Biquipedia

Mitolochía galesa

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A mitolochía galesa son huei os repuis de l'antiga mitolochía pre-cristiana d'os antigos britonicos, s'ha conservau prou alterada dica os nuestros días gracias a bel manuscrito medieval galés como lo Libro Royo de Hergest, u Libro Blanco de Rhydderch u os libros d'Aneirin y de Taliesin.

Os cuentos en prosa d'os libros Blanco y Royo son conoixidas como los Mabinogion, títol dau por a suya primera traductora, Lady Charlotte Guest, y emplegau dimpués por os siguients traductors. Poemas como lo Cad Goddeu (u tamién dito A Batalla d'os Arbols) y as Triadas d'a Isla de Bretanya (en galés Trioedd Ynys Prydein) tamién contienen a-saber-lo material mitolochico.

Atras fuents son Historia Britorum, una compilación historica d'o sieglo IX en latín y Historia Regum Britanniae, escrita por Godofré de Monmouth en o sieglo XII. Tamién o folklore tardano replegau por W. Jenkyn Thomas (1908) en The Welsh Fairy Book.

As cuatro brancas d'o Mabinogi

editar

As historias con mas conteniu mitolochico d'a colección de Mabinogion se dicen en conchunto As cuatro brancas d'o Mabinogi. O filo argumental en as cuatro brancas ye a vida de l'heroi Pryderi. Ye concebiu, Ye naixiu y li se posa nombre en a primera branca, luita por Bran Vendigeit en a segunda, pierde y recupera o suyo reino en a tercera, pero as mencions en a segunda y a cuarta son anecdoticas, pus se centran mas en os fillos de Llyr y os fillos de Dôn, dos clans de personaches que se remontan a antigos dioses celtas.

Pwyll, Prencipe de Dyfed

editar

A primera branca recenta como Pwyll, o principe de Dyfed, cambia o suyo lugar por una anyada con Arawn, o sobirán de Annwn (o inframundo), derrota a Hafgan, o enemigo de Arawn, y dimpués troba a Rhiannon, una dama polida que tien una yeugua que no puet estar alcanzada. El consigue a suya man en contra Gwawl, a qui Rhiannon yera promesa, y li da un fillo, pero o nino desapareixe poco dimpués d'a naixetura. Rhiannon ye acusada de matar-lo y ye castigada a levar invitaus en a suya espalda como castigo. Un monstruo agafó o nino y serán Teyrnon y a suya muller qui lo rescatarán y lo criarán como suyo, dicindo-li Gwri pelo dorau, dica que o pareixiu con Pwyll ye claro. Lo tornan a os suyos padres de verdat, a Rhiannon li quitan o castigo y a mesache li posan de nombre Pryderi.

Branwen, filla de Llyr

editar

En a segunda branca, Branwen, chermana de Bran Vendigeit, rei de Britania, ye oferida pa casar-se con Matholwch, rei d'Irlanda. O meyo chermán de Branwen Efnisien insulta a Matholwch mutilando os suyos caballos, pero Bran Vendigeit li da nuevos caballos y trasoros, incluito o caldero machico que puet tornar a vida a os muertos, en compensación. Matholwch y Branwen tienen un fillo, Gwern, pero Matholwch contina maltratando-la, pegando-li y fendo-ne una esclava. Branwen adiestra un paixaro pa ninviar-li un mensache a Bran Vendigeit, que declarará a guerra a Matholwch. O suyo exercito cruza a mar d'Irlanda en naus, pero Bran Vendigeit ye tan gran que lo fa a piet. As naus no podeban pasar por o río Llinon y el mesmo fació de puent, dicindo: que aquel que siga chefe faiga de puent. Os irlandeses ofreixen a paz y costruyen una casa prou gran pa recibir a Bran, pero drentro penchan un ciento de 100 sacos. Li dicen a Efnisien que yeran sacos de farina, pero en realidat i yeran guerrers armaus. Efnisien aprieta os sacos y mata a toz os 200 guerrers menos menos a un. Dimpués en o banquet, Efnisien tira a Gwern a o fuego y luitando fuye. Esto creya confusión y comenzó a batalla entre os dos exercitos. Os irlandeses emplegan o caldero pa resucitar a os suyos muertos. Efnisien s'amaga entre os cuerpos y fa esclatar o caldero, morindo. Nomás que siet hombres, toz galeses, sobreviven a la batalla, incluindo Pryderi, Manawyddan y Bran Bendigeit, que ye feriu de muerte por una lanza enverenada. Bran demanda a os companyers que li tallen a cabeza y que la tornen a Britania. Branwen muere de pena tornando a o suyo país. Cinco mullers prenyadas sobreviven y repueblan Irlanda.

