Comunidat d'aldeyas
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
La comunidat d'aldeyas ye una institución medieval que consistiba en una agrupación de las aldeyas arredol d'una ciudat u villa, prenendo-ne lo nombre.
Empecipioron a existir con Alifonso I lo Batallero, que veyendo cara la compensación a los nombres con tenencias a cambio d'aduyas militars, pensó que yera millor que los habitadors de las aldeyas reconquiestas en la extremadura fuesen los mesmos defensors d'ixa tierra.
Son caracters de las comunidaz medievals
- No yeran sinyorías
- Ampla extensión territorial, cubrindo arias encara por poblar.
- Fuero unico, con churisdicción civil y criminal.
- Base común economico-social, agricola, ganadera, aproveitamiento de monts y pasturas, y defensa mutua. En las comunidaz de Teruel y Daroca l'asamblea pa la recaudación d'impuestos se deciba plega u plega cheneral.
- División en sexmas u sesmas.
Las ilesias de las comunidaz yeran patrimonials. Alifonso I lo Batallero dió en lo Fuero de Calatayú a los habitadors de Calatayú y su tierra las rendas de las ilesias de lo suyo territorio. Tamién s'establió que lo clero heba d'estar autoctono, ye dicir las ilesias heban de ser servitas por fillos de la Comunidat, formando l'Arcedianato de Calatayú. Este modelo fue aplicato en las atras comunidaz.
Las cuatro comunidaz que i heba en l'Aragón medieval estioron:
- Comunidat de Calatayú
- Comunidat de Daroca
- Comunidat de Teruel (deseparata de l'anterior)
- Comunidat d'Albarracín
Las relacions entre la cabeza y la comunidat d'aldeyas en las cuatre comunidaz d'Aragón estioron dificils por cuestión de churisdicción, y por diferents intreses economicos, y se distancioron cada vegata mes.
Entre los habitants de las comunidaz d'aldeyas en Aragón cuasi no bi heba nobles ni infanzons, a diferencia de las ciudaz. Los habitants de las aldeyas y de las suyas capitals teneban diferents orichens cheograficos y etnicos (aragoneses, bascos, ribers navarros, castellanos, gascons, mozarabes, ecetra). Cuan a población s'estabilizó los habitants d'estas comunidaz charraban un aragonés con influencia castellana u con caracters de parla de transición con lo castellano.
L'aproveitamiento común de selvas, defesas y pasturas estió una de las causas principals de la desforestación de lo Sistema Iberico en las comarcas de lo surueste d'Aragón, a diferencia de las sinyorías, las arias controlatas por las órdens militars u en las que las selvas yeran de los propietarios de los mases.
La institución de la comunidat d'aldeyas entró en decadencia en lo sieglo XVIII, lo rei Felipe V redució las comunidaz d'aldeyas a corporacions sin dreitos politicos ni churidicos, mantenendo unicament funcions economicas. Un Reyal Decreto en 1837 suprimió la Comunidat de Daroca.[1]
En Castiella i heba una institución equivalent dita Comunidad de villa y tierra.
Referencias
editar- ↑ (es) María del Carmen Ansón Calvo: Azuara y su población según la fogueación de 1647. Revista de historia Jerónimo Zurita, ISSN 0044-5517, Nº 53-54, 1986, pachinas. 43-66
Bibliografía
editar- (es) José Luis Corral Lafuente: La génesis de la comunidad de aldeas de Calatayud, Aragón en la Edad Media, nº 16, 2000, pachinas. 197-214.
Datos: Q8348974
