Loess
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Lo loess (de l'alemán de Suiza lösch, en alemán estándard Löss u Löß con a grafía antiga) ye un sedimento sin estratificación con clastos de mida limo, inferior a los 0,0625 mm. Ye un sedimento continental d'orichen eolico[1] y representa materials que lo viento ha erosionau por deflación eolica y ha transportau por suspensión grans distancias dica sedimentar en grans superficies. En bellas zonas los depositos de loess s'han formau en medios periglacials por deflación en sedimentos morrenicos. Lo loess permite la formación de suelos fértils.
Composición
editarPredomina lo cuarz, pero son presents tamién los feldespatos, las micas, y la calcita, y una chicota part d'archila. Los oxidos de fierro dan una color amarillenca caracteristica.
Caracteristicas
editar
En lo loess s'observa una buena granoselección y los diametros de los clastos gosan estar entre los 0,02 mm y 0,05 mm. No bi ha una estratificación reconoixible, la color gosa estar amarillenca.[2]. Son clastos angulosos, y la sensación táctil que da este sedimento ye liucherament aspra como la de l'arena fina. A vegadas se i forman concrecions de calcita y limonita. Las concrecions de calcita arredol de las radices y piedras prenen formas curiosas ditas "ninas de loess". En los sedimentos de loess recient d'Europa se troban fósils de gasteropodos como Pupilla muscorum, autentico fósil guía d'estas formacions cheolochicament recients.
Formación
editarL'acción cheolochica de lo viento sobre los continents puet estar important en rechions fridas a man de los cerclos polars a on bi ha extensas arias cubiertas por morrenas y sedimentos fluvio-glacials, sedimentos que cuan no son protechius por las nevadas ya no son protechius por la vechetación, que ye escasa u inexistent. D'esta traza los vientos polars fan una important deflación eolica.
Los depositos de loess d'Europa representan una erosión por deflación en las morrenas que iban deixando las cheleras en lo suyo retacule en los zaguers 20.000 anyos.[3] La sedimentación s'habría produciu muitos kilometros a lo sud de la zona a on fue erosionau lo limo por la interacción de los vientos polars con los vientos procedents de lo sud.[4]
Importancia
editarLo loess ye lo sedimento eolico mes important. Las acumulacions de loess mes importants se troban en China, con espesors de mes de 100 m.[3] Tamién bi ha masas importants en la Patagonia y Canadá. Lo loess d'Europa cubre amplas rechions d'Europa Central y Oriental. Los depositos de loess pueden plegar a los 10 m de grosor[1] en Europa.
Erosión de las formacions de loess
editar
L'augua de plevia erosiona a escape lo loess, plegando lo limo facilment a los barrancos, torrents y ríos, achents cheolochicos que lo transportan en suspensión. En China lo limo en suspensión da color amariella a lo río Huáng Hé u "Río Amariello".
En Europa la erosión de lo loess tiende a formar parez verticals y forma a sobén espuendas. Los camins tradicionals de paso en arias de loess se converten a sobén en canyadas u cabanyeras con parez talladas con cierta fondura.[2]
Procesos edaficos
editarUn deposito de loess evolucionará ta un suelo aloctono. En profundidat lo loess sin meteorizar representa un horizont C. En Europa la evoción edafica d'estos materials conduce a la descalcificación de la part superior de lo deposito.[1]
Referencias
editar- ↑ 1,0 1,1 1,2 Alain Foucault y Jean-François Raoult Diccionario de Geología. Masson, 1985.
- ↑ 2,0 2,1 Walter Maresh, Olaf Mendenbach Las Rocas Guías de Naturaleza Blume. 1990. pp166
- ↑ 3,0 3,1 Eumenio Ancochea Soto, Francisco Anguita Virella, Fernando Moreno Serrano. Geología Procesos externos. Editorial Edelvives. pp 114
- ↑ Francisco Anguita Virella, Fernando Moreno Serrano. Procesos geológicos externos y geología ambiental. Editorial Rueda, 1993. pp 121
Bibliografía
editar- Eumenio Ancochea Soto, Francisco Anguita Virella, Fernando Moreno Serrano. Geología Procesos externos. Editorial Edelvives, 1990.
- Francisco Anguita Virella, Fernando Moreno Serrano. Procesos geológicos externos y geología ambiental. Editorial Rueda, 1993.
- Walter Maresh, Olaf Mendenbach "Las Rocas" Guías de Naturaleza Blume. 1990.
- Alain Foucault y Jean-François Raoult Diccionario de Geología. Masson, 1985.