Manawyddan, fillo de Llyr

editar

Pryderi y Manawyddan tornan ta Dyfed, a on Pryderi se casa con Cigfa y Manawyddan con Rhiannon. Manimenos una boira baixa a ran de tierra dixando-lo tot vuido y desolau. Os cuatro aguantan cazando a o principio. Alavez se'n van ta Anglaterra, a on se ganan a vida fendo siellas, escudos y zapatos de tanta cualidat que os artesans no i pueden competir, y los fan fuera de cualsiquier lugar a on vaigan. Tornan ta Dyfed y se tornan a fer cazataires. Mientres cazan un chabalín blanco los leba ta un castiello misterioso. Pryderi i entra no fendo caso a o consello de Manawyddan. Rhiannon i entra pa investigar y lo troba con as mans apegadas a una copa y sin poder fablar. Ella agafa a copa, li se pegan os piez a las recholas y le pasa lo mesmo que a Pryderi. O castiello desapareixe con ellos adintro. Manawyddan y Cigfa tornan ta Anglaterra como zapaters, pero atra vegada os zapaters locals los fan fuera y se'n tornan ta Dyfed. Ellos veyen tres campos de trigo, pero o primero ye malmeso antes d'a cullita. A l'atra nueit o segundo tamién. Manawyddan cusira o tercero y vei que a culpa ye d'os xoriguetz. Agafa a o capitoste d'os xoriguez y decide penchar-lo. Un escolán, un mosen y un bispe li ofreixen regalos a cambio d'a vida d'o xoriguet, pero Manawyddan no acepta. Li preguntan que que quiere a cambio d'a vida d'o xoriguet y diz que quiere que li retornen a Prydery, Rhiannon y que Dyfed dixe d'estar maldau. O bispe diz que ye d'alcuerdo, porque o xoriguet ye en realidat a suya muller y que el yera fendo una guerra machica contra Dyfed porque ye amigo de Gwawl, a qui Pwyll, o padre de Pridery heba humillau.

Math, fillo de Mathonwy

editar

Mientres Pryderi gubierna Dyfed, en o sud de de Galas, Math ap Mathonwy gubierna en Gwynedd, o norte de Galas. Os piez suyos han de descansar dencima d'as gambas d'una moza virchen, menos cuan luita en a guerra. O sobrino de Math, Gilfaethwy ye enamorau de Goewin, a moza que aguanta os piez. Gwydion, o chermano de Gilfaethwy, enganya a Math pa que se'n vaiga a fer a guerra contra Pryderi, y asinas que Gilfaethwy pueda tener contacto con ella. Gwydion mata a Pryderi en un combat singular y Gilfaethwy fuerza a Goewin. Math se casa con Goewin y la salva d'a desonor. Castiga a Gwydion y Gilfaethwy transformando-los primero en ciervos, dica que paren un cervato, dimpués en tocins dica que paren un litón, y a o remate en lobos, dica que paren, y a o tercer anyo tornan a forma humana y a casa.

Math necesita una nueva virchen que aguante os suyos piez, y Gwydion li ofreixe a suya chirmana, Arianrhod. Math prueba con machia a suya virchinidat, no pasa a prueba y pare dos fillos. Arianrod tira a o primero, Dylan Eil Ton, a la mar, y se niega a reconoixer a o segundo. A o segundo lo cría Gwydion, pero Arianrhod li dice que nunca no tendrá ni nombre ni armas si ella no li'n da, y se niega a da-li-ne. Pero Gwydion la enganya pa que sin saber-lo li de nombre y li de armas: Llew Llaw Giffes. Alavez ella diz que nunca no tendrá muller de garra raza que viva en a tierra. Asinas Gwydion y Math fan una muller con flors, dito Blodeuwedd. Pero Blodewedd s'enamora de un cazataire dito Goronwy, y piensa en matar a Llew. Blodeuwedd enganya a Llew preguntando-li a sola manera como li-se puet matar, y dimpués dicindo-li-ne a Gronw, pero cuan Gronw preba de matar-lo, Llew escapa trasformau en una alica.

Gwydion troba a Llew, lo torna a trasformar en hombre, y castiga a Blodeuwedd trasformando-la en choliba. Grown ofreixe compensar a Llew pero Llew se niega y insiste en vengar-se. Gronw demanda amagar-se dezaga una roca cuan el prebe de matar-lo y Llew acepta. Mata a Gronw con su lanza, chitada con tanta fuerza que forata a roca dezaga d'a on s'amagaba Gronw.

