Strigops habroptilus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Strigops habroptila
Kakapo masclo en a isla Maud
Denominacions populars
Kakapo, kākāpō, night parrot, owl parrot
Estau de conservación
En periglo critico (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Psittaciformes
Familia:	Strigopidae
Chenero:	Strigops
Especie:	S. habroptila
Descripción
Strigops habroptila G.R. Gray, 1845

O kakapo (en maorí kākāpō, nombre cientifico Strigops habroptila) ye una especie de loro no volador, nocturno perteneixient a la superfamilia Strigopoidea, endemica de Nueva Zelanda.^[1]

Descripción

Tien un plumache con finas tacas amariellas y verdas, un distinctivo disco facial con plumas sensorials, un gran pico griso, garras curtas, piez grans y alas y una coda de relativament curta largaria. Una combinación de rasgos que lo fa unico en a suya especie; ye l'unico loro d'o mundo que no ye volador, o loro mas pesau, nocturno, herbivoro, sexualment dimorfico en a grandaria d'o suyo cuerpo, tien una baixa tasa de metabolismo basal, os masclos no paran cuenta d'os muixonez y ye l'unico loro que tien un sistema de cría basau en a polichinia. Tamién ye probablement un d'os muixons que mas anyos vive d'o mundo.^[2] A suya anatomía tipifica a tendencia d'a evolución d'as aus en as islas ocianicas, con pocos depredadors y a-saber-la comida: un fisico cheneralment cerenyo, con perduga d'a eficiencia termodinamica debiu a las suyas nulas habilidaz ta volar, musclos d'as alas reducius y una carena reducida en o esternón.^[2]

O kakapo en a cultura

Como muitas atras especies de muixons neozelandesas, o kakapo estió historicament important ta os maorís, o pueblo indichena de Nueva Zelanda, apareixendo en muitas d'as suyas leyendas y folclor tradicional; manimenos yera prou cazau y emplegau como recurso por os maorís, d'una man por a suya carne como alimento y d'atra por as suyas alas, que yeran emplegadas ta fer piezas de ropa de gran valura. Os kakapos tamién yeran ocasionalment emplegaus como mascotas.

Estau de conservación

O kakapo ye criticament menazau; estando en abril de 2018, a suya población adulta conoixida de 149 eixemplars, seguntes informacions d'o programa ta a recuperación d'o kakapo, muitos d'éls con nombres propios.^[3] Debiu a las colonizacions polinesia y europea y a introducción de depredadors como gatos, ratas, furons y arminios, o kakapo practicament ha desapareixiu. Os esfuerzos ta a suya conservación prencipioron en a decada de 1890, pero no tenioron guaire exito dica a implementación d'o Plan de Recuperación d'o Kakapo en a decada de 1980. En abril de 2012, os kakapos que encara quedaban viviban en tres islas libres de depredadors, as Codfish (Whenua Hou), Anchor, y Little Barrier, a on os suyos movimientos son monitorizaus.^[4]^[5] Actualment dos grans islas de Fiordland, Resolution y Secretary, se quieren rehabilitar ecolochicament ta creyar ecosistemas autosostenibles con habitats apropiaus ta o kakapo.