Abrir menú principal
Tomás Buesa Oliver
Información personal
Calendata de naixencia 1923
Puesto de naixencia Flag of Aragon.svg Chaca
Calendata de muerte 21 d'aviento de 2004
Edat 81
Puesto de muerte Flag of Aragon.svg Zaragoza
Ocupación Filologo y profesor universitario

Tomás Buesa Oliver (Chaca, 1923 - Zaragoza, 21 d'aviento de 2004[1]) estió un filologo y profesor universitario aragonés, catedratico de luenga espanyola en a Universidat de Zaragoza.[2]

Especializau en o espanyol d'America y en l'aragonés, en vida publicó más d'una cinqüentena de libros y articlos sobre etimolochía, lexicografía y lexicolochía d'estas rechions lingüisticas.

FormaciónEditar

Mayestro titulau dende 1941,[2] principió los estudeos de Filosofía y Letras en a Universidat de Zaragoza ixe mesmo anyo. En 1946 se licencia en a Universidat de Salamanca con sección (especialidat) en Filolochía Hispanica.[2] Obtenió lo doctorau en 1954 con a tesi doctoral titulada Estudio fonético del habla de la comarca de Ayerbe.[2]

Profesor universitarioEditar

Comenzó como profesor universitario en 1950 en a Universidat de Granada. Exerció contino como profesor adchunto a catedra en a Universidat de Salamanca. Entre 1952 y 1956 estió profesor en Bogotá, en a Universidad Nacional de Colombia, y en a Escuela de Periodismo de la Universidad Javierana.[2] D'aquells anyos en America Latina naixería o suyo interés por o espanyol d'America, ambito de treballo recurrent en a suya carrera posterior, que se plasmaría en a publicación de conchunta con Luis Flórez de l'«Atlas Lingüístico y Etnográfico de Colombia» entre que yera investigador en o Instituto Caro y Cuervo d'a capital colombiana.

En 1959 imparte en a Universidat de Sevilla como profesor de Lengua y Literatura Españolas, y arriba a sentar plaza de catedratico de Gramatica Historica en a Facultad de Filosofía y Letras de a dita Universidat, en 1966.[2]

Entre 1963 y 1968 fizo, en chunto con Manuel Alvar y Antonio Lorente, as enqüestas de l'ALEANR.[2] Dende 1969 ocupó la catedra de Gramatica Historica de la Lengua Española en a Facultat de Filosofía y Letras d'a Univesidat de Zaragoza, dica que se chubiló en 1988.[2]

Arias de treballoEditar

Tomás Buesa treballó amplament sobre lo espanyol que se charra en America Latina, con quasi quaranta d'entre as más de docientas publicacions que fizo en vida.[1] En 1954 coescribió con Luis Flórez l'«Atlas Lingüístico-Etnográfico de Colombia», y en 1956, «Indoamericanismos léxicos en español», que fue muit reconoixiu y se consideró una d'as millors investigacions sobre ixe tema.[1] Partindo d'este zaguer treballo de 1956 s'aprestó la primer parte de «El español de América: su elemento patrimonial e indígena» de 1992, que encara ye obra cabal sobre l'aportación de voces nativas a la luenga espanyola en o continent americano.

L'aragonés en BuesaEditar

Tamién destacó a suya fayena en recopilación lexica de parolas aragonesas y sobre o castellano d'Aragón. A suya tesi doctoral, que se remonta a 1956, ya se centró en ixe tema, versando sobre la fabla d'Ayerbe (Plana de Uesca) y sirvió pa que anyos dimpués se caracterizase o «dialecto ayerbense» de l'aragonés, concepto especialment difundiu por as contribucions de filolochía aragonesa en a Gran Enciclopedia Aragonesa, anque en realidat huei sabemos que se tracta d'un eixemplo no tan excepcional d'aragonés meridional, amplament charrau en os semontanos d'a provincia de Uesca.

En relación con a fabla d'Ayerbe, publicó Soluciones antihiáticas en el altoaragonés de Ayerbe con l'Archivo de Filología Aragonesa en 1959, Sufijación efectiva en ayerbense en 1963, y Estado actual de los estudios sobre el dialecto aragonés en 1980.[2]

Treballó tamién a relación entre as fablas de Navarra, País Vasco, Aragón y a Riocha. En 1979 escribió «Unas calas en las hablas de Navarra». En 1983, «Afinidades entre las hablas alavesas, riojanas y navarro-aragonesas», «Apuntes para un panorama lingüístico de los Pirineos» en 1984 y «Estudios filológicos aragoneses» en 1989.[1] Por tot ixo y por más cosas, Buesa estió un elemento motivador pa investigadors de l'aragonés que habrían de venir dimpués.

ReconoiximientosEditar

Tomás Buesa recibió a Medalla d'Honor d'a Institución «Fernando el Católico», de a qual heba estau concellero y rechentau a catedra «Manuel Alvar» más de vente anyos. Fue reconoixiu Profesor Emerito d'a Universidat de Zaragoza, Academico d'a Real Academia Española, de l'Academia Porteña del Lunfardo, miembro d'a chunta directiva de l'Asociación de Historia de la Lengua Española y director de l'Archivo de Filología Aragonesa.[1]

ReferenciasEditar

  1. 1,0 1,1 1,2 1,3 1,4 (es) Necrología, publicada en a Revista de Filología Española Num. LXXXVI, de 2006. Consultada o 3 de mayo de 2019.
  2. 2,0 2,1 2,2 2,3 2,4 2,5 2,6 2,7 2,8 (es) Buesa Oliver, Tomás en a Gran Enciclopedia Aragonesa. Consultau o 3 de mayo de 2019.

Se veiga tamiénEditar