Lludd y Llefelys

editar

Un atra historia mitolochica incluita en o a colección de Mabinogion ye o cuento de Lludd y Llefelys. Lludd ye rei de Britania, y su chirmán, Llefelys, ye rei de Francia. O reino de Lludd ye acosau por tres amenazas: los Coraniaid, un pueblo de diablos que pueden sentir-lo tot; un chilo terrible que se siente toz os 1 de mayo y atemoriza a la población y a desaparición cutiana de provisions d'a cort reyal. Lludd demanda aduya a Llefelys charrando con él por un tubo de metal pa que os Corianiaid no puedan sentir-lo. Llefelys creya una poción con insectos esclafaus en augua que acotola os Coraniaid cuan les ne ruxia. O chilo, descubre que bien de dos dragons luitando. Los fa beber aguamiel y ya capins los fa cremar en o centro de Britania. Vence a o bruixo que yera robando las provisions reyals y lo fa siervo de Lludd.

Culhwch y Olwen

editar

Encara que Culhwch y Olwen, se trobe en a colección de Mabinogion, ye principalment una leyenda arturica, en a que o heroi Culhwch s'alista con Artús pa ganar a mán de Olwen, filla d'o chigant Ysbaddaden. Feita con muitos detalles de fondo, muitos d'orichen mitolochico. Personaches como Amaethon, o labrador divín, Mabon ap Modron, o fillo divín y o psicopombo Gwyn ap Nudd fan aparición. O zaguero en una batalla con Gwythr ap Greidawl por a man de Creiddylad. A situación de Culhwch con a suya madre ye pareixida a la de Llew Llaw Gyffes con Arianrhod, y a plegada de Culhwch's ta a cort d'Arthur ye a mesma fegura mitolochica que a plegada d'o dios irlandés Lug ta a cort de Nuada en Cath Maige Tuireadh.

Personaches

editar

Cuan os textos d'a mitolochía galesa s'escribioron os galeses ya yeran cristianos dende fa cuantos sieglos. Os dioses los heban transformaus en reis y herois pasaus a l'estilo medieval. Muitos d'os personaches que tienen caracters divins perteneixen u a a familia d'os fillos de Dôn, Plant Dôn u a a familia d'os fillos de Llyr, Plant Llyr.

Atros d'os personaches y puestos d'estas historias son medievals, como o contexto en que han sido escritos u recullius. Manimenos i trobamos personaches y historias d'a epoca de luita contra a invasión romana (Caradawc y Caswallawn) y mesmo d'a epoca d'expansión celta por os Balcans y norte d'Italia (Mabinogion de Branwen).

En a mitolochía galesa, tamién i trobamos personaches meyo historicos y meyo lechendarios como Artús, Merlín, Gwalch Mai, Peredur, que resistiban a invasión anglosaxona y esto ha desembocau en a creyación d'uno d'os ciclos literarios mas importants en a edat meya europea: a materia de Bretanya u d'a Tabla Redonda, salindo-se-ne ya d'o contexto d'a mitolochía galesa propiament dita, porque son mitos meyo cristianos meyo pagans prou ixemenaus en tota a Europa occidental, probablement gracias a un substrato celta afín.

Os fillos de Dôn

editar

Dôn, chirmana de Mathonwy, yera a matriarca de la familia. Fegura como o suyo mariu Beli. Os fillos son:

Esta familia tamién incluye a os fillos de Arianrod, Dylan y Llew Llaw Gyffes. Caswallawn (o historico Cassivellaunus), Lludd, Nyniaw, Llefelys, y Penarddun son ditos fillos de Beli Mawr, que a vegadas ye visto como mariu de Dôn.

Os fillos de Llŷr

editar

Llŷr, o patriarca de l'atra familia, ye posiblement amprau d'o Lir, o dios d'a mar d'a mitolochía irlandesa. L'orichen forano lo suchiere o epiteto Llediaith. Figura como a suya muller a vegadas Penarddun, y os fillos son:

Penarddun tamién tien dos fillos, Nisien y Efnisien, con Eurosswydd. Caradawg (o historico Caratacus) ye dito fillo de Bran Vendigeit.

Atras deidaz probables

editar

Atros personaches

editar

Personaches arturicos

editar
Obteniu de "https://an.wikipedia.org/w/index.php?title=Mitolochía_galesa&oldid=2206872"