Euskadi Ta Askatasuna
ETA (que significa Euskadi Ta Askatasuna, en basco País Basco y Libertat) estió una organización independentista basca armata y clandestina, d'idiolochía marxista, que teneba como obchectivo a creyación d'un estau basco euskaldun, independient d'Espanya y Francia, y encluyendo os siet territorios bascos historicos (Euskal Herria): tres perteneixients a lo estau francés (que son toz almenistrativament en o departamento francés d'os Pireneus Atlanticos), tres provincias d'o estau espanyol que forman l'actual País Basco, y a tamién provincia espanyola de Navarra, en l'actualidat Comunidat Foral de Navarra; y socialista. Yera considerata una organización terrorista por o gubierno d'Espanya, por a Unión Europea[1] y por os Estaus Unius.[2]
ETA practicaba a sobén a extorsión y a vegatas o secuestro como metodos de financiamiento y con finalidat de presión politica. Organizacions como Amnistia Internacional[3] denuncioron anyalment as activitaz d'ETA en os suyos informes asinas como bellas actuacions d'os cuerpos policials espanyols en o mesmo conflicto.
Os integrants d'ETA se deciban etarras, y o suyo simbolo yera una serpient enreligata en una estral.
ETA en Aragón
Debito a las buenas comunicacions d'Aragón con o País Basco y Francia y a la suya orografía estió siempre un puesto privilechiato ta las actividaz d'ETA.
En total 17 personas morioron en o país debito a los atentatos, a mas gran parti d'els relacionatos con a Guardia Civil u l'exercito. As dos primeras victimas d'ETA en Aragón estioron Manuel Rivera Sánchez y Ángel José Ramos Saavedra, comandant y soldato de l'exercito que morioron dimpués que esclatase l'autobus militar en que viachaban en a Plaza de Sant Chuan d'os Panez de Zaragoza o día 30 de chinero de 1987. Ixe mesmo anyo, l'11 d'aviento, se produció tamién o pior atentato d'ETA en Aragón con o esclatito d'un coche-bomba en a casa d'a Guardia Civil de l'Avenita de Catalunya de Zaragoza, morindo 11 personas, entre ellas cinco ninas.
En 1989 moriba en Chaca o sarchento de l'exercito Joaquín Bordonaba en un atentato con libro-bomba. Dica l'anyo 2000 ETA no torna a actuar en Aragón y ye o 20 d'agosto de 2000 en Sallent cuan son asasinatos os guardias civils Irene Fernández Pereda y José Ángel de Jesús Encinas con una bomba penchata en os baixos d'o suyo coche. Un anyo dimpués ye asasinato de tres tiros en a carrera Corz d'Aragón o president d'o Partido Popular de Aragón Manuel Giménez Abad cuan se'n iba ta la Romareda a veyer a lo Real Zaragoza.
Bi habió atros atentatos d'ETA en Aragón como por eixemplo en o Corte Inglés de Sagasta en que nomás habió danyos materials y bellas personas feritas.
Manimenos l'actividat d'ETA estió muito mayor en a suya historia en Aragón. Se troboron diferents pisos francos prencipalment en Zaragoza y tamién se prenió a personas relacionatas con ETA en atros puesto como l'Almunia.[4] Tamién ETA s'aprofeitó d'a orografía pirenenca ta amagar armas y personas como amuestra o descubrimiento d'un zulo en a Guarguera con 125 kg d'explosivos a prencipios de 2008.[5]
Tamién estió important a operación policial en a que a Guardia Civil de trafico prenió lo 21 d'aviento de 1999 dos furgonetas a mán d'Alfama d'Aragón y Contamina con grans cantidaz d'explosivos ta emplegar en futuros atentatos d'ETA.
Referencias
- ↑ (en) Lista d'organizacions terroristas feita por a UE o 29 de mayo de 2006
- ↑ (en) Lista de organizacions terroristas foranas feita por os EUA
- ↑ (es) Amnistía Internacional condena la campaña de amenazas y homicidios deliberados de ETA contra representantes de los partidos políticos''.
- ↑ (es) Detenidas 34 personas en una amplia operación antiterrorista en Espanya y Francia
- ↑ (es) La Guardia Civil localiza dos zulos de ETA con explosivos en Lesaka y Sabiñanigo
