Morrena
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Una morrena ye un conchunto de materials de diferents midas que transporta un glaciar y sedimenta a on se funde. Son materials que cayen en lo glaciar u que son erosionaus por él en las marguins u en lo substrato. Lo concepto de morrena se solapa con lo concepto sedimentolochico de till, pero "morrena" ye un termin cheomorfolochico que se refiere a la forma de releu feita de sedimentos glacials u till.
D'acuerdo con la suya posición con respecto a lo glaciar se parla de diferents clases de morrenas:
- Morrenas laterals: materials que cayen dende las parez de la val con forma d'U a los cabos de lo glaciar de val y tamién de materials que lo glaciar erosiona en las suyas marguins.
- Morrenas centrals: se forman por unión de dos morrenas laterals de dos glaciars de val que confluyen en un forcallo.
- Morrenas de fondón: materials que leva lo glaciar arrocegando-se por lo fondón.
- Morrenas frontals: se presentan en la zona d'ablación a on se funde lo glaciar y sedimentan toz los materials que levaba, presentando continuidat con las atras morrenas.
Morrenas en los Pireneus
editarEn los Pireneus bi ha morrenas de la zaguera glaciación u Würm y morrenas de la chicota edat de chelo. Las primeras se distribuyen dende lo Pireneu axial dica la linia Biescas-Castillón de Sos en lo Prepirineu interior mientres que las segundas se troban en las parz mes altas de las vals pirenencas, sobre tot en lo Pireneu axial.
Bi ha glaciars würmienses en a redolada de Biescas, con la bien conservada morrena frontal de Senegüé. Los arcos morrenicos que bi ha entre Villanuga y Castiello de Chaca ilustran lo retacule d'un glaciar de val dimpués de lo maximo glacial.
Los glaciars posteriors a la gran desglaciación de l'Holoceno conoixioron una expansión mientres la chicota edat de chelo, cuan se facioron morrenas frontals que amuestran las midas que plegoron a tener.[1]. Actualment estos glaciars son en proceso de desaparición abanzata. Son eixemplos destacables de morrenas pirenencas de la chicota edat de chelo:
- Un arco morrenico de lo glaciar de Creuenya.
- Una morrena frontal de lo glaciar de Lliterola.
- Morrenas de los glaciars de Tempestaz y Barrancs dichós los picos Aneto, Espalda y Tempestaz.
- Una morrena en Bardamina correspondient a un glaciar desapareixiu.
Referencias
editar- ↑ (es) Fernando Biarge, José María García Ruiz, Ana Biarge: Roca viva. El modelado del paisaje pirenaico. Diputación de Huesca, 2006 177-183.
Bibliografía
editar- (es) Eumenio Ancochea Soto, Francisco Anguita Virella, Fernando Moreno Serrano: Geología Procesos Externos. Editorial Edelvives, 1990.
- (es) Francisco Anguita Virella, Fernando Moreno Serrano: Procesos geológicos externos y geología ambiental. Editorial Rueda, 1993.
