Torrent

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Este articlo ye sobre una corrient d'augua en una zona montanyosa; pa atros usos, se veiga Torrent (desambigación).

Un torrent ye una corrient d'augua en una zona montanyosa, con fuertes pendients, caudal irregular y que puet tener gran capacidat d'erosión. Ye un termin muito emplegato tanto en hidrografía y cheomorfolochía, como en o campo mes cheneral d'a cheografía fisica. A sobén se fa servir como sinónimo de barranco encara que este zaguer termino pareix tener una relación mes estreita con o cauz d'un torrent que con a corrient fluvial suya. Tamién se fa servir muito a sobén, sobre tot en a parte oriental d'a peninsula Iberica o termin d'orichen arabe rambla, que s'ha de considerar un tipo especial de torrent tipico d'o clima mediterranio.

Parz d'un torrent

As partes tipicas d'un torrent son:

Compleganza de recepción, on se recullen as auguas mientres as plevias, tiene forma d'embasador.
Canal de desaugüe, on o cauz se fa mes estreito y profundo, al acentuar-se a erosión vertical. Forma una val en "V" tipica cuan o suyo orichen ye exclusivament fluvial.
Cono de dechección u ventallo aluvial, on s'acumulan os sedimentos (bloques, ruellos de glera, grava, arena) carreyatos por as auguas d'o torrent mientres l'aguaduito, que s'acumulan en forma de ventallo cuan plegan a zonas de menor pendient, por un regular, en o fondo d'a val principal. Puede intuir-se o cambio brusco de pendient a on encomienza o cono de dechección.

Tipos de torrents

Torrents de deschelo.
Torrents d'a compleganza alta d'un río u Garonas.
Clamors.
Torrents mediterranios u Ramblas.

Toponimia

A parola torrent deriva d'o latín TORRĔNTEM, que por vía patrimoninal da Torrient^[1] y por vía culta Torrent. En os textos escritos medievals escritos en latín y en aragonés se puede veyer torrente (forma latina orichinal), torrent (cultismo) y torrient (forma patrimonial):

...afrontat in terra del Palaço et in lo torient...^[1] (en un texto d'o Monesterio d'Obarra de 1125-1134).

...huna holivera que yo e en hun canpo mio que yo e en lo termen de Perarua, logar on es dito a las Fontiallas, que confronta lo dit canpo, por dos partes, en bias publihas, et por la tercera part en torent^[1]... (en un texto de Perarruga de 1338).

En macrotoponimia bi ha toponimos relacionaus con os torrents como Terrient en a Sierra d'Albarracín y Torrent de Cinca en o Baixo Cinca. En microtoponimia ye posible veyer as formas patrimonials diftongadas en poquez casos como (Barranco de) La Torrient y Torrient del frío en Ambel^[1], (sin pronunciar-se a -t final).

Referencias

↑ ^1,0 ^1,1 ^1,2 ^1,3 (es) Juan Antonio Frago Gracia: Toponimia del Campo de Borja. Estudio lexicológico. Institución Fernando el Católico, p 186.

Cuerpos d'augua continental

Corrient	Río · Regallo u Rigachuelo · Galocha · Torrent (Barranco · Garona · Rambla)
Aturada	Laco · Lacuna u Estanyo (albufera · ibón · salada) · Paúl · Almarchal · Basa

Datos: Q1437299

[FRAGOCAMPOBORCHA-1] 1,0 ^1,1 ^1,2 ^1,3 (es) Juan Antonio Frago Gracia: Toponimia del Campo de Borja. Estudio lexicológico. Institución Fernando el Católico, p 186.

[1]