguez por Cinta transportadora (2008).
Premio Aragoneses en Madrid de la Fundación Aragonesista 29 de Junio (2010).

Bibliografía

Cosmética y terror, (Olifante, 1984).
El Océano de las Escrituras, (Ediciones Libertarias, 1989).
Habitación Salvaje, (Prensas Universitarias Zaragoza, 1990).
Amor y cartografía (Lola editorial, 1993).
Constelaciones al abrir la nevera, (Hiperión, 1996).
El desierto avanza,(El Europeo, 1997).
Buenos días colesterol, (Sial, 2000).
¿Sueña Dios con Buñueles eléctricos? (El sueño rojo de Buñuel), (Gubierno de Aragón, 2000).
Cuatro días de alquiler, (Lola editorial, 2004).
El cielo de Bagdad, (Xordica,2004).
Soñar en Palestina, (La Torre degli Arabeschi, 2005).
Insomnio de Ramalah, (Eclipsados, 2005).
Teoría del color, (Antología 1977-2006) (Sial, 2006).
Demolición del Arco Iris, (Baile del sol, 2008).
Cinta transportadora (Hiperión,2009).
El océano de las Escrituras, (re-edición enamplata y correchita) (El ángel caído, 2010).
Poemails.Nuestra venganza es ser felices, (Ediciones Amargord, 2011).
La noche 351, (Ediciones Hiperión, aviento 2011).
Canciones. Del corazón a los labios, (Ediciones Hiperión,2012).
Lupanar de Greenwich, (Los Imaginantes Ediciones,2012).
Fast food for Freaks, (Desacorde ediciones,2014).
El lujo de la tristeza,(Olifante,2014).

Discografía

La habitación salvaje, (1990).
Turistas en el Paraíso, (1992).
El Singapur, (1994).
Bailando en campos minados, (1996).
Cierzo (Viento en la sangre), (1997).
Buñuel del desierto, (2000).
La habitación salvaje/Mi zoo privado, (2001).
Metaphora, (2003).
Sacco y Vanzetti (chunto con o Mecánico del Swing), (2004).
Amor entre las cuerdas, (2005).
Éxitos secretos, (2006).
AguaCero, (2008).
Río Ebrio, (2009).
Under wood songs (canciones inéditas 1987-1989), (2010).
El ministerio de la felicidad, (2014).

Participacions

El agua para las ranas. Canciones por la dignidad de la montaña, (2004).
Nueba cozina, disco homenache a Ixo Rai!, (2006).
Abril ye transparent, de Os Chotos, (2010).

Vinclos externos

Datos: Q11054042
Multimedia: Ángel Petisme / Q11054042