Loma

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Loma ye una altaria chica y prolongada. La pendient d'as lomas ye suave por los dos costaus.

Paisache con lomas.

Paisache con lomas en Tennessee.

Bi ha lomas de diferents escalas. Bi'n ha que son pueyos luengos, con poca pendient y no guaire alteros, y tamién lomas que son linias d'o perfil d'o releu que va dende una punta dica atra y que pueden estar consideraus sarraus u mesmo sierras.

En Aragón bi ha muitos toponimos con a forma loma as suyas variants (lumo) u os suyos derivaus lomaza, lometa, lomarro, etz...

A documentación d'a palabra loma ye antiga, y a part de trobar-se en toponimos antigos, tamién se troba en textos medievals. En o texto en o que mugan o termin d'o Monesterio de Piedra en 1260-1265, bi n'ha una cita intresant, que ilustra que en o concepto de loma entra a ideya de largura y puede formar una locución adverbial espacial:

Asignamos por termino al dito monasterio entrel monasterio e los de Flumes conviene a saber: De la dita Penna Crebrada, assí quomo va loma a loma tro a en dreito al Algadil de la Muerta, e dent assí quomo va loma a loma quomo las aguas vierten enta los Algadiles, e entro al semo de los molinos de Valdenogueras, que son de los monges, e assí quomo va por el fondon del malluelo que planto Xemen Perez entro al somo de Val de Armesan, e assí quomo va por el cerro quomo las aguas vierten de cada part enta los molinos de Val de Nogueras e en tal monasterio, e daquel cerro así quomo va omme entro aquel logar, do se parten las carreras, la una enta Flumes, e la otra enta Cubel e desdent assí quomo poya al somo de la Loma Luenga...

Bibliografía

• (es) Chesús Casaus Parrilla, Pascual Miguel Ballestín: Dizionario Aragonés de Terminos Cheograficos. Ainas. Gara d'Edizions.

Se veiga tamién

• Loma Alta.
• Lomas d'o Galligo.
• Las Lomazas de Belchit.
• Sarzuela de la Loma.
• O Lumo de Ranyín.
• O Lumo de Muro.