Ansara
Una ansara[1][2], con formas masculinas posibles como ánsar u ansar (d'o latín <ANSER), ye o nombre común eixemplars domesticos u salvaches d'a especie Anser anser, y atras especies salvaches parellanas.[3]
Si orichinariament en aragonés medieval igual como en as formas medievals d'os iberorromanicas (galaicoportugués, astur-leyonés y castellano) designaba tanto a las formas domesticas como a las formas salvaches, con un emplego preferent en o rechistro escrito sobre lo goticismo ganso, en a Edat Meya tardana l'aplicación d'a palabra ansara tendió a restrenyir-se a las variants salvaches obchecto de caza,[4] devez que dende luengas como o catalán u o italiano apareixeba a denominación de oca y dende l'occitán auca, aplicadas tanto a las formas domesticas como a las formas salvaches, persistindo a segunda mesmo en l'actual castellano d'Aragón y en a toponimia (Campo de los Aucos en Noviellas).[5]
En aragonés bi ha poca documentación d'o goticismo ganso (sobre tot peyorativa como faltada), pero coexistiba en o luengache medieval con a forma prestichiada ansara porque ye o que explica a conservación d'o grupo -ns- d'esta palabra,[4] que s'habría perdiu como en "defesa" < DEFENSA. A forma ansara teneba mes prestichio por pareixer-se a la forma latina y se documenta d'os fueros de Navarra y Teruel,[2] d'a toponimia aragonesa (Villar de l'Ansara en El Pobo), d'o lexico comercial aragonés d'o sieglo XV.[6] y d'os zaguers emplegos escritos d'aragonés teronalo.[7] Antiparte, ye a sola que se troba en as traduccions medievals como o "Libro d'el Trasoro".[8]
As ansaras son aus anatidas de mida gran, voladeras, que s'ha cazau historicament por as suyas plumas y a suya carne. A mayoría d'ansaras son migraderas y, en Europa, migran entre o norte d'o continent y a cuenca mediterrania, por o que en as zonas humedas d'a Peninsula Iberica no se'n troba si que en l'hibierno. No ye una especie frecuent manimenos.
Referencias
editar- ↑ (an) El Libro d'el Trasoro, manuscrito aragonés de finals d'o sieglo XIV.
- ↑ 2,0 2,1 (an) Fuero romanz de Teruel, en dos parrafos: "Decabo, si alguno pago o ansara o anade o gallina o otra cosa de casa linenciare e provado'l fuere por la jura del sennor que la peche, et el feridor que se la lieve, si non jure solo" y "Otrosí, si alguno ansara o anade agena matare e provado'l fuere peche XII dineros; si non, iure solo el adversario e sea credido".
- ↑ (an) VIDALLER TRICAS, Rafel: Libro de As Matas y Os Animals; Dizionario aragonés d'espezies animals y bechetals; Editorial Val d'Onsera, 2004, Zaragoza.
- ↑ 4,0 4,1 * (es) Joan Coromines i Vigneaux, José Antonio Pascual: Diccionario crítico etimológico castellano e hispánico, Editorial Gredos, 1980-1991.
- ↑ (es) Juan Antonio Frago Gracia: Toponimia navarroaragonesa del Ebro (VI): Fauna. AFA, nº XXXIX [1], p 65.
- ↑ (es) LÍBANO, Ángeles y SESMA, J. Ángel, Léxico comercial en Aragón (Siglo XV). Institución Fernando el Católico, 1982.
- ↑ (es) Javier Terrado Pablo: La lengua de Teruel a fines de la Edat Media. Instituto de Estudios Turolenses, 1991. p 470.
- ↑ (an) "Libro d'el Trasoro".
Bibliografía
editar- (es) Joan Coromines i Vigneaux, José Antonio Pascual: Diccionario crítico etimológico castellano e hispánico, Editorial Gredos, 1980-1991.
- (es) Javier Terrado Pablo: La lengua de Teruel a fines de la Edat Media. Instituto de Estudios Turolenses, 1991.
Datos: Q65395343
