La Jota

La Jota ye un barrio d'a ciudat de Zaragoza situau en a marguin ezquierda d'o río Ebro, en o districto d'o Rabal.

La Jota
Barrio de Zaragoza
Molimento a os ninos
Entidat  • País  • Ciudat  • Districto	Barrio Aragón Zaragoza Rabal
Codigo postal	50.014
Carreras prencipals	Marqués de la Cadena, Avta.Catalunya, Plza.Mozart
La Jota en a marguin ezquierda

Servicios y comunicacions

Transporte

Ye un barrio muit bien comunicau con a resta d'a ciudat, con as linias d'autobús 21, 28, 32, 39, 44, 50, Ci1, Ci2 y a traviés d'os dos cinturons urbans que i pasan, a Z-30 y a Z-40.

Comercio

Tien un puerto fluvial chunto a lo río Ebro, cuantas tabiernas, mercaus tradicionals y cuantos supermercaus (Simply, Mercadona, Día, Eroski y Bonárea). O barrio tamién aculle o Centro d'Especialidaz Medicas Gran Covián. I hai 5 colechios y institutos publicos, 1 centro de salut d'o Servicio Aragonés de Salut, un Centro Civico, una Casa de Choventut, una parroquia, 2 campos de fútbol y zonas verdas como a ribera y o soto d'o río Gállego.

Como curiosidat, as carreras son mayorment referidas a ixoters y cantadors folkloricos aragoneses, como Pascuala Perié, José Oto, María Virto u Felisa Galé. Tamién i existen carreras adedicadas a grans compositors de musica de rondallas ixoteras u piezas tradicionals aragonesas, como o mayestro Calavia u o mayestro Orús.

Zonas verdas

O prencipal espacio verde d'o barrio ye o parque d'Orient. Atras zonas verdas incluyen o parque d'o Rabal, a on ye situada una estatua d'un afamau ixotero, clamau Royo d'o Rabal, y o de Vadorrei, decorau con un antigo barco en memoria d'o trafico fluvial que sulcaba o río Ebro entre a desembocadura y a ciudat de Zaragoza. Tamién a lo canto d'a ribera d'o río Ebro, chunto a o parque d'Orient, ye o reloch solar mas gran d'o mundo.

Historia

Oríchens

En os suyos oríchens ista zona yera conoixida como barriada d'Escudero, estando clarament un barrio de tradizión obrera, con una población orichinal que se nutriba prencipalment de mano d'obra emigrant proveniente d'os lugars d'a ribera d'Ebro y que veniba a treballar a las fabricas situadas en l'amanau Poligono Industrial de Cogullada.

O barrio de la Jota estió un d'os barrios pioners en Zaragoza en organizar-se y en a creyación d'una Asociación de Vecins ta demandar milloras en as infraestruturas d'o barrio (como cuasi toz os barrios obrers d'emigración surtius chunto a instalacions industrials, pobras en servicios y en infraestruturas en os suyos inicios) y ta refirmar a os suyos vecins en as reivindicacions y en a luita por millorar a calidat de vida d'os mesmos.

Atentau d'ETA

L'11 d'aviento de 1987, a organización terrorista ETA atentó contra a casa cuartel d'a Guardia Civil situada en l'Avenida de Catalunya, chunto a o barrio de la Jota, a traviés d'un coche bomba, prevocando a destrución de l'inmueble. I habió once muertos, beluns d'els yeran ninos, y muitos ferius entre os habitadors d'a casa cuartel.

Huei, en ixe mesmo puesto, i hai una plaza clamada Parque de l'Asperanza ta remerar iste feito, con un conchunto d'estatuas en alcordanza d'os ninos asasinaus.

Cultura y musica

En o barrio de la Jota i hai una important tradición de rap y hip-hop, habendo-ie amaneixiu cuantos grupos y compositors d'iste estilo de musica, como o gran conoixiu y famoso rapero d'o grupo de Violadores del Verso, Kase.O. Tamién surtioron en os anyos 90 cuantos grupos de musica rock, estando l'abanderau d'ista tendencia, o grupo Distrito 14.

Se veiga tamién

• Barrios de Zaragoza.

• Datos: Q12178355
• Multimedia: La Jota (Zaragoza) / Q12178355