Pandicosa

Pandicosa (Panticosa en castellán) ye un municipio d'a provincia de Uesca situato en a comarca de l'Alto Galligo. A suya población ye de 800 habitants en una superficie de 95,9 km² y una densidat de población de 8,34 hab/km².

Pandicosa
Municipio d'Aragón
Vista de Pandicosa.
Entidat  • País  • Provincia  • Comarca	Municipio  Aragón  Uesca Alto Galligo
Superficie	95,9 km²
Población  • Total  • Densidat	800 hab. (2013) 8,34 hab/km²
Altaria  • Meyana	1.184 m.
Distancia  • 93 km	enta Uesca
Alcalde	Ricardo Laguna Belio
Codigo postal	22661
Chentilicio	panticuto/a
Parroquial  • Diocesi  • Arciprestato	Bispau de Chaca Biescas
Ríos	Caldarés y río Bolatica
Coordenadas	42°43’27’’N 0°17’ 3’’U
Pandicosa Pandicosa en Aragón
Web oficial

As chents de Pandicosa son conoixitas con o chentilicio de panticutos anque a suya embotada en a val ye a de "malcalzaus" u "mangarrotas".

Cheografía

Un prau en o lugar de Pandicosa

Se situga en a parti central d'a val de Tena chunto a os ríos Caldarés y Bolática a 1.184 metros d'altaria. D'antis más formaba o Quinyón de Pandicosa chunto a O Pueyo de Tena y Oz de Tena. Hue forma un termin municipal independient chunto con O Pueyo (dende 1970) y os Banyos de Pandicosa.

Rodiata d'alteras montanyas, muitas d'ellas fan curiosas formas y ye por ixo que os habitants de Panticosa lis dan nombres como "a cara de Dios" (entre Piniecho y Baldairán), "o Indio", "o Triptico" u "a Forqueta ras Palomas" (en a zona de Telera) u a mas conoixita de totas, "a Muller Dormita" (entre Bucuesa y Lana Mayor), formando a suya capeza y naso Os Cuchitars, o peito Pena Nevera, a centura As Canals de Bucuesa, o chenullo Pala Rayos y o piet Pena Retona.

En iste municipio se troba a estación d'esquí d'Aramón Panticosa.

Historia

Os romans ya conoixeban y aproveitaban as auguas termals de l'actual balneyario de Pandicosa. Bi ha repuis d'un balneyario román de dificil acceso con monedas d'ofrenda d'a epoca d'Augusto y Tiberio.

A primera vegata que apareixe documentata Pandicosa ye en o sieglo XIII como capital d'o Quinyón de Pandicosa. Allora a ciudat se dividiba en quatre vicos: o vico de Santa María que se trobaba a on hue ye a ilesia, o vico de San Salvador chunto a l'ermita d'o suyo nombre (actual fosal) y os vicos de Sus (actual "ro Vico") y d'Exena que desapareixió chunto a la suya ermita en o sieglo XV.

Alifonso XII iba muito ta o balniario moderno de Pandicosa y esto esplica parte d'a decoración d'o complexo hotelero.

Parla

A parla panticuta ye a forma millor conservata y mas viva de l'aragonés tensino.

Nombre

O suyo nombre puet venir d'o latín FONTICOSA con influencia fonetica vasca que por no tener F- inicial a sobén la adapta ta p- como en pago, cosa que se vei tamién en l'aragonés pantasma. A forma con -nd- la documentó como minoritaria Francho Nagore quan fació a tesi sobre l'aragonés local y ye documentata en unos textos medievals entre 1425 y 1450.

Demografía

Evolución demografica

2003 2004 2005 2006 2007 2008 2009 2010 2011 - - - 613 - - - - -

2012 2013 2014 2015 2016 2017 2018 2019 2020 - - - - - - - 784 -

2021 2022 2023 2024 2025 2026 2027 2028 - - - - - - - - - -

1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración

Reparto de concellers

Eleccions municipals
Partito	1979	1983	1987	1991	1995	1999	2003	2007	2011	2015	2019
Partido Popular	-	4	-	3	5	5	3	3	4	5	4
Partido de los Socialistas de Aragón	3	1	4	0	2	2	4	4	3	2	3
Partido Aragonés	-	1	1	0	0	-	-	-	0	-	-
Independients	2	1	-	4	-	0	-	-	-	-	-
Centro Democrático y Social	-	-	2	0	-	-	-	-	-	-	-
Unión de Centro Democrático	2	-	-	-	-	-	-	-	-	-	-
Total	7	7	7	7	7	7	7	7	7	7	7

Alcaldes

Lista d'alcaldes

Lechislatura	Nombre	Partito politico
1979–1983	José María Lapuente Laguna	Independient
1983–1987
1987–1991
1991–1995
1995–1999	Luis Guillén Calvo	Partido Popular
1999–2003	Luis Guillén Calvo	Partido Popular
2003–2007	José Luis Pueyo Belío	Partido de los Socialistas de Aragón
2007–2011	José Luis Pueyo Belío	Partido de los Socialistas de Aragón
2011–2015	Ricardo Laguna Belío	Partido Popular
2015–2019	Ricardo Laguna Belío	Partido Popular

Molimentos

Ilesia parroquial.

A suya ilesia parroquial ye adedicata a l'Asumpción de Nuestra Sinyora. D'estilo gotico tardano (sieglo XII) tien planta rectangular y tres naus desapartatas l'una de l'atra por columnas celindricas. O retablo mayor se fació en o sieglo XVIII, anque se cremó quasi de raso en 1978. Atros retablos intresants son os d'os Santos Fundadors, Inmaculata (sieglo XVIII, tamién cremato graument en o incendio de 1978), d'o Rosario (sieglo XVII), de Sant Lorient (sieglo XVI) y d'a Epifanía (sieglo XV). A ilesia ye protechita legalment dende 2002 con a suya declaración como Bien d'Intrés Cultural.

Bi ha tres ermitas en Pandicosa adedicatas a Sant Salvador, Sant Per y Sant Chuan.

Entre a resta de construccions d'a villa destacan a Fuande de ro Vico d'os sieglo XIX u los puents Viello sobre o Caldarés y A Zoche sobre o río Bolatica.

Son a-saber-las as fuents (localment fuandes) que se troban arredol de Pandicosa como son Fuenfría d'Ordicuso a Fuent de Yenefrito, Escalar-La Laguna u Fuent Salata.

Presonalidatz naixitas de Pandicosa

• Categoría principal: Naixitos de Pandicosa.

Gastronomía

• Bodela.
• Zandrifuella.

Bibliografía

• Toponimia Tensina. Ana María Escartín Santolaria. Ed Yalliq. ISBN 978-84-934262-5-5

Vinclos externos

• Se veigan as imáchens de Commons sobre Pandicosa.
• (es) Pachina web municipal.
• (an) Pandicosa.