Cuenca sudpirenenca
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
La cuenca sudpirenenca estió una cuenca d'antepaís activa d'entre Paleocheno a lo sud de l'orocheno pirenenco cuan encomenzaba a alzar-se. La evolución d'esta cuenca a partir de l'Eoceno inferior fizo que quedás troixada en diferents cuencas menors: sudpirenenca oriental, Ager, Graus-Tremp, L'Aínsa y Chaca-Pamplona.[1]
Historia cheolochica
editarUn río gran de cauz meandriforme recorreba esta fosa en dirección a la suya boquera en l'actual País Basco, y recibiba l'augua y los sedimentos terrichenos de los tributarios que baixaban dende las sierras pirenencas que se plegaban y s'incorporaban progresivament a las laminas cabalgants de las napas tectonicas.
Por un tiempo la subcuenca de Graus-Tremp yera desapegada de lo substrato herzinico y carriada enta lo sud por las napas tectonicas como una cuenca de piggy-back, a diferencia de la subcuenca de Chaca-Pamplona. Lo resultau ye una evolución sedimentaria diferent: mientres que en la cuenca de Chaca-Pamplona sedimentaban las turbiditas que actualment son vistables como lo flysch, en la cuenca de Graus-Tremp sedimentaban materials terrichenos y de plataforma.[2]
La lamina cabalgant mas antiga de lo sector entre Turbón y Ager ye la de Boixols-Turbón, que d'acuerdo con los almendrons y las discordancias progresivas ligadas a los anticlinals de lo suyo cabalgamiento basal, se formó en lo Campanián-Maastrichtián (Cretacio tardano).
Los materials terrichenos de l'Eoceno inferior de la cuenca d'Ager indican cuan se formó lo cabalgamiento basal de la lamina cabalgant de Montsec, y se sabe por lo almendrons que en l'Eoceno superior bi habió una reactivación.
A la fin, lo movimiento de las napas tectonicas fizo que toda la cuenca sudpirenenca fues transportada enta lo sud y despartida de la depresión d'Ebro por las sierras exteriors pirenencas a traviés de lo gran cabalgamiento frontal de la napa de Gabarnia, a la que se superposó la de Montsec con la cuenca de Graus-Tremp dencima. La cuenca d'Ager se formó entre la lamina de Montsec a lo norte y lo cabalgamiento frontal de la napa de Gabarnia a lo sud.
Cuan colisionó la microplaca iberica con la placa euroasiatica s'aturó la subducción y lo movimiento de las napas tectonicas, l'orocheno pirenenco continó levantando-se y los cursos fluvials prenioron un rechimen torrencial a causa d'un desnivel creixient. Los torrents u barrancos deixoron sedimentos terrichenos en ventallos aluvials que plegoron a achuntar-sen formando un semontano d'almendrons que cubrioron los anteriors sedimentos fluvials.[3] Los almendrons d'estos ventallos fluvials pueden trobar-sen dende Montserrat a l'este dica los mallos de Riglos y Agüero a l'ueste.
Bella depresión desparte las sierras interiors a lo norte y las sierras exteriors pirenencas a lo sud como la cuenca de Graus-Tremp y la cuenca de Chaca-Pamplona,[4][5] y son part de la manifestación topografica actual de las cuencas derivadas de la cuenca sudpirenenca. L'anticlinal de Boltanya desparte las cuencas de Chaca-Pamplona y L'Aínsa.
Referencias
editar- ↑ (es) Antonio Barnolas Cortina: Evolución sedimentaria de la cuenca Surpirenaica oriental durante el Eoceno. Publicau en: Acta geológica hispánica, ISSN 0567-7505, Vol. 27, Nº 1-2, 1992, pp. 15-32.
- ↑ (es) Antonio Barnolas Cortinas et al. Evolución sedimentaria entre la cuenca Graus-Tremp y la cuenca de Jaca- Pamplona. I Congreso Español del Terciario Número 1 de Libro-guía excursión. Editor: Eumo, 1991.
- ↑ (es) Eumenio Ancochea Soto, Francisco Anguita Virella, Fernando Moreno Serrano: Geología Procesos Externos. Editorial Edelvives, 1990. p. 99.
- ↑ (es) Julio Muñoz Jiménez, Concepción Sanz Herráiz: Guía Física de España. 5 Las Montañas. Alianza Editorial, 1995, pp 289-292.
- ↑ (es) Antonio Higueras Arnal (coordinador): Geografía de Aragón Tomo I. Editorial Guara. pp 36-38.
Bibliografía
editar- (es) Ánchel Belmonte Ribas: Guía Geológica del Pirineo, Editorial Pirineo.
- (es) Mariano Marzo Carpio, Salvador Reguant Serra, Xavier Barberà: Estratigrafía del Grupo Fígols (Cuenca de Graus-Tremp,NE de España). Publicau en: Revista de la Sociedad Geológica de España, ISSN 0214-2708, Vol. 10, Nº 1-2, 1997, pp. 67–82.
- (es) Xavier Barberà, Mariano Marzo Carpio, Salvador Reguant Serra, Josep Serra i Kiel, J. M. Samsó, Josep Tosquella Angrill: Estratigrafía del Ilerdiense en la región de Tremp (cuenca de Graus-Tremp, NE de España). Publicau en: Geogaceta, ISSN 0213-683X, Nº. 20, 1, 1996, pp. 73–76.
Datos: Q110099707
