Trallo (tronco)

Pa atros usos de trallo se veiga Trallo (desambigación).

De forma cheneral, en o vocabulario d'a fusta, un trallo ye un tronco de forma más u menos recta y que ya s'ha desbrozau (se le han sacau as ramas) y ye presto pa tirar-lo fuera d'a selva u pa serrar. I ha tot un vocabulario especifico d'os trallos en función d'a mida u a forma que tienen.

Trallos de pins y atras coniferas.

Tipos de trallosEditar

Tradicionalment, en l'Alto Aragón os trallos se mesuraban en palmos aragoneses. D'aquí dimana tot un vocabulario que se basa en os multiplos d'esta mesura tradicional: docens, trecens, secens, trentens, trentaseisens, quarantens, cinqüentens y os más grans de totz, os sesentens. En una capitulación sinyada en 1589 en Chaca i trobamos:

[...] los sezenes que hayan de tener y tiengan veinte y quatro pies de catorze puntos de agujero a agujero, y los catorzenes de veinte y un pie de a onze puntos de agujero a agujero, e los dozenes de a diez y nuebe pies de a onze puntos de agujero a agujero.[1]..

En o mundo d'as navatas, os trallos «s'esquadraban» enantes de ligar-los en un trampo, de forma que perdeban a sección cilindrica y por contra se les feba unas caras laterals aplanadas antes de transportar-los. Estas se deciban «cara» as d'alto y abaixo, y «canto» as laterals.[1] De regular a quadratura no yera exacta y as «caras» yeran un poquet más amplas que os «cantos».

Por eixemplo, os navaters de Sobrarbe a mediaus d'o sieglo XX emplegaban o siguient vocabulario (d'alcuerdo con Pallaruelo, 2008) pa os trallos por a suya largura:[1]

  • Ventiquatrén: 24 palmos = 4,5 a 5 metros de largo, 45 centimetros de cara y 40 de canto.[1]
  • Quarantén grande: 40 palmos = 9 metros de largo, 55 cm de cara y 50 cm de canto.
  • Quarantén chico: 8 metros de largo, 50 cm de cara y 45 cm de canto.
  • Sesentén: 60 palmos = 12 metros de largo, 60 cm de cara y 60 cm de canto. Un tipo de pieza de tot excepcional.[1]

Entre os trallos que no se denomina en función d'a suya largura tenemos (Pallaruelo, 2008)[1]:

  • A Coixera: 6,4 metros de largo, 60 cm de cara y 55 cm de canto.
  • O Doblero: 8 metros, 45 cm de cara y 40 cm de canto.
 
Bells tipos de trallos remataban fendo parte d'as bastidas de tellaus y suelos en os edificios, a modo de bigas y biguetas.

En atros casos, as piezas recibiban nombre en función d'a fayena a la qual se soleban destinar. Asinas en a documentación relacionada con o comercio fluvial d'o Cinca apareixen as entenas, como ixa pieza de l'aparello de velamen d'os vaixiellos de vela, quairons, fustes y filas, que yeran tipos de bigas, etc.[1] En un documento notarial de Balbastro, en 1598, se diz:

[...] veynte filas de pino buenas y serbidoras, no tuertas, ni quebradas, sabareñas, ni betasegadas, de largueza cada una dellas de veynte y ocho a trenta palmos, de ancheza las dos de ellas de tres palmos a la espiga, y las seis a dos palmos, las otras seis de palmo y furco, y las otras seis de palmo y medio de ancho a la espiga...

Atras mesuras de trallos que s'emplegaba en Sobrarbe en o sieglo XX, replegadas por Pallaruelo en a suya obra Navateros, son:

  • O quadradillo: 5 metros de largo, 20 cm de cara y 18 de canto.
  • O quadradillo de media carga: 8 metros, 20 cm de cara y 18 de canto.
  • O filetón: 5 metros, 25 centimetros de cara y 22 cm de canto.
  • A fileta: 8 metros de largo, 25 cm de cara y 22 cm de canto.
  • A fila de carga: 5 metros de largo, 40 cm de cara y 35 de canto.
  • O fusto de carga: 8 metros de largo, 30 cm de cara y 25 cm de canto.
  • O fusto de media carga: 5 metros de largo, 30 cm de cara y 5 cm de canto.

ReferenciasEditar

  1. 1,0 1,1 1,2 1,3 1,4 1,5 1,6 (es) PALLARUELO CAMPO, Severino. Navateros. Ed. PRAMES, Zaragoza, 2008. pp 90-91. ISBN 978-84-8321-256-1

Se veiga tamiénEditar