Ferranyal

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Un ferranyal ye como se diz a un campo sembrato con segal u atro cerial verde (ferraina) u un campo on se gosa sembrar hierbas leguminosas (alfalz, beza, esparceta), familia de plantas con gran importancia pa o suelo y alimentación porque prenen o nitrocheno atmosferico y sintetizan mes aminoacidos que no atras plantas.

Un ferranyal

En os dos casos a finalidat ye conseguir hierba pa que minche o bestiar. En o primer caso o bestiar paixenta a fins d'agüerro sin que desapareixca a hierba dimpués d'hibierno (cuan se solta o bestiar a paixentar en os ferranyals se diz dar a ferraina u correr a ferraina). En o segundo caso, os propietarios dallan as leguminosas pa ferraina.

I hai un dito en aragonés que ye trobar-se como uella en ferraina, que se diz cuan beluno se troba muit bien en bel puesto.

Como testimonio d'a importancia d'os ferranyals en a economía agricola y pastoril, figuran en os textos medievals, como elementos romances en textos latinos y como zaguers aragonesismos en o estándard escrito medieval, que tendeba a imitar o modelo castellano. Por eixemplo en o documento lº 1271 de l'Archivo d'a Comunidat de Teruel:

Si tienen casas, palomares, colmenares, eras, pajares, masadas, ferrenyales, pieças de tierra, cafranares, cerradas, prados, vinyas, huertos, ...

En a Comunidat d'Albarracín deciban ferrenyal a un campo chicot sembrato con graminias situato en as heredatz a man d'as viviendas. Estos campos yeran destinatos a alimentar a lo bestiar de labor mientres a primavera, y pa evitar o pastoreyo con uellas u crabas se feban unas tapias de piedra y arbustos, y por ixo huei lis dicen cerradas en o castellano local, pero encara en a Sierra d'Albarracín tamién los se denominan erreñales u arrañales. A o texto d'a sentencia de Rodenas de 1543 se nombran muitos ferreñales.

En o sieglo XV escribiban fereginal (/ferechinal/) en Mirambel, que puet estar un catalanismo fonetico:

620.(tachado: Item, en apres fue visto por los ditos officiales e contadores el dito Johan Miguell haver recebido por las liuras de Verthomeu Miralles que no eran en el libro de Johan Miguell, que son cinquanta una lliura, e por las liuras del pedrapiquero del fereginal de Flovia que son ocho liuras, e de Jayme de Verra mayor, que son ocho lliuras.

Toponimia

A importancia d'os ferranyals en a economía rural se manifiesta en a toponimia. Chesús Vázquez Obrador localiza en un texto de 1431 de Panticosa o toponimo Ferrionals, pero huei en l'alto Galligo se diz d'atras trazas como ferrainar.

En o sud d'a provincia de Teruel muitos antigos ferrenyals corresponden a microtoponimos con a parola cerrada u cerradica en muitos casos, por a tradición d'aislar-los con una tapia, pero tamién se troban microtoponimos que derivan de ferrenyal como arrenyal y arronyal en Tormón u a carrera Arreñales del Portillo en l'arrabal de Teruel. En Blesa como microtoponimo coexiste farranyales y arrañales.

Os ferranyals figuran en a toponimia y microtoponimia catalana, por eixemplo en Freginals. En a toponimia de Benavarri trobamos Es Farranyals, Els Ferrinyals, Farranales, El Ferrenyal, Farrenyal.

Bibliografía

• (es) Chesús Casaus Parrilla y Pascual Miguel Ballestín: Dizionario de terminos cheograficos. 2008 Ainas. Gara d'Edizions.
• (es) José Manuel Abad Asensio: Algunas Ordenanzas de la Comunidad de Aldeas de Teruel, en Aragón en la Edad Media XIX 2006.

Se veiga tamién

• Boyaral.
• Defesa.
• Mosquera.
• Pastura.
• Saleguiella.

• Datos: Q13049041