Can de chira

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre os cans de chira como animals que tienen iste oficio. Ta la raza oriunda de o Perineu aragonés, se veiga Can de Chira altoaragonés.

A denominación can de chira u de chirar, con sinonimos como can d'atura, u d'aturar, s'aplica tradicionalment, en aragonés, ta referir-se a os eixemplars de cans, de cualsiquier raza u aspecto, que se cría y se fa servir ta conducir as ramadas de bestiar domestico.

Dende o punto d'envista de l'oficio que fan, os cans de chira forman un d'es dos grupos que, en chunto con os cans de guarda de ganau, conforman o que bels autors han quiesto denominar o grupo profesional d'os cans de pastor; os animals que tradicionalment participaban en a transhumancia y belatras actividaz ganaderas.

Anque en l'actualidat cuente con bel uso mas concreto, a denominación can de chira existe en aragonés de forma tradicional y, en orichens, no fa pas referencia a garra raza canina en concreto. Manimenos, en os zaguers tiempos s'ha feito servir o nombre de can de chira, a modo d'aragonesismo lexico, tamién ta referir-se a la raza que tradicionalment s'emplegaba en os Pireneus centrals d'Aragón ta fer a dita función (que en l'actualidat se troba en proceso de recuperación), de forma diferencial y especifica, sobre tot en l'ambito d'os criadors y afeccionaus, que son mayoritariament de luenga castellana. Por ixo, a influencia de l'uso d'iste termin en castellano puede inducir a ambiguedat en aragonés, idioma d'a on que dimana en primeras o termino.

Etimolochía

Os cans de chira que s'ha criau de siempre en as nuestras latituz son de forma y dimensions achustadas ta treballar con as uellas y as crabas que formaban a cabanya ganadera predominant.

A denominación mayoritaria ta os animals que fan iste oficio, en l'Alto Aragón, ye can de chira (u a suya variant can de chirar). L'apelativo de chira u de chirar fa referencia a l'acción de fer chirar^[1] (de o latín GYRARE) u escorrechir os ganaus, como un d'os movimientos que mas frecuentment cal executar cuan se conduce herbivoros, tot fendo tornar a os animals sobre os suyos pasos u en fendo modificar a trachectoria de a ramada.

A denominación de can d'atura u d'aturar, por analochía, dimana de l'acto d'aturar o ganau (lat. OBTURARE^[2]), que en l'ambito ganadero ye impedir que os animals se metan en as uebras (a on que podrían malmeter parte d'o cautivo), o que puede coincidir u no con o feito de fer que deixen de desplazar-se. De feito, fer chirar un estallo d'ungulaus de tornada ta'l camino tamién se diz “aturar-lo”, anque fisicament no haiga cesau de mover-se sino que nomás se le'n haiga cambeau a trachectoria.

En a comarca de Ribagorza, a on que a os canidos domesticos es conoixen como «cochos» por cuentas de como «cans», a os animals que desempenyan iste oficio se les diz cochos d'atura u d'aturar. En a vecina comarca de o Sobrarbe a denominación «cocho» no ye cheneralizada, pero tamién se i puede sentir de forma esporadica.

Historia

Una pastora con un rabanyo de corders y un can de chirar (olio sobre lienzo, s. XIX).

O emplego de cans ta conducir o bestiar se conoix dende l'antiguedat. Anque no se sabe con guaire certeza cuan se comenzó a fer-ne servir ta ista fayena, si que en apareix representaus con profusión en as figuracions artisticas de todas as civilizacions que han poblau a Mar Mediterrania: os echipcianos antigos en pintón en os monimentos, os griegos en daban treslau en os mitos, etc.^[3] Por tot o que se sabe que lo menos se'n ha emplegau dende fa milenta anyos.

Como referencia ta Aragón, bels autors han asinyalau que as uellas arribón y s'introdución en a vida d'os pobladors d'a Peninsula Iberica lo menos fa bels 6.000 anyos,^[3] y, anque se piensa que talment os primers canidos que fuen con os pastors pudon estar os cans de guarda,^[3] por a necesidat que se teneba de defensar as bestias domesticas contra os lobos y os onsos (que enantes yeran tan abundants), os cans de chira u d'aturar, mas chicorrons y rapedos, no debión de tardar en amaneixer.

A historia chenetica d'os cans de chira europeus pareix que ye relativament compartida. S'ha quiesto asinyalar como potencial antipasau de toz ellos una hipotetica raza, que en l'actualidat seria desapareixida, que s'habría caracterizau por a suya mida de media dica chicorrona, y que habría acompanyau a os pueblos de pastors nomadas de as estepas asiaticas en l'antiguedat.^[4] Posteriorment, os primers descendients d'aquels cans asiaticos s'habrían distribuiu por tot l'Imperio Romano^[4] y habrían dau as diferents razas actual en mesclar-se con as razas caninas preexistents en cadagún d'os países a on que se n'hise introduciu.^[4]

En cheneral, en a Peninsula, a mas gran parte d'o bestiar que s'ha teniu tradicionalment ha gosau estar uellas y crabas, y as vacas y caballos, anque puntualment se'n ha teniu dica ta formar-ne ramadas, no yeran sique una minoría d'entre as reses domesticas. Por ixo, as diferents variedaz de cans de chirar que historicament s'ha teniu no destacan por a suya mida nian por a fortaleza fisica, sino por contra destacan por l'achilidat y resistencia y por l'agudos, capables ta marchar con as ramadas t'a on que se as fese ir, y encara escorrechir-las por os camins dificils que feban l'acceso t'as estivas y os puertos, a on que se deixaba a'l tempero en os meses de buen orache. Son eixemplos d'iste tipo de constitucions as razas gos d'atura (catalana), o can de pastor basco, o can de carea (castellano) y o Can de Chira altoaragonés, y toz os eixemplars mestizos d'istas con belatras razas que se i emplega de punta dica punta.

