Iste articlo tracta sobre o concepto de patio más común en l'Alto Aragón. Ta atros usos d'a parola patio se veiga Patio (desambigación).

En l'Alto Aragón, o patio ye a planta baixa d'a casa que queda, de regular, a ran d'a carrera y ye por ixo por aon que s'accede enta la vivienda. En cheso y en ansotano recibe o nombre de solero.[1][2] En as casas antigas, o patio se construiba con una vuelta de mampostería a modo de teito que feba más firme a estructura d'a vivienda que se troba alto.

O patio de casa Bara de Guaso (l'Aínsa-Sobrarbe, Uesca).

O patio teneba tradicionalment as funcions d'almagazén y de distribuidor entre a puerta principal y as diferents cambras de fayena d'a casa que, por condicions climaticas u creyencias, no se podeba meter en o mesmo espacio aon que habitaban as personas, pero tampoco guaire leixos. Como eixemplo, a traviés d'o patio se puede pasar t'a bodega u ta o reposte, que amenistan estar más frescos que a resta d'a casa, pero tamién t'a quadra u t'as zolles aon que se meteba os animals, pos a tradición consellaba tener a qualques animals (notablement as vacas) guardatos contra a fredor y por tanto adintro d'o edificio, y a la vegada s'aprofitaba o vafo y a calor que dimana d'os suyos cuerpos pa, de conchuntas con o calivo d'a cocina, contrubuir a calentar a casa que ye alto.

ReferenciasEditar

  1. DÍAZ ROZAS, Manuel, Apuntes de Lengua Chesa. Aladrada ediciones, 2013. ISBN 978-84-940886-1-2
  2. BARCOS, Miguel Ánchel, El Aragonés Ansotano: estudio lingüístico de Ansó y Fago; Institución «Fernando el Católico» + Gara d'Edizions, 2007. ISBN 978-84-8094-058-0

Se veiga tamiénEditar