Cocullada

(Reendrezau dende Cogullada)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Cogullada reendreza enta ista pachina. Pa lo barrio de Zaragoza en a marguin ezquierda, se veiga Cogullada (Zaragoza).

Cocullada u cucullada, y tamién cogullada y cugullada, son os nombres comuns mas frecuents en Aragón que reciben os paixaros silvestres d'a familia Alaudidae, en a orden Passeriformes, con aspecto una miqueta mas robusto y o pico un poquet mas largo que as suyas parients as alodas, pero de mida mas chica que as calandras; lo mas tipicament a especie Galerida cristata, que ye común en territorio aragonés. Igual como ixas atras aus emparentadas, son paixaros tipicos de terrens ubiertos con costumbre de mover-se caminando por tierra.

Una cocullada común (Galerida cristata).

A caracteristica mas notoria ye a cresta sobre a cabeza (tipica de toda la familia) formada por plumas una mica mas largas en istos paixaros, que la fan mas vistable, por o cual se les diz tamién con nombres como aloda de monyo,[1] aloda monyuda[1] u calandria monyada.[1]

Cocullada y cogullada editar

En buena cosa d'Aragón os nombres vernaclos d'istos paixaros pareix que son bien presents en a lengua viva, mesmo cuan a lengua habitual ye o castellano aragonés, y forman un elemento de lexico residual propio de l'idioma aragonés que ha quedau en o castellano, a modo de substrato, cuan a lengua autoctona s'ha perdiu en muitos municipios. Isto pasa tamién con os nombres de muitos atros animals, porque, como se sabe, os nombres coloquials d'animals y plantas silvestres se gosan trobar (en chunto con os oficios y as fayenas d'o campo) entre os elementos de substrato aragonés que mas y millor perduran en o castellano d'Aragón dimpués de que ixe haiga substituiu a l'idioma autoctono, a sobén fa cuantas cheneracions.

Cocullada editar

A forma con /k/ intervocalica, tanto en a forma «cocullada» como en a variant «cucullada», tiene una distribución mayoritariament oriental en o mapa aragonés, documentando-se (d'alcuerdo con a obra especializada de Vidaller)[1] en municipios y nuclios de población que son encara aragonesoparlants de Sobrarbe y a parte aragonesoparlant de Ribagorza, y en atros a on que l'aragonés s'ha perdiu entre fa pocas decadas y un u dos sieglos, en a Cinca Meya, Litera, Semontano de Balbastro, y os Monegros. Tamién se documenta en municipios tan en o sud como Castelserás[1], en a parte teruelana d'o Baixo Aragón, y en a comarca d'o Baixo Martín.

Como excepción, «cucullada» ye una d'as dos formas documentadas por Vidaller en Echo[1] (Chacetania), que ye bien en o norueste aragonés. Isto podría estar un indicio de que as formas con /k/ intervocalica representan en realidat una conservación d'a consonant dende l'etimo latín <cuculliāta* ("con cucullio", «a que lieva un capirote») y no pas variants diatopicas.

Cogullada editar

A forma con /g/ intervocalica, que como l'anterior tiene dos manifestacions posibles: «cogullada» y «cugullada», y se documenta en nuclios aragonesoparlants como Echo,[1] en a comarca de Chacetania, y en Luesia,[1] en Cinco Villas, en a zona noroccidental d'Aragón. Manimenos, en Salas Altas (Semontano de Balbastro) y en Monzón, «cogullada» s'ha trobau en coexistencia con a forma con /k/ «cocullada».[1]

Con a forma mutada «cubillada» la trobamos en Alloza (comarca d'Andorra-Sierra d'Arcos) y como «cubullada» en Peralta de la Sal,[1] en Litera. En o termino municipal de Zaragoza se documenta la forma «cucurullada»,[1] pero en a capital aragonesa existe tamién o caso millor conoixiu d'o barrio de Cogullada,[1] o suyo nombre dimana indirectament d'iste animal.

Etimolochía editar

A parola «cocullada» dimana d'o latín <CUCULLIĀTA*, que significaría «a que lieva un cocullón» u «capirot»[2] sobre a cabeza. A parola CUCULLIO, -ŌNIS designa un tipo de birreta en latín.

Referencias editar

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza, 2004. ISBN 978-84-8986-235-7
  2. (es) «Cogujada» en a edición en linia d'o Diccionario de la Real Academia, consultau o 27 de chulio de 2018.

Vinclos externos editar