Licenciatura en Filosofía y Letras

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Este articlo tracta sobre a licenciatura de Filosofía y Letras, plan d'estudios extinchiu. Pa atros emplegos de «Filosofía y Letras» se veiga Filosofía y Letras (desambigación).

A licenciatura en Filosofía y Letras estió un plan d'estudios universitarios de licenciatura vichent en Espanya dica 1985 que, en cheneral, aplegaba un conchunto reglau de conoiximientos sobre Filosofía, Literatura y atras Humanidaz. Teneba una duración de cinco cursos academicos.

Anque baixo diferents plans d'estudios se podeba cursar como una licenciatura completa, Filosofía y Letras serviba tamién como plan troncal dende o cual s'accedeba a atras licenciaturas, como Historia, Bellas Artes, Filolochía, etc.

Plan de 1944

En rematar a Guerra Civil, o gubierno de Franco fizo una re-estructuración profunda d'os plans d'estudios universitarios que se feba en o país. O Decreto de 7 de chulio de 1944 definiba os estudios de Filosofía y Letras, con un nuclio de dos cursos, y dividiba la titulación en «Seccions» que teneban que fer parte d'o titol final que obteneba l'alumno. D'ixa manera, un estudiant podeba egresar licenciau en Filosofía y Letras con Sección en Pedagochía, pa estar mayestro, por eixemplo, u con Sección en Filolochía clasica pa estar profesor de latín y griego, etc. O dito decreto definiba las siguients Seccions, que duraban tres cursos cada una:

1. Filosofía.
2. Filolochía Clasica.
3. Filolochía Semitica.
4. Filolochía Romanica.
5. Historia.
6. Historia d'America.
7. Pedagochía.

A mas, o decreto deixaba a posibilidat a o Consejo Nacional de Educación de reglar nuevas «seccions» a partir d'ixe momento.

Plans de 1953 dica 1967

O plan provisional de 1953 extinguiba os estudios reglaus de l'anterior, y redefiniba os contenius d'a licenciatura. A partir d'o decreto de l'11 d'agosto de 1953, Filosofía y Letras pasa a estar un periodo de licenciatura troncal y se perdeba la posibilidat de licenciar-se-ie. A partir d'ixe momento, os alumnos nomás se podeban licenciar en una d'as seccions de licenciatura especializada. O decreto trai as siguients materias:

1. Primer curso (estudios comuns): Luenga y literatura latinas, luenga y literatura arabe u griega, luenga espanyola, Historia universal, Historia cheneral de l'Arte y Fundamentos de filosofía.
2. Segundo curso (estudios comuns): Luenga y literatura latinas, luenga y literatura griega u arabe, Literatura espanyola y as suyas relacions con a Literatura Universal, Historia cheneral d'Espanya y Cheografía cheneral.

Remataus ixes estudios, l'alumno teneba que continar con bella una d'as siete seccions anteriors, pero con un plan estricto d'as asignaturas impartidas.

En 1967 se revisa os contenius de a licenciatura, y se precisa nuevas asignaturas tanto en os cursos d'estudios comuns como en os d'especialización. Tamién se define cuantas horas de formación son menester de cada asignatura.

Plans de 1973 dica 1985

O nuevo plan de 1973 redefine a estructura d'a licenciatura y, anque mantiene a duración de cinco cursos, dota de tres anyos a o primer ciclo y de dos a o segundo. As «seccions» quedan agrupadas adintro de «divisions».

• División de Filolochía:
  • Sección de Filolochía Clasica.
  • Sección de Filolochía Francesa.
  • Sección de Filolochía Chermanica (anglés).
  • Sección de Filolochía Hispanica.
  • Sección de Filolochía Romanica.
  • Sección de Filolochía Semitica.
• División de Filosofía y Ciencias d'a Educación:
  • Sección en Filosofía.
  • Sección en Pedagochía.
  • Sección en Psicolochía.
• División de Cheografía y Historia.
  • Sección de Cheografía.
  • Sección d'Historia.
  • Sección d'Historia de l'Arte.

Se veiga tamién

• Licenciatura en Cheografía y Historia.

Referencias

• Datos: Q65393828