Caracteristicas y razas

L'achilidat ye una cualidat muit important en os animals que se quiere que sirvan bien ta cans de chirar.

Como s'ha dito, os cans de chira que s'ha desembolicau en coexistencia con os rabanyos de crabas y/u uellas son medianos u chicorrons, resistents a chornadas de treballo que gosaban estar de muitas horas, y rapedos de movimientos. Istas caracteristicas son importants cuan s'entiende que a conducta con a cual os cans de chirar treballan, en realidat, ye una modificación seleccionada de o comportamiento depredador, herencio de os antipasaus salvaches que tienen toz os cans, por o que ye especialment important que os animals no superen cualque grau d'agresividat, lo chusto, contra las reses.

Manimenos, y anque historicament s'ha seleccionau con cualque preferencia os linaches d'animals que demostrasen o grau d'agresividat adecuau contra os ganaus, no quiere decir que no se'n pueda fer servir atros. Existe eixemplos evidents y conoixius de cans que fan parte de razas tradicionalment seleccionadas ta fer belatras funcions que, contrariament a lo que s'esperaría, han feito u fan un sobrebuen treballo con o bestiar: terriers, cans de caza u dica cans de presa, cuan son bien adiestraus, si tienen prou resistencia fisica ta fer as carreretas continuas que cal, pueden treballar como cans de chira sin de masiau perchudicio.

D'entre as razas que s'ha emplegau historicament como cans de chirar, en i ha de mida gran y de mida mas chiqueta, en estando os primers, en cheneral, os que corresponden con os estereotipos de razas que se feba servir en Europa central, como por eixemplo os pastors belgas, alemans y de os países eslaus, y os segundos os mas propios d'os países mediterranios.

Ista diferencia en a selección d'eixemplars se debe a la inexistencia de razas de molosos (cans especificament de guarda) en aquels países a on que a función disuasoria sobre os animals salvaches a feban os propios chiradors, nian a tamas de que con ixo perdesen una miqueta de as altras aptituz preferibles ta l'atura, como l'achilidat u a resistencia fisica. En os países mediterranios y en as grans cordeleras, a la contra de como pasaba en Europa central, os rabanyos contaban dende bien d'antigos con razas especificas ta guardar-los contra depredadors, como os mostins, y a función de fer-los chirar recaiba mayoritariament en os rapatans humanos^[5] (lo menos dica o sieglo XVIII^[5]). En o caso d'Aragón, a incorporación de os cans de mida media-chica ta conducir o ganau s'ha quiesto datar en os prencipios d'o sieglo XIX,^[5] lo menos de forma mayoritaria (no quiere dicir que enantes no en hise puesto haber casos contaus), momento en o cual habrían comenzau a liberar a os rapatans de fer ixa fayena.

En l'actualidat y dende fa bels anyos, i ha un movimiento de recuperación de cans de chira con os rasgos fisicos que presentaban os antigos cans d'aturar de o Pirineu aragonés, que iban pastors en as rutas transhumants anyals con a val d'Ebro. As asociacions y entidaz relacionadas con iste prochecto han proposau un estereotipo racial con o cual se selecciona os animals reproductors, y han baptizau a la raza como Can de Chira, tot emplegando a denominación tradicional que en aragonés tiene iste oficio canino ta una raza concreta. A raza d'o can de chira altoaragonés encara no ye reconoixida por organismos de referencia internacionals, como a FCI, principalment por os pocos eixemplars puros que se'n tiene rechistraus, y l'altro grau de tremescluz chenetico que tienen a mayoría d'os cans d'aturar que huei viven en o Pirineu.

Imáchens

O pastor alemán ye una d'as razas mas conoixidas que historicament han estau cans de chira.
O Border Collie, d'orichens britanicas, ye una d'as imáchens que mas a sobén s'asocia con l'oficio de can de chirar, gracias a la suya presencia en o cine y en os concursos y exhibicions.
O Can de Chira altoaragonés ye una raza que en l'actualidat conta con muit pocos eixemplars que cumplan o estereotipo racial, o que quiere dicir que ye muit amenazada.
Actualment, a mayoría de cans d'aturar de l'Alto Aragón tienen rasgos mestizos u influencias de belatras razas.

O Berger des Pyrénées ye una raza de can de chira que s'emplega tradicionalment en o Pirineu francés, y puede haber-se mestizau a sobén con os cans de chira espanyols.
Cans d'aturar, en Rumanía.