Abrir menú principal
Carraz de serbas.

As serbas (tamién ditas en masculino, serbos) son os lulos caracteristicos d'os árbols y arbustos compresos en o chenero Sorbus, que perque las producen reciben o nombre popular de serberas.

Tecnicament, baixo criterios botanicos, as serbas son pomos carnosos produeitos per a maduración de l'ovario infero de cadaguna d'as flors que se disposan en una panicula u corimbo (inflorescencia) que caracteristicament fan ixas especies, que no sen puede pas considerar infructescencias per estar totz os lulos demanatos d'una flor individual.

Os fruitos de Sorbus son arronchadetz, de color carateristicament roya, anque bi n'ha tamien de naranchas u amarelliscos. Qualques especies en o chenero los tienen comestibles, como la pixortera (Sorbus aucuparia) u la moixera u mostallonero (Sorbus aria), pero son especialment consumitas as que produz Sorbus domestica, la més quiesta d'as especies europeas d'este chenero. O nombre d'a moixera en l'Alto Aragón oriental demana d'as suyas serbas, que particularment en a especie sen diz «moixes»[1] (en bells puestos, deformato a moches > «monches»). En a zona occidental a serba de S. aria se i diz «mostallón», y l'árbol en conseqüencia, mostallonero.[1]

As serbas son tamién conoixitas en muitos lugars de tot Aragón con l'ambiguo y inespecifico nombre de «cerollas/acerollas», «zarolas» u «ceruellas» (as tres demanan d'o latín «cereŏla»), que comparten con os fruitos d'a cerollera domestica (Prunus domestica) y con altras especies en a mesma familia Rosaceae, especialment en o caso de Sorbus domestica, que per estar més grandizas presentan qualque cosa de similitut con a dita fruita.

Se veiga tamiénEditar

ReferenciasEditar

  1. 1,0 1,1 (an) VIDALLER TRICAS, Rafael; O Libro d'as Matas y os Animals; Dizionario aragonés d'espezies animals y bechetals; Ed. Bal de Onsera. Zaragoza, 2004. ISBN 978-84-89862-35